Read dyu Daniyɛli ka kitabu 2 Bible Online

Daniyɛli ka kitabu 2 - dyu bible

Daniyɛli ka kitabu 2

¹Nabukodonozɔri ka masaya saan filanan na, a ye siko dɔw kɛ minw y'a hakili ɲagami, ka sinɔgɔ tigɛ a ɲaa na pewu.

² O la, a ye cii bila ka jotigiw wele, ni lagwɛlikɛlaw, ni subagaw, ani sankolo kan taamasiɲɛlɔnbagaw, waasa u ka siko nunu kɔrɔ fɔ ale ye. U nana lɔ masacɛ ɲafɛ.

³A y'a fɔ u ye ko: «Ne ye siko dɔ kɛ, ne hakili ɲagaminin lo a kɔrɔ la.»

⁴Sankolo kan taamasiɲɛlɔnbagaw ye masacɛ jaabi aramekan [1] na ko: «Masacɛ, Ala ka sijan d'i ma! I ka siko ɲafɔ e ka jɔɔnw ye, an ben'a kɔrɔ fɔ i ye.»

⁵Masacɛ y'a fɔ u ye ko: «Ne y'a ŋaniya ta ko n'aw ma ne ka siko nin ɲafɔ ne ye, ani k'a kɔrɔ fɔ, aw be faga ka tigɛtigɛ, aw ka soow be kɛ ɲamaɲama filiyɔrɔ ye.

⁶Nga n'aw ye siko nin, n'a kɔrɔ fɔ, ne bena aw sɔn fɛɛn caaman na, ani ka lɔyɔrɔbabaw d'aw ma. Ayiwa, aw ye ne ka siko n'a kɔrɔ fɔ n ye.»

⁷U y'a jaabi tugu ko: «Masacɛ k'a ka siko ɲafɔ a ka jɔɔnw ye, an ben'a kɔrɔ fɔ i ye.»

⁸Masacɛ y'a fɔ u ye ko: «Ne y'a ye tiɲɛ na ko aw b'a fɛ ka cogo le ɲini waasa ka n jaabi. Bari aw y'a ye ko ne y'a latigɛ sɔbɛ la ko

⁹n'aw ma siko nin ɲafɔ n ye, koo kelen le bena aw bɛɛ sɔrɔ. Aw ye ɲɔgɔn ye waasa ka galon tigɛ ka ne namara sanni yɛlɛmani ka don koow la. Ayiwa, aw ka siko nin ɲafɔ ne ye. Ne ben'a lɔn ko aw be se k'a kɔrɔ fɔ ne ye.»

¹⁰Sankolo kan taamasiɲɛlɔnbagaw ye masacɛ jaabi ko: «Masacɛ be min fɛ, mɔgɔ te dugukolo kan min be se k'o kɛ. Masa si te yen, hali n'a ka fanga ka bon ni see b'a ye cogo o cogo, min be nin koo nin ɲɔgɔn ɲini jotigiw, ni lagwɛlikɛlaw ani sankolo kan taamasiɲɛlɔnbagaw fɛ.

¹¹Masacɛ be min ɲinina, o ka gwɛlɛ kojugu. Batofɛn minw te adamadenw cɛma, ka olu niin bɔ a la, mɔgɔ te yen min be se k'a jaabi di masacɛ ma.»

¹²O yɔrɔ la, masacɛ dimina kosɔbɛ. A y'a fɔ k'u ka Babilɔni lɔnnikɛlaw bɛɛ faga.

¹³U ye masacɛ ka darakan wango la ko lɔnnikɛla nunu bena faga. U ye Daniyɛli n'a tɔɲɔgɔnw fana yɔrɔ ɲini janko k'u faga.

¹⁴Daniyɛli kumana masacɛ kɔlɔsibagaw ɲamɔgɔ Ariyɔki fɛ ka ɲa ni hakilitigiya ye. Ale lo tun bɔra waasa ka Babilɔni lɔnnikɛlaw faga.

¹⁵Daniyɛli y'a ɲininga ko: «Ee! A do kɛra di masacɛ ye kogwɛlɛn nin ɲɔgɔn latigɛ?» O tuma na, Ariyɔki ye koo nin ɲafɔ Daniyɛli ye.

¹⁶O la, Daniyɛli tagara masacɛ daali ko a ka muɲu ale bena siko nin kɔrɔ fɔ a ye.

