Read dyu Daniyɛli ka kitabu 11 Bible Online

Daniyɛli ka kitabu 11 - dyu bible

Daniyɛli ka kitabu 11

¹Ne y'ale dɛmɛ kosɔbɛ mɛdicɛ Dariyusi ka masaya saan fɔlɔ la.

²Sisan, ne bena tiɲɛ min fɔ i ye, o filɛ: «Ayiwa, masacɛ saba dɔ wɛrɛw bena sigi Pɛrɛsi kunna. Naaninan bena nafoloba sɔrɔ ka tɛmɛ tɔw kan. N'a ka nafolo nana barika don a la tuma min na, a bena koo bɛɛ kɛ ka kɛlɛ wili Gɛrɛsi masacɛ kama.

³Kɛlɛmasa dɔ bena kɛ jamanaba dɔ ka masa ye. Koo min man'a diya, a bena o le kɛ.

⁴N'a ye barika sɔrɔ tuma min na, a ka mara bena cɛn. A bena tilan diɲɛ faan naani cɛ. Kɔmɔgɔ tena sɔrɔ a fɛ min b'a nɔɔ ta. Fanga min tun b'a fɛ, a kɔmɔgɔ nunu ta tena o bɔ, bari, a ka mara bena tilan mɔgɔ wɛrɛw cɛ.

⁵«Worodugu ɲafan masacɛ bena fanga sɔrɔ. Nga a ka ɲamɔgɔw dɔ bena barika sɔrɔ ka tɛmɛ ale kan. Barika bena kɛ a ka fanga la kosɔbɛ.

⁶Saan damani kɔ, u bena bɛn. Worodugu ɲafan masacɛ denmuso bena taga furu kɔgɔdugu ɲafan masacɛ fɛ, waasa u ka bɛn. Nga muso nin ka koo tena taga ɲa. A cɛɛ n'u deen tena to sii la. U ben'a yɛrɛ faga, n'a ka mɔgɔw, n'a facɛ, n'a cɛɛ.

⁷«A kɔmɔgɔ dɔ bena wili a kɔ k'a nɔɔ ta. Ale bena taga kɔgɔdugu ɲafan masacɛ ka kɛlɛbolo kama ka don u ka dugu fariman kɔnɔ. A bena u kɛlɛ ka se u kɔrɔ.

⁸A bena u ka batofɛn nigɛlamanw ta, n'u ka minansɔbɛw, warigwɛlaman ni sanulamanw, ka taga n'u ye Ezipiti jamana na. Ale ni kɔgɔdugu ɲafan fɛ masacɛ tena se ɲɔgɔn ma tugu saan damani kɔnɔ.

⁹O tɛmɛnin kɔ, kɔgɔdugu ɲafan masacɛ bena taga worodugu ɲafan masacɛ kɛlɛ. O kɔ, a bena segi a ka jamana na.

¹⁰A deenw bena kɛlɛ labɛn. U bena jamaba lajɛn. U kelen bena taga u juguw kama n'a ka kɛlɛdenw ye. U bena taga don jamana nin kɔnɔ i n'a fɔ baa min fara ka yɛrɛkɛ. U kɔsegitɔ bena u juguw ka dugu fariman dɔ kɛlɛ.

¹¹«Worodugu ɲafan fɛ masacɛ dimininba bena bɔ ka kɛlɛ kɛ ni kɔgɔdugu ɲafan fɛ masacɛ ye, ale bena jamaba lajɛn a kama, nga a bena se jamaba nin kɔrɔ.

¹²A senin kɔ u kɔrɔ, a ben'a yɛrɛ boɲa. A kɔni bena mɔgɔ caaman faga. Nga a tena see sɔrɔ.

¹³Kɔgɔdugu ɲafan fɛ masacɛ bena kɛlɛbolo wɛrɛ labɛn, min jama ka bon ni fɔlɔta ye. Saan damani tɛmɛnin kɔ, a bena na n'a ka kɛlɛboloba nin ye, ni kɛlɛkɛminan caaman.

¹⁴«O waati la, mɔgɔ caaman bena wili worodugu ɲafan masacɛ kama. Hali e ka siya cɛma, mɔgɔ farimanw fana bena muruti a ma, waasa koo yirata nin ka kɛ. Nga u bena dɛsɛ.

