Read dyu Ezekiyɛli ka kitabu 48 Bible Online

Ezekiyɛli ka kitabu 48 - dyu bible

Ezekiyɛli ka kitabu 48

¹«Ayiwa, Isirayɛli deen tan ni fila kɔmɔgɔ nunu n'u niyɔrɔw filɛ nin ye. Jamana kɔgɔdugu ɲafan fɛ, Dan kɔmɔgɔw niyɔrɔ daan bena kɛ sira ye min be tɛmɛ Etilɔn, ni Lebowamati, ani Asariyena, Damasi ni Amati maraw gɛrɛfɛ. K'a ta jamana kɔrɔn ɲafan fɛ daan na fɔɔ ka ta'a bila Kɔgɔjiba la, o bena kɛ u ka mara ye.

²Isirayɛli deenw kɔmɔgɔ nunu kelen kelen bɛɛ bena niyɔrɔ kelen sɔrɔ k'a ta kɔrɔn fɛ daan na ka ta'a bila tileben faan fɛ, Kɔgɔjiba daa la. O bena daminɛ kɔgɔdugu faan fɛ ka taga woroduru ɲafan fɛ ka tugu ɲɔgɔn na: Dan kɔmɔgɔw, ni Asɛri taw, ani Nɛfutali taw, ni Manase taw, ani Efarayimu taw, ni Urubɛn taw.

⁸«Zuda kɔmɔgɔw ka mara daan na, k'a ta kɔrɔn fɛ ka taga tileben ɲafan fɛ, o yɔrɔ bena bila danna. A boɲa bena kɛ kilomɛtɛrɛ tan ni fila ani tilan ye, a jaɲa ni tɔw ta bena kɛ kelen ye ka bɔ kɔrɔn fɛ ka taga tileben fɛ. Masaba ka yɔrɔ bena sɔrɔ a cɛmancɛ la.

⁹Aw bena niyɔrɔ min bila danna ka kɛ Masaba ta ye, o jaɲa ka kɛ kilomɛtɛrɛ tan ni fila ani tilan ye, a boɲa ka kɛ kilomɛtɛrɛ duuru ye.

¹⁰O yɔrɔ senuman nin bena kɛ sarakalasebagagaw ta ye. A kɔgɔdugu ɲafan jaɲa bena kɛ kilomɛtɛrɛ tan ni fila ani tilan ye, a tileben ɲafan boɲa bena kɛ kilomɛtɛrɛ duuru ye, a kɔrɔn fɛ boɲa bena kɛ kilomɛtɛrɛ duuru ye, a worodugu ɲafan jaɲa bena kɛ kilomɛtɛrɛ tan ni fila ani tilan ye. Masaba ka yɔrɔ bena sɔrɔ a cɛmancɛ la.

¹¹O yɔrɔ bena kɛ Sadɔki kɔmɔgɔ sarakalasebagaw ta ye, minw y'u yɛrɛ di Ala ma, k'u ka baara kɛ ni tilenninya ye, n'u ma jɛngɛ i ko Levi kɔmɔgɔ tɔw tuma min na Isirayɛlidenw jɛngɛna.

¹²Sigiyɔrɔ dɔ ka kan ka bila danna ka kɛ yɔrɔ ye min saniyanin be kosɔbɛ Levi kɔmɔgɔw ka mara gɛrɛfɛ.

¹³Levi kɔmɔgɔw niyɔrɔ ni sarakalasebagaw ta bena kɛɲɛ ɲɔgɔn ma. U niyɔrɔ jaɲa bena kɛ kilomɛtɛrɛ tan ni fila ani tilan ye, u boɲa, kilomɛtɛrɛ duuru.

¹⁴O yɔrɔw si man kan ka feere, walima ka falen. O ye jamana yɔrɔɲuman ɲuman le ye, a man kan ka don mɔgɔ wɛrɛ bolo bari, a bilanin be Masaba ye.

¹⁵«O yɔrɔ min tora n'a boɲa ye kilomɛtɛrɛ fila ni tilan ye, a jaɲa ka kɛ kilomɛtɛrɛ tan ni fila ni tilan ye, o yɔrɔ nin bena kɛ dugu n'a kɔnɔ mɔgɔw ka sigiyɔrɔw ye, ni dugu laminiyɔrɔw. Dugu nin bena sigi a cɛmancɛ la.

¹⁶A kɛɲɛ filɛ nin ye: A faan naani nunu bɛɛ jaɲa bena kɛ kelen ye, kilomɛtɛrɛ fila ni mɛtɛrɛ kɛmɛ fila ni bi duuru duuru ye.

¹⁷Kɛnɛ min bena dugu lamini a faan naani bɛɛ la, o jaɲa be kɛ mɛtɛrɛ kɛmɛ ni mugan ni duuru duuru ye.

