Read dyu Daniyɛli ka kitabu 1 Bible Online

Daniyɛli ka kitabu 1 - dyu bible

Daniyɛli ka kitabu 1

¹ Zuda mara masacɛ Yoyakimu ka masaya saan sabanan na, Babilɔni masacɛ Nabukodonozɔri nana Zeruzalɛmu dugu datugu.

² Matigi ye Zuda mara masacɛ Yoyakimu don a bolo, ani Alabatoso kɔnɔ minan dɔw fana. A tagara n'u ye a ka jobon kɔnɔ Sineyari jamana na k'u bila a ka jobon kɔnɔ nafolobilayɔrɔ la.

³A y'a fɔ a ka baaradenw ɲamɔgɔ Asipenazi ye ko a ka mɔgɔ damani woloma Isirayɛlidenw cɛma ka bɔ masalu ani mɔgɔbaluw kɔnɔ ka na n'u ye.

⁴Ko u ka kɛ kanbelenw ye, fiɲɛ te minw na, u ka kɛ kanbelenɲumanɲumanw ye, minw ye hakilitigiw, ni kolɔnbagaw ye, n'u be koo faamu, u ka kɛ barikatigiw ye waasa ka to masacɛ ka luu kɔnɔ, u k'u kalan Babilɔnikaw ka kaan na, n'u ka sɛbɛncogo la.

⁵Masacɛ y'a fɔ ko ale ka dumuni, n'a ka minnifɛn dɔ le ka kan ka di u ma loon o loon, ani k'u kalan fɔɔ saan saba, n'o dafara, u bena sɔrɔ ka baara kɛ ale masacɛ ye.

⁶O mɔgɔ nunu cɛma, Zuda kɔmɔgɔw kanbelen dɔw tun be yen: Daniyɛli, ni Ananiya, ni Mikayɛli ani Azariya.

⁷Baaradenw ɲamɔgɔ ye tɔgɔkura la u kan. A ye Daniyɛli wele ko Bɛlitasari, ka Ananiya wele ko Sadiraki, ka Mikayɛli wele ko Mesaki, ka Azariya wele ko Abɛdenego.

⁸Daniyɛli y'a ŋaniya ta ko ale ten'a yɛrɛ nɔgɔ ni masacɛ ka dumuni, n'a ka duvɛn ye. O la, a ye baaradenw ɲamɔgɔ daali ko a kana ale wajibiya a k'a yɛrɛ nɔgɔ n'o fɛɛn nunu ye.

⁹Ala ye Daniyɛli koo diya ɲamɔgɔ nin ye, a makaril'a la.

¹⁰O bɛɛ n'a ta, a y'a fɔ Daniyɛli ye ko: «Masacɛ an matigi min y'aw ka dumuniko latigɛ, ne be siran ale ɲa. N'a nan'a kɔlɔsi k'a ye ko aw fasanin lo ka tɛmɛ aw *filankuru tɔw kan, ne kuun le bena to a la.»

¹¹Ɲamɔgɔ nin tun ye Daniyɛli, ni Ananiya, ni Mikayɛli ani Azariya ka koo don cɛɛ min bolo, Daniyɛli y'a fɔ ale ye ko:

¹²«Ne b'i daali, i ka to ka ɲugu ni jii gwansan d'an ma, k'an filɛ yanni tile tan.

¹³O kɔ, kanbelen minw be masacɛ ka dumuni dumu, i ka olu ɲada filɛ, k'anw ta filɛ. N'i ye fɛɛn min ye a la, min ka d'i ye, i k'o kɛ i ka jɔɔnw na.»

¹⁴U ye koo min ɲini a fɛ, a sɔnna, a y'o kɛ k'a filɛ fɔɔ tile tan.

¹⁵O dafara tuma min na, u y'a kɔlɔsi k'a ye k'u ɲaa tun be manamana ka tɛmɛ kanbelen tɔ nunu kan. U boɲana ka tɛmɛ masacɛ ka dumuni ɲɔgɔn dumubaga nunu kan.

¹⁶Kabin'o tuma na, dumuni ani duvɛn min tun ka kan ka di u ma, u ka koo tun be cɛɛ min bolo, ale tun t'o dira u ma tugu, a tora ka ɲugu d'u ma o nɔɔ na.

¹⁷Ala ye sɛbɛ sifa bɛɛ lɔnniya di kanbelen mɔgɔ naani nunu ma, ni faamuli ani hakilitigiya. Daniyɛli tun be yelifɛn, ni siko bɛɛ kɔrɔ lɔn.

¹⁸Masacɛ Nabukodonozɔri ye loon min latigɛ waasa u ka na ni kanbelen nunu ye a fɛ, o loon nana se, baaradenw ɲamɔgɔ tagara n'u ye a fɛ.

¹⁹A ye baro kɛ n'u ye. Kanbelen nunu bɛɛ la, a ma Daniyɛli, ni Ananiya ni Mikayɛli ani Azariya ɲɔgɔn ye. O la, u donna masacɛ ka baara la.

²⁰Masacɛ tun y'u ɲininga koo o koo la, lɔnniya, ni faamuli faan fɛ, a y'a ye k'u tɛmɛn'a ka jamana kɔnɔ jotigiw ni lagwɛlikɛlaw bɛɛ kan siɲɛ tan.

²¹Daniyɛli tora ten masacɛ ka luu kɔnɔ fɔɔ Sirusi sigira masaya la saan min na.