¹⁵Kɔgɔdugu ɲafan masacɛ bena n'a ka kɛlɛdenw sigi ka dugu barikaman dɔ datugu k'a minɛ. Worodugu ɲafan masacɛ ka kɛlɛdenŋanaw yɛrɛ tena se ka lɔ. U si tena fanga sɔrɔ ka lɔ.

¹⁶Kɛlɛtigɛla nin ben'a sago kɛ, mɔgɔ si tena se ka lɔ a ɲa. A bena taga sigi jamana diman na, min ka di ni jamanaw bɛɛ ye. O y'a sɔrɔ a ye cɛnni kɛ ka tɛmɛ.

¹⁷A ben'a fɔ ko ale bena hɛrɛ ɲini n'a ka jamana ka fanga ye. A ben'a denmuso di worodugu ɲafan masacɛ ma furu la, waasa k'a ka fanga nagasi. Nga o namarako nin tena ɲa a bolo.

¹⁸O kɔ, a ben'a ɲaa sin jii cɛma dugukolow la k'u caaman minɛ. Nga kɛlɛmasa dɔ le ben'a ka yɛrɛboɲako ban, k'a ka koo kɛninw juru sara a la.

¹⁹O kɔ, a ben'a ɲaa sin a yɛrɛ ka jamana dugu barikamanw faan fɛ. Nga dɛsɛ fɛ, a tena se ka foyi kɛ. A bena to a la, a koo tena mɛn tugu.

²⁰«A nɔtabaga bena mɔgɔ dɔ ci ka na ben jamana ka yɔrɔba kan. Nga tile damani tɛmɛnin kɔ, o masacɛ nin bena halaki. O saya nin tena kɛ jama ka murutili kosɔn, a tena faga kɛlɛyɔrɔ la.

²¹«Mɔgɔw te mɔgɔ min jati, ani k'a boɲa i n'a fɔ masa, ale lo bena sigi a nɔɔ na. Mɔgɔw be hɛrɛ la tuma min na, ale bena bari ka na fanga ta o waati la, n'a ka dibidibikow ye.

²²Kɛlɛden minw yɛrɛkɛra, a bena olu halaki pewu! A bɛnna ni minw ye, a bena olu ɲamɔgɔ dɔ faga.

²³A bena bɛn ni dɔw ye. O kɔ, a bena to ka janfa kɛ fɔɔ a ka fanga be to ka boɲa ka taga, k'a sɔrɔ a kɔmɔgɔw man ca.

²⁴Mɔgɔw be hɛrɛ la tuma min na, a bena taga jamana yɔrɔɲuman na ka koo kɛ, a faaw ma se ka min ɲɔgɔn kɛ. A bena na ben o yɔrɔ mɔgɔw kan k'u ka minanw n'u ka nafolow tilan a ka mɔgɔw cɛ. A bena dugu barikaman dɔw kɛlɛko jati minɛ, nga o ye waati dɔɔni koo ye dɔrɔn.

²⁵«A bena wili n'a barika, ni dusugwɛlɛya ye ka bila kɛlɛboloba dɔ ɲa, ka taga worodugu ɲafan masacɛ kama. Ale fana bena wili ni kɛlɛboloba ye min jama ka ca haali, barika b'u la kosɔbɛ. Nga, olu tena se. Bari, namara caaman bena kɛ u la.

²⁶Masacɛ ka mɔgɔw yɛrɛ le ben'a janfa. A ka kɛlɛbolo bena nagasi, u caaman bena sa kɛlɛ la.

²⁷Masacɛ fila nunu bena sigi dumuni kelen kunna. U kɔnɔ finnin bena galon tigɛ ɲɔgɔn ye. Nga u ka kolatigɛninw tena u si nafa, bari labanlon min sigira, o bena se a waati la.

²⁸A kɔsegitɔ a ka jamana na, kɔgɔdugu ɲafan masacɛ bena segi ni nafolo caaman ye. Ala bɛnna ni jama min ye, a tɛmɛtɔ bena wili olu kama k'u kɛlɛ, ka sɔrɔ ka ta'a ka jamana kɔnɔ.

²⁹«Ni waati sera, a bena kɔsegi ka taga worodugu ɲafan kɛlɛ. Nga o ni fɔlɔta tena kɛ kelen ye.

³⁰Kitimukaw bena na kurunw kɔnɔ k'a kɛlɛ. A fari bena faga. A bena segi. Dimikojugu fɛ, Ala bɛnna ni jama min ye, a bena olu kɛlɛ. A bena duu siri ni olu dɔw ye minw tilennin te Masaba ka koo la.