¹⁸«O yɔrɔ tɔɔ min be Ala ka yɔrɔ gɛrɛfɛ, o boɲa be kɛ kilomɛtɛrɛ duuru ye kɔrɔn fɛ ani kilomɛtɛrɛ duuru, tileben fɛ. O yɔrɔw sɛnɛfɛnw bena kɛ dugu kɔnɔ baarakɛlaw ka balofɛn ye.

¹⁹Dugu kɔnɔ baarakɛla minw ben'a sɛnɛ, olu bena bɔ Isirayɛli deen tan ni fila kɔmɔgɔ bɛɛ la.

²⁰O yɔrɔ min bilara Masaba ani dugu ka sigi kama. O faan naani bɛɛ jaɲa bena kɛ kelen ye: kilomɛtɛrɛ tan ni fila ni tilan tilan ye.

²¹A tɔɔ min tora, o bena kɛ ɲamɔgɔ ta ye. A ka mara bena sɔrɔ Ala ka yɔrɔ ni dugu sigiyɔrɔ faan fila bɛɛ la. A daan ye kilomɛtɛrɛ tan ni fila ani tilan ye, k'a bɔ o yɔrɔ la ka taga se kɔrɔn fɛ daan ma, ani ka taga tileben faan fɛ fɔɔ ka taga se Kɔgɔjiba daa la. O la, yɔrɔ min dira Matigi ma, ani Alabatoso yɔrɔ senuman bena kɛ jamana yɔrɔ cɛmancɛ la, min bilara danna.

²²O la, Levi kɔmɔgɔw ka mara ni dugu sigiyɔrɔ bena kɛ ɲamɔgɔ ka dugukolo cɛmancɛ la. A ka dugukolo bena sɔrɔ Zuda ni Bɛnzamɛn kɔmɔgɔw ka maraw cɛ. «Bɛnzamɛn kɔmɔgɔw niyɔrɔ bena bɔ kɔrɔn fɛ ka taga se tileben fɛ.

²³Isirayɛli deenw kɔmɔgɔ tɔw kelen kelen bɛɛ bena niyɔrɔ kelen sɔrɔ k'a ta kɔrɔn fɛ daan na ka ta'a bila tileben faan fɛ, Kɔgɔjiba daa la. O bena daminɛ kɔgɔdugu faan fɛ ka taga woroduru ɲafan fɛ ka tugu ɲɔgɔn na: Bɛnzamɛn kɔmɔgɔw, ni Simeyɔn taw, ani Isakari taw, ni Zabulɔn taw, ani Gadi taw.

²⁸Gadi kɔmɔgɔw ka mara worodugu ɲafan daan be tɛmɛ Tamari ka taga worodugu ɲafan fɛ fɔɔ ka taga se Meribakadɛsi jiyɔrɔ la, ka taga Ezipiti kɔɔ daa la fɔɔ ka taga se a donyɔrɔ la Kɔgɔjiba la.

²⁹«Aw ka kan ka jamana nin le tilan Isirayɛli deen tan ni fila kɔmɔgɔw cɛ k'u niyɔrɔw d'u ma cogo min na, o lo.» Matigi, Masaba le ko ten.

³⁰ Dugu dondaw filɛ nin ye. K'a daminɛ dugu kɔgɔdugu ɲafan kogo la, min jaɲa ye kilomɛtɛrɛ fila ni mɛtɛrɛ kɛmɛ fila ni bi duuru ye,

³¹Isirayɛli deen tan ni fila nunu tɔgɔw bena la dugu dondaw kan. Daa saba bena kɛ kɔgɔdugu ɲafan fɛ: Urubɛn ka daa, ni Zuda ka daa, ani Levi ka daa.

³²Dugu kɔrɔn fɛ kogo min jaɲa ye kilomɛtɛrɛ fila ni mɛtɛrɛ kɛmɛ fila ni bi duuru ye, daa saba bena kɛ o faan fɛ fana: Yusufu ka daa, ni Bɛnzamɛn ka daa, ani Dan ka daa.

³³Dugu worodugu ɲafan min kogo jaɲa ye kilomɛtɛrɛ fila ni mɛtɛrɛ kɛmɛ fila ni bi duuru ye, daa saba bena kɛ o faan fɛ: Simeyɔn ka daa, ni Isakari ka daa, ani Zabulɔn ka daa.

³⁴Dugu tileben fɛ, min kogo jaɲa ye kilomɛtɛrɛ fila ni mɛtɛrɛ kɛmɛ fila ni bi duuru ye, daa saba bena kɛ o faan fɛ fana: Gadi ka daa, ni Asɛri ka daa, ani Nɛfutali ka daa.

³⁵Dugu laminikogo jaɲa bena kɛ kilomɛtɛrɛ kɔnɔntɔn ye. Kabini o loon na, dugu nin tɔgɔ bena la ko: «Masaba b'o yɔrɔ la.»