Read dyu Ezekiyɛli ka kitabu 7 Bible Online

Ezekiyɛli ka kitabu 7 - dyu bible

Ezekiyɛli ka kitabu 7

¹Masaba kumana ne fɛ ko:

²«Adamaden, i tulo malɔ. Ne Matigi, Masaba b'a fɔra Isirayɛlidenw ye ko: Laban sera! Laban balawu be sera jamana faan naani bɛɛ la.

³Sisan kɔni, jamana halakituma sera. Ne bena n ka dimi yira aw la. Ne bena aw kiti ka kɛɲɛ n'aw ka kɛwaliw ye, k'aw ka kokolonw bɛɛ doni la aw kan.

⁴Ne tena mɔgɔ si filɛ ka makari a la, n tena hinɛ fewu. Ne bena aw ka kɛwaliw n'aw ka kokolonw bɛɛ juru sara aw la. O la, aw ben'a lɔn ko ne ye Masaba ye.»

⁵Matigi, Masaba ko: «Bɔnɛ min ɲɔgɔn ma deli ka ye, o bɔnɛ le be sera!

⁶Laban sera! Laban sera! A be sera aw kama! A sera ka ban!

⁷Jamana mɔgɔw, aw halakilon sera! Waati sera! Kitilon surunyana. Kuluw kan nisɔndiya mankan yɛlɛmana hakiliɲagamiko ye.

⁸Sisan yɛrɛ, ne bena n ka dimi bɔ aw la ka ne ka dusudimi bɛɛ bɔ aw la. Ne bena aw kiti ka kɛɲɛ n'aw ka kɛwaliw ye, k'aw ka kokolonw bɛɛ sara bɔ aw la.

⁹Ne tena makari aw la, ne tena hinɛ aw la. Ne bena aw sara ka kɛɲɛ n'aw ka kɛwaliw n'aw ka kokolonw ye. O tuma na, aw ben'a lɔn ko ne Masaba le bolo sera aw ma.

¹⁰Kitilon surunyana! Halakili be labɛnna. Fariya be jiidira, yɛrɛboɲa be yɔrɔ bɛɛ.

¹¹Fariya le kɛra mɔgɔjuguw ka bere ye. Siya nin cɛma, mɔgɔ si tena to, u ka nafolo si tena to yen, fɛɛn nafaman si tena to.

¹²Waati sera, kitilon sera ka ban. Tɔnɔ te sanni, walima feereli la tugu, bari ne bena n dimi bɔ jamana nin mɔgɔw bɛɛ la.

¹³Feerekɛbaga tena se ka jagofɛn sɔrɔ tugu, hali n'a tora nii na, bari yirali min kɛra jamana nin mɔgɔw bɛɛ halakiko kama, o tena yɛlɛma. U si tena se k'u yɛrɛ kisi, u ka kojuguw kosɔn.

¹⁴Hali n'u ye buru fiyɛ, ka fɛɛn bɛɛ labɛn, mɔgɔ si tena taga kɛlɛ la, bari ne diminin be jamana nin mɔgɔw bɛɛ kɔrɔ.

¹⁵«Murujan be cɛnni kɛ dugu kɔɔ kan, fɔɲɔbana ni kɔngɔ be fagali kɛ dugu kɔnɔ. Mɔgɔ min be kongo kɔnɔ, ale bena faga ni murujan ye. Min be dugu kɔnɔ, kɔngɔ ni fɔɲɔbana bena ale faga.

¹⁶Mɔgɔ minw kisira, olu bena boli i ko tubaninw ka taga kuluw yɔrɔ la. U kelen kelen bɛɛ bena ŋunan u ka kojuguw kosɔn.

¹⁷Mɔgɔw bɛɛ bolow barika bena dɛsɛ, u bɛɛ kunbiriw bena yɔgɔyɔgɔ.

¹⁸U bena dusukasifani don u jaa bena tigɛ. U ɲada cogo bena yɛlɛma maloya fɛ. U bɛɛ kuunw bena li.

¹⁹U bena u ka warigwɛ fili dugu bɔlɔnw na, u ka sanu bena kɛ fɛɛn nɔgɔnin ye. U ka warigwɛ n'u ka sanu tena se k'u kisi Masaba ka dimi loon na. Foyi tena se k'u ka kɔngɔ ban, k'u fa. Bari sanu ni warigwɛ kɛra u ka kojugu sababu ye.

²⁰U tun b'u yɛrɛ boɲa u ka masirifɛn ɲanamanw kosɔn, u y'u kɛ k'u ka joow dilan, u ka fɛnjugu nunu! O la, ne bena o kɛ fɛɛn nɔgɔnin ye u fɛ.

²¹Ne ben'a to lonanw k'u soɲa, ne ben'a to mɔgɔjuguw k'u ka nafolo bɔsi k'a nɔgɔ.

²²Ne bena n kɔɔ di u ma, u bena ne batoyɔrɔ nafolo marayɔrɔ nɔgɔ. Soonw bena don a kɔnɔ k'a nɔgɔ.

²³Jɔrɔkɔ dilan, bari jamana fanin be mɔgɔfagakow la, dugu fara benkannikow la.

²⁴Ne ben'a kɛ siyaw bɛɛ la juguman be na, u bena u ka boonw minɛ. Ne bena fangatigiw ka yɛrɛboɲakow ban, Isirayɛlidenw ka batolikɛyɔrɔw bena nɔgɔ.

²⁵U kɔnɔ bena gwan, u be hɛrɛ ɲini ka dɛsɛ.

²⁶Bɔnɛ bena fara bɔnɛ kan, kibarujugu bena fara kibarujugu kan. U bena kira ɲininga yiralikow la. Sarakalasebagaw tena foyi sɔrɔ ka mɔgɔ kalan, cɛkɔrɔbaw tena ladili kɛ tugu.

²⁷Masacɛ dusu bena kasi, faama jigi bena tigɛ, jamanadenw bolo bena yɛrɛyɛrɛ jatigɛ fɛ. Ne bena u sara ka kɛɲɛ n'u tagamacogo ye, ne bena u kiti ka kɛɲɛ n'u ka kiti tigɛcogo ye. O tuma na, u ben'a lɔn ko ne ye Masaba le ye.»