Read dyu Daniyɛli ka kitabu 8 Bible Online

Daniyɛli ka kitabu 8 - dyu bible

Daniyɛli ka kitabu 8

¹Masacɛ Balitazari ka masaya saan sabanan na, ne Daniyɛli ye yelifɛn dɔ ye fɔlɔta tɛmɛnin kɔ.

²Ne ye min ye, o filɛ: Ka n to filɛli la, n ye n yɛrɛ ye Suzi dugu kɔnɔ. Min ye Elamu jamana ka masadugu ye. Ka n to o la, n ye n yɛrɛ ye Ulayi baa daa la.

³N ko n be filɛli kɛ, n ye sagajigi dɔ lɔnin ye baji daa la, a gɔɔnw tun ka janjan. Nga a gɔɔn kelen tun ka jan ni kelen ye. Min ka jan, ale lo bɔra kɔfɛ.

⁴Sagajigi nin tun be tufari kɛ n'a gɔɔnw ye tileben, ni kɔgɔdugu ɲafan na, ani worodugu ɲafan fɛ. Sogo si tun te se ka lɔ a ɲa, mɔgɔ si tun te se k'u bɔsi a fɛ. Koo min tun ka d'a ye, a tun b'o le kɛ. A fana tun be see sɔrɔla ka taga.

⁵Ka n to o koo jatiminɛ na, bakɔrɔnin dɔ bɔra tileben fɛ ka na, a be yɔrɔ bɛɛ yaalala, a seen te dugukolo kan. Gɔɔn kabakoman kelen le tun be bakɔrɔnin nin ɲaa fila cɛ.

⁶A nana se sagajigi gɔɔn fila tigi nin ma, ne tun ye min ye bada la. A girinna k'a sɛgɛrɛ n'a fanga bɛɛ ye.

⁷A gwɛrɛl'a la tuma min na, a dimin'a kɔrɔ kosɔbɛ. A y'a tufa k'a gɔɔn fila kari. Sagajigi ma fanga sɔrɔ ka lɔ a ɲa. A y'a ta k'a ben, k'a dɔn. Mɔgɔ si ma sɔrɔ min be se k'a bɔsi a fɛ.

⁸Bakɔrɔnin nin boɲana kosɔbɛ! A ye barika sɔrɔ tuma min na, a gɔɔn belebeleba nin karila. Nga gɔɔn ɲanaman naani falenn'a nɔɔ na. U ɲaa tun sinnin be diɲɛ faan naani bɛɛ la.

⁹Gɔnfitini falenna olu kelen na. A tora ka boɲa ka taga worodugu ɲafan fɛ, ni kɔrɔn fɛ ani jamana min ka di ni jamanaw bɛɛ ye, o faan fɛ.

¹⁰ A boɲana ten fɔɔ ka se sankolo kɔnɔ fɛɛnw ma, k'o dɔw ben, ani lolo dɔw k'u dɔndɔn.

¹¹A boɲana fɔɔ ka taga se o sankolo kɔnɔ fɛɛn nunu kuntigi ma. Saraka minw tun be bɔ ale ye loon o loon, a y'o bali, k'a batoyɔrɔ cɛn.

¹²Sankolofɛn nunu donn'a bolo tilenbaliya kama, ka fara saraka kan u tun be min bɔ loon o loon. Gɔɔn nin ye batoli ɲanaman la duguma. A mana koo o koo latigɛ, o bɛɛ be ɲa a bolo.

¹³Ne ye mɛlɛkɛ dɔ kumakan mɛn. Ne ye min kaan mɛn, dɔ wɛrɛ kumana ale fɛ ko: «Koo min yirala loon o loon saraka nin kosɔn wo, ni kojuguba min bena na ni cɛnni ye wo, ni batoliyɔrɔ minɛko wo, ani sankolo kɔnɔ fɛɛnw nagasiko, o bena to seen kan fɔɔ tuma jumɛn?»

¹⁴A y'a fɔ n ye ko: «O bena to seen kan fɔɔ suu waa fila ni kɛmɛ saba (2 300), ani tile waa fila ni kɛmɛ saba. O kɔ, u bena Alabatoso kalifa Ala ma tugu.»

¹⁵Ka ne Daniyɛli to yelifɛn nin filɛli n'a kɔrɔ jatiminɛ na, ne ye fɛɛn dɔ lɔnin ye n ɲakɔrɔ. A tun be i n'a fɔ mɔgɔ.

¹⁶ N ye kumakan dɔ mɛn ka bɔ Ulayi baji la ko: «Gabiriyɛli, yelifɛn nin kɔrɔ fɔ cɛɛ nin ye.»

¹⁷Ne lɔnin tun be yɔrɔ min na, a gwɛrɛla ne la o tuma na. A setɔ, ne benna ka n ɲaa biri duguma siranyakojugu fɛ. A y'a fɔ n ye ko: «Adamaden, i k'a faamu ko i ye koo min ye, o be laban waati le koo fɔra.»

¹⁸A tun be kumana ne fɛ tuma min na, ne tun kirinna ka n ɲaa birinin to duguma. Nga a magara ne la, ka ne minɛ ka wili ka lɔ.

¹⁹A ko: «Koo min bena kɛ Ala ka dimi banwaati la, n bena o fɔ i ye. Bari, o labanlon sigira ka ban.

²⁰I ye sagajigi gɔɔn fila tigi min ye, o ye mɛdiw ni pɛrɛsiw ka masaw ye.

²¹Bakɔrɔnin nin ye girɛkiw ka masa ye. A gɔɔn belebeleba min be a ɲaa cɛ, o y'a ka masa fɔlɔ ye.

²²Gɔɔn nin karila, gɔɔn naani minw falenn'a nɔɔ na, olu ye jamana naani ye minw bena wili a ka jamana kɔ, nga olu ten'a ka fanga ɲɔgɔn sɔrɔ.

²³U ka fanga bantuma na, o y'a sɔrɔ mɔgɔjuguw ka juguya ser'a daan na, masa kelen dɔ bena wili min ka jugu, min b'a yɛrɛ boɲa, n'a be se namara la kosɔbɛ.

²⁴A ka fanga bena boɲa haali. Nga o tena kɛ a yɛrɛ barika la. A bena na ni cɛnniba ye. A mana koo o koo latigɛ, o bɛɛ bena ɲa a bolo. A bena setigi dɔw halaki, ani Ala ka jama.

²⁵A ka cekuya kama, a bena se janfa la kosɔbɛ. A ben'a yɛrɛ boɲa ka mɔgɔ caaman halaki minw tun be ɲasuma na. A bena wili masaw ka Masa kama. Nga a bena halaki ni mɔgɔ bolo ma se a ma.

²⁶I ye fɛɛn minw ye sufɛ ni tilefɛ kosɔn min koo fɔra i ye, o ye tiɲɛ yɛrɛ le ye. Nga, o yelifɛn nin ka koo to i kɔnɔ. Bari, o ye lonjanko ye.»

²⁷O ye ne Daniyɛli barika ban, fɔɔ ka ne bana tile fila. Ne wilinin kɔ, ne tora ka baara kɛ masacɛ ye. Siranya tun be ne la kosɔbɛ yelifɛn nin kama, ne tun te foyi faamuyara.