¹⁷O kɔ, Daniyɛli bɔra ka taga soo, a ye koo nin ɲafɔ a tɔɲɔgɔn Ananiya ni Mikayɛli ani Azariya ye,

¹⁸k'u ka Sankolotigi Ala daali a ka makari u la, k'u dɛmɛ u ka se ka kodogonin nin kɔrɔ lɔn, janko u kana ale Daniyɛli n'a tɔɲɔgɔnw faga ni Babilɔni lɔnnikɛla tɔw ye.

¹⁹O la, koo nin yirala Daniyɛli la sufɛ siko la. A ye barika la Sankolotigi Ala ye

²⁰ko: «Ala tɔgɔ ka tanu tuma bɛɛ. Bari lɔnniya ni fanga y'a ta ye.

²¹Ale lo be koow n'u waatiw yɛlɛmayɛlɛma. Ale lo be masaw sigi masaya la, ale lo b'u bɔ a la fana. Ale lo be lɔnniya di lɔnnikɛlaw ma, ka faamuli di hakilitigiw ma.

²²Ale lo be kodogonin yira, koo minw kɔrɔ ka dun, ale lo b'o yira. Ale lo be dibikɔnɔko lɔn. Ale ka yɔrɔ ye kɛnɛ ye.

²³N bɛmaw ka Ala, ne b'i fo k'i waleɲuman lɔn. Bari i ye lɔnniya ni fanga di ne ma. An tun ye min ɲini e fɛ, i y'o yira ne la. I ye masacɛ ka koo yira an na.»

²⁴O kɔ, masacɛ tun y'a fɔ Ariyɔki min ye ko a ka Babilɔni lɔnnikɛlaw faga, Daniyɛli tagara ale fɛ k'a fɔ a ye ko: «I kana Babilɔni lɔnnikɛlaw faga. A to an be don masacɛ fɛ, ne bena siko nin kɔrɔ fɔ a ye.»

²⁵Ariyɔki teliyara ka don ni Daniyɛli ye masacɛ fɛ k'a fɔ a ye ko: «Masacɛ, mɔgɔ minw minɛna Zuda mara la ka na, ne ye cɛɛ dɔ sɔrɔ olu cɛma min be se k'i ka siko kɔrɔ fɔ i ye.»

²⁶Masacɛ ye Daniyɛli ɲininga, u be min wele ko Bɛlitasari, ko: «Yala, ne ye siko min kɛ, i be se k'o fɔ ne ye wa, a n'a kɔrɔ?»

²⁷Daniyɛli y'a jaabi ko: «Masacɛ be kodogonin min lɔnko ɲinina, lɔnnikɛla, ni lagwɛlikɛla, ni jotigi ani kirisitigi si te yen min be se k'o fɔ i ye.

²⁸Nga, Ala min be sankolo la, n'a be kodogoninw yira, a ye koo nata yira masacɛ Nabukodonozɔri la. I ka siko, n'i ye fɛɛn minw ye k'i to i ka dilan kan, o filɛ nin ye:

²⁹Masacɛ, k'i to i ka dilan kan, i ka miiriya sera fɛɛn min ma, o ye koo nata le ye. Koo min bena kɛ, kodogoninw yirabaga y'o le yira i la.

³⁰Kodogonin nin yirala ne la kɔni, a ma kɛ ko ne ye lɔnnikɛla ye ka tɛmɛ mɔgɔ tɔw kan dɛ. Nga o kɛra, waasa mɔgɔ ka sɔrɔ min ben'a kɔrɔ fɔ i ye, janko i ye koo min miiri e kɔnɔ, i ka se k'o faamu.

³¹«Masacɛ, k'i to filɛli la, i ye mɔgɔja belebele dɔ ye i ɲakɔrɔ! Jaa belebeleba! A tun be manamana kosɔbɛ! A be siranya bila mɔgɔ la.

³²Jaa nin kungolo tun ye sanu yɛrɛyɛrɛ ye. A disi n'a bolow tun ye warigwɛ ye. A kɔnɔbara n'a wotow tun ye zira ye.

³³A senkalaw tun ye nigɛ ye. A sentigɛw yɔrɔ dɔ tun ye nigɛ ye, dɔ ye bɔgɔ jɛninin ye.

³⁴K'i to a filɛli la, kabakuru dɔ bɔra kulu kan ka n'a sentigɛw gosi, min ye nigɛ ni bɔgɔ ye, k'a bɛɛ mugumugu! Mɔgɔ si tun ma maga kabakuru nin la.

