Read dyu Ezekiyɛli ka kitabu 5 Bible Online

Ezekiyɛli ka kitabu 5 - dyu bible

Ezekiyɛli ka kitabu 5

¹«E kɔni, adamaden, murujan dadiman ta, k'o kɛ sɛrɛfe ye, k'i kuun n'i bonbosi li, k'o suma ni kilo ye k'o tilan.

²I ka kan ka tileda min kɛ ka dugu datuguko yira, n'o dafara, i be ta'a tilan sabanan kelen jɛni dugu cɛmancɛ la, k'a tilan kelen wɛrɛ ta ka to k'o tigɛtigɛ fɔɔ ka dugu lamini. A tilan sabanan dɔ nin, i b'o fili fɔɲɔ na. Ne be murujan ta ka tugu o kɔ.

³Nga, i ka dɔɔni ta k'o mara i ka jufa kɔnɔ,

⁴ka tila ka dɔ bɔ o la k'a don tasuma na k'a jɛni. Tasuma bena bɔ yen Isirayɛlidenw bɛɛ kama.

⁵«Ne Matigi, Masaba ko: Zeruzalɛmu filɛ. Ne tun y'a sigi siyaw cɛma, ka jamanaw kɛ k'a lamini.

⁶A kɔnɔ mɔgɔw murutira ne sago ma. U juguyara ka tɛmɛ siya wɛrɛw kan. U murutira ne ka sariyaw ma ka tɛmɛ u lamini jamanaw kan. Bari, u ma sɔn ne sago ma, u ma ne ka sariyaw bato.

⁷«O kama, ne Matigi, Masaba ko: Siya minw b'aw lamini na, aw ye ɲagamini kɛ ka tɛmɛ olu kan. Aw ma ne ka sariyaw bato, aw ma ne sagolakow kɛ. Aw murutira ka tɛmɛ aw lamini siya nunu kan.

⁸O la, ne Matigi, Masaba ko: Ne yɛrɛ be na aw kama, k'aw ɲaa gwan siya wɛrɛw ɲana.

⁹Aw ka konɔgɔninw bɛɛ kama, ne bena koo kɛ aw la, ne ma deli ka min kɛ, ne tena min ɲɔgɔn kɛ fana abada.

¹⁰ O senfɛ, faaw bena u deenw ɲimi dugu nin kɔnɔ, deenw fana bena u faaw ɲimi. Ne bena aw ɲaa gwan. Aw tɔɔ min bena to, ne bena o yɛrɛkɛ faan bɛɛ.

¹¹«O le y'a to, ne tɔgɔ kosɔn, ne Matigi, Masaba ko: Aw ye ne ka sigiyɔrɔ nɔgɔ n'aw ka kokuntanw ani aw ka konɔgɔninw bɛɛ ye minkɛ, ne bena aw halaki. Ne tena mɔgɔ si filɛ ka makari a la, n tena hinɛ fewu.

¹²Fɔɲɔbana, walima kɔngɔ bena aw tilan sabanan kelen faga dugu nin kɔnɔ. Aw tilan kelen fana bena faga ni murujan ye dugu lamini na. Ne bena tilan sabanan dɔ nin yɛrɛkɛ faan bɛɛ ka murujan bɔ ka tugu o kɔ.

¹³Aw ka tulogwɛlɛya kosɔn, ne bena n ka dimi yira aw la yɛrɛ le, ka n mɔnɛ bɔ. Aw ben'a lɔn ko ne ye Masaba ye, ko ne dimininba le kumana, o dimi bɛɛ bena bɔ aw la.

¹⁴«Ne bena aw ka yɔrɔ kɛ tomo ye, k'a kɛ maloyayɔrɔ ye aw lamini siyaw bɛɛ, ani tɛmɛbagaw bɛɛ ɲana.

¹⁵Ni ne dimininba y'aw ɲaa gwan k'aw sɔngɔ kosɔbɛ tuma min na, aw ka yɔrɔ bena kɛ maloyafɛn ni nɛnifɛn ye aw lamini siyaw fɛ. A bena kɛ sababu ye u be kabakoya ani ka hakili sɔrɔ. Ne Masaba le ko ten.

¹⁶«Ne bena aw tɔɔrɔ ni kɔngɔ ye k'aw halaki. Ne ben'a kɛ kɔngɔ be fariya aw ma, k'aw ka dumuniko gwɛlɛya.

¹⁷ Ne bena kɔngɔ ni kongosogow bila aw la k'aw deenw faga. Fɔɲɔbana ni mɔgɔfaga bena se aw fɛ. Ne bena murujan bila ka na aw kama. Ne Masaba le ko ten.»