Read dyu Daniyɛli ka kitabu 12 Bible Online

Daniyɛli ka kitabu 12 - dyu bible

Daniyɛli ka kitabu 12

¹ Mɛlɛkɛ y'a fɔ ne ye tugu ko: «O waati la, mɛlɛkɛw kuntigiba Misɛli bena bɔ. Ale min ye i ka siya marabaga ye. O bena kɛ waatigwɛlɛn ye dɛ! Kabini siyako daminɛ, fɔɔ ka n'a bila a bɔwaati la, o bɔɲɔgɔnko ma ke ka ye. Nga o waati la sa, i ka siya fɛɛn o fɛɛn tɔgɔ mana ye Ala ka sɛbɛ kɔnɔ, olu bɛɛ bena kisi.

² O tuma na, mɔgɔ caaman minw be sinɔgɔra bɔgɔ jukɔrɔ, olu bena kunun. U dɔw niyɔrɔ bena kɛ nii banbali ye, dɔw ta bena kɛ maloyaba ye min te ban.

³Minw ye lɔnnikɛlaw ye, ani minw be mɔgɔw kalan tilenninya la, olu ka koo bena ɲa kosɔbɛ, u bena manamana tuma bɛɛ i n'a fɔ lolow.

⁴ Ele Daniyɛli kɔni ka kuma nin kɛ gundo ye. I kana sɛbɛ nin kɔnɔnakuma fɔ mɔgɔ si ye fɔɔ laban waati ka se. Mɔgɔ caaman ben'a kalan ka hakili sɔrɔ.»

⁵Ne Daniyɛli kɔni tun b'o koow filɛli la, ne ye mɔgɔ fila wɛrɛ ye. Kelen tun be baa faan dɔ la, kelen be faan dɔ nin na.

⁶Cɛɛ min lɔnin tun be baji sanfɛ, ni faniɲuman b'a kaan na, mɔgɔ fila nunu kelen y'ale ɲininga ko: «Kabako nunu bena kɛ ka ban tuma jumɛn?»

⁷ Faniɲumantigi min tun lɔnin be baji sanfɛ, ne y'ale kaan mɛn. A y'a kinibolo, n'a numanbolo kɔrɔta sanfɛ ka kali ko: «Ala kama! Ale min be yen tuma bɛɛ, koo minw be kɛra, o bena kɛ fɔɔ saan saba ni tilan. Ni Ala ka jama barika dɛsɛra pepewu tuma min na, koo nunu bɛɛ bena kɛ ka ban o tuma na le.» [1]

⁸Ne Daniyɛli kɔni tun be kuma nunu mɛnna. Nga ne tun ma u faamu. O la, ne ye ɲiningali kɛ ko: «N matigi, o koo nunu bɛɛ bena laban cogo di?»

⁹A ye ne jaabi ko: «Daniyɛli, taga, o kuma nunu ka kan ka to dogo la, u man kan ka mɛn, fɔɔ laban waati ka se.

¹⁰ Mɔgɔ caaman bena saniya, u be kɛ jalakibaliw ye, u ka koo be yɛlɛma. Mɔgɔjuguw bena taga n'u ka juguya ye ɲa, u si tena foyi faamu. Nga hakilitigiw kɔni bena faamuli kɛ.

¹¹ Saraka min be bɔ Ala ye loon o loon, k'a ta ale dabilawaati ma, ani fɛnjugu cɛnnikɛla bilawaati la, tile waa kelen ni kɛmɛ fila ni bi kɔnɔntɔn (1 290) le bena tɛmɛ.

¹²Mɔgɔ min bena muɲu fɔɔ ka se tile waa kelen ni kɛmɛ saba ni bi saba ni duuru (1 335) ma, o tigi bena dagamu.

¹³Ele kɔni, banba fɔɔ a daan na. I bena lafiɲɛ, o kɔ, i bena wili labanlon na k'i ka sara sɔrɔ.»