³¹ Alabatoso be dugu barikaman min kɔnɔ, a bena kɛlɛdenw bila ka na o ɲagami, saraka min be bɔ loon o loon, k'o koo ban. A bena fɛnjugu cɛnnikɛla bila sarakabɔyɔrɔ kan.

³²Mɔgɔ minw bɛnna ni Ala ye, a bena olu cɛma janfaciw sɔrɔ n'a ka namara ye. Nga minw b'u ka Ala lɔn, olu bena to kantigiya la.

³³«Minw ye hakilitigiw ye u cɛma, olu bena mɔgɔ caaman kalan. Nga waati dɔ la, u bena u dɔw faga ni murujan ye, ka dɔw jɛni, ka dɔw minɛ jɔnya la, ka dɔw bololafɛnw ta.

³⁴O tɔɔrɔ waati la, u bena dɛmɛ dɔɔni dama sɔrɔ. Bari mɔgɔ caaman bena fara u kan minw kɔnɔ gwɛnin tɛ.

³⁵Hakilitigi nunu dɔw bena sa, janko mɔgɔ dɔw ka koo be yɛlɛma, u be saniya, u be kɛ jalakibaliw ye fɔɔ ka taga se laban waati ma. Bari o loon bena se a sewaati la.

³⁶ «Koo o koo ye masacɛ nin diya, a ben'o le kɛ. A ben'a yɛrɛ boɲa! O yɛrɛboɲa nin na, a ben'a yɛrɛ fisaya ni batofɛnw bɛɛ ye. Ala min ka bon ni batofɛn bɛɛ ye, a bena kabakokuma fɔ ale kama. A ka koo bena taga ɲa fɔɔ ka taga se Ala ka dimi danyɔrɔ la. Bari, min latigɛra, o bena kɛ cɔ!

³⁷Masacɛ nin ten'a faaw ka joow boɲa, joo min koo ka di musow ye, a fana tena o boɲa, walima batofɛn wɛrɛ si. A ben'a yɛrɛ boɲa ni batofɛnw bɛɛ ye.

³⁸Nga a bena dugu barikamanw ka joo dɔ bato u nɔɔ na, a faaw tun ma min lɔn. A bena ale sɔn ni sanu ye, ni warigwɛ, ni kabakuru sɔngɔgwɛlɛnw, ani minan wɛrɛw, minw sɔngɔ ka gwɛlɛ.

³⁹Lonanw ka joo nin sababu la, a bena dugu barikamanw kɛlɛ. Minw mana sɔn o joo nin na, a bena boɲa la olu kan, k'u kɛ kuntigiw ye jamaba kunna, ani ka forow tilan u cɛ k'o kɛ u ka tɔnɔ ye.

⁴⁰«Ni laban waati sera, worodugu ɲafan fɛ masacɛ bena kɛlɛ daminɛ n'a ye. Nga kɔgɔdugu ɲafan fɛ masacɛ bena girin a kan ni kɛlɛkɛwotorow ye, ni sotigiw, ani kurun caaman ye. U bena yɛrɛkɛ ka taga don jamana caaman na i n'a fɔ baa min fara ka yɛrɛkɛ.

⁴¹Jamana min ka di ni jamanaw bɛɛ ye, a bena se yen. Mɔgɔ caaman nii bena to a la. Nga edɔmuw, ni mowabuw bena kisi, ani amoniw ɲamɔgɔw.

⁴²A ben'a ka fanga la jamana caaman kan. Hali Ezipiti jamana yɛrɛ tena kisi.

⁴³Ezipiti nafolo, sanu, warigwɛ ni minan sɔngɔgwɛlɛnw bɛɛ bena kɛ masacɛ nin ta ye. Libi, ni Etiyopi jamana bena kɛ a bolo.

⁴⁴Nga kibaruyaw bena bɔ kɔrɔn fɛ, ni kɔgɔdugu ɲafan fɛ ka n'a hakili ɲagami. A dimininba bena bɔ ka taga mɔgɔ caaman nii bɔ.

⁴⁵A ben'a ka fanisow lɔ kɔgɔji ni kulu nɔɔrɔman senuman furancɛ la. Saya bena bari a la o yɔrɔ la, dɛmɛbaga si tena sɔrɔ a la.»