³⁵O la, a yɔrɔ min ye nigɛ ye wo, bɔgɔ wo, zira wo, warigwɛ wo, sanu wo, a bɛɛ mugumugura ɲɔgɔn fɛ, ka kɛ i n'a fɔ sumanɲaga. Fɔɲɔ y'a bɛɛ ta ka taga, hali a nɔɔ ma ye. Nga kabakuru min tun ye jaa nin gosi, ale boɲana ka kɛ kuluba ye ka dugukolo bɛɛ fa.

³⁶«Masacɛ ka siko ye o le ye. An ben'a kɔrɔ fɔ masacɛ ye sisan.

³⁷Ele, masacɛ! Masaw ka masa! Sankolotigi Ala ye masaya d'i ma, ka setigiya ni fanga ani tɔgɔba d'i ma.

³⁸A ye adamadenw don i bolo, ni kongosogow ani kɔnɔw, u mana to yɔrɔ o yɔrɔ. A y'i kɛ u bɛɛ tigi ye. E lo ye kungolo sanulaman nin ye.

³⁹Ele kɔ, masa wɛrɛ bena wili min ka fanga tena i ta bɔ. O kɔ, sabanan bena wili, ale ye zira ta nin ye, min bena diɲɛ bɛɛ mara.

⁴⁰O kɔ, masa naaninan bena wili, ale bena barika sɔrɔ i n'a fɔ nigɛ be cogo min na. Nigɛ be fɛɛn bɛɛ ci ani k'u mugumugu cogo min na, a bena masa tɔɔ nunu bɛɛ kɛ o cogo kelen na.

⁴¹I ye jaa nin sentigɛ, n'a senkunnadenw ye, olu tun ye bɔgɔjɛninin ni nigɛ ye. O b'a yira k'o mara nin bena tilan. Yɔrɔ dɔ bena barika sɔrɔ i n'a fɔ nigɛ, i n'a fɔ i y'a ye cogo min na, nigɛ ni bɔgɔ ɲagaminin be ɲɔgɔn na.

⁴²A senkunnadenw tun ye nigɛ ni bɔgɔjɛninin ye minkɛ, o b'a yira ko fangayɔrɔ ni dɛsɛyɔrɔ b'o fanga nin na.

⁴³I ye nigɛ ni bɔgɔjɛninin ɲagaminin ye ɲɔgɔn na cogo min na, o cogo kelen la, masaw bena jɛn furu barika la. Nga o jɛɛn nin tena fanga sɔrɔ, bari nigɛ ni bɔgɔ te ɲɔgɔn minɛ.

⁴⁴«Ayiwa, o masa nunu ka tile la, Sankolotigi Ala ben'a kɛ masacɛ wɛrɛ be wili min ka masaya tena nagasi abada, a ka masaya tena bɔ a bolo ka di siya wɛrɛ ma. Ale bena masa tɔ nunu bɛɛ ka koo nagasi ka ban pewu. Ale bena to a ka masaya la tuma bɛɛ.

⁴⁵O la, i ye kabakuru ye min bɔra kulu kan mɔgɔ bolo ma maga min na, ka na nigɛ, ni zira, ni bɔgɔ, ni warigwɛ ani sanu mugumugu. Ala, min ka bon, a ye koo nata yira ele masacɛ la. Siko nin ye tiɲɛ ye. Mɔgɔ ka kan ka la a kɔrɔ la.»

⁴⁶O la, masacɛ Nabukodonozɔri y'a kunbiri gwan k'a ɲaa biri duguma Daniyɛli kɔrɔ k'a boɲa. A y'a fɔ k'u ka saraka bɔ Daniyɛli ye, ani ka wusulan jɛni a ye.

⁴⁷Masacɛ y'a fɔ a ye ko: «Tiɲɛ na, aw ka Ala ka bon ni batofɛnw bɛɛ ye, masaw ka Masa lo. Kodogoninw yirabaga lo. Bari, i y'o koo kodogonin nin yira ne la.»

⁴⁸O kɔ, masacɛ ye Daniyɛli kɛ mɔgɔbaba ye, ka fɛɛn barikaman caaman d'a ma, k'a sigi Babilɔni mara bɛɛ kunna, ani k'a kɛ Babilɔni lɔnnikɛlaw bɛɛ ɲamɔgɔba ye.

⁴⁹Daniyɛli y'a ɲini masacɛ fɛ ko a ka Babilɔni mara ka koow ɲamɔgɔya kalifa Sadiraki ni Mesaki ani Abɛdenego ma. Masacɛ sɔnna. Daniyɛli yɛrɛ tora masacɛ ka luu kɔnɔ.