Read dyu BƐLI KA KITABU 1 Bible Online

BƐLI KA KITABU 1 - dyu bible

BƐLI KA KITABU 1

¹Masacɛ Asitiyazi sanin kɔ, Sirusi le sigira masaya la. Ale tun ye pɛrɛsi ye.

²Daniyɛli tun ye masacɛ ka terigwɛlɛnw dɔ ye. A koo tun ka di masacɛ ye ka tɛmɛ tɔw bɛɛ kan.

³Joo dɔ tun be Babilɔnikaw fɛ, a tɔgɔ tun ko Bɛli. Mugu kilo kɛmɛ duuru ɲɔgɔn, ni saga bi naani ani dɔrɔdaga [1] wɔɔrɔ le tun be kɛ k'a sɔn loon o loon.

⁴Masacɛ tun be joo nin jati kosɔbɛ. Loon o loon, a tun be ta'a sɔn. Nga Daniyɛli tun be to k'a ka Ala le bato. Masacɛ y'a fɔ a ye loon dɔ ko: «Mun na i te Bɛli sɔn?»

⁵A y'a jaabi ko: «Adamadenw bolo ye fɛɛn min dilan, ne t'o bato, fɔɔ Ala yɛrɛyɛrɛ, min ye sankolo ni dugukolo dan. Adamadenw bɛɛ ka koo be ale lo bolo.»

⁶Masacɛ y'a fɔ a ye ko: «E ka jati la, Bɛli te batofɛn ɲanaman ye kɛ? A be fɛɛn min bɛɛ dumu ani a be min min loon o loon, i t'o yera wa?»

⁷Daniyɛli yɛlɛla k'a fɔ ko: «Masacɛ, kana i yɛrɛ nigɛ, joo nin dilannin be ni bɔgɔ ye, ka zira kɛ k'a mɔn. A fana ma deli ka fɛɛn dumu, walima k'a min.»

⁸Masacɛ dimina. A ye joo nin murutigiw wele k'a fɔ u ye ko: «Dumuni minw be kɛ ka joo nin sɔn, n'aw ma se k'o dumubaga fɔ ne ye, aw be faga.

⁹Nga n'aw y'a yira ko Bɛli le b'a dumu, Daniyɛli le be faga. Bari a bena kɛ Bɛli tɔgɔ cɛnbaga ye.» Daniyɛli y'a fɔ masacɛ ye ko a ye min fɔ, k'o ka kɛ. Bɛli murutigiw tun ye mɔgɔ bi wolonwula ye. U ka musow n'u deenw ma jati.

¹⁰Masacɛ tagara ni Daniyɛli ye Bɛli sɔnso kɔnɔ.

¹¹Bɛli murutigiw y'a fɔ ko: «Ayiwa, anw bena bɔ. Ele masacɛ ka dumuni nin bila, ani dɔrɔ diman ɲagaminin. O kɔ, i ka bɔ ka daa tugu k'i ka taamasiɲɛ kɛ a kan n'i ka bololanigɛ ye.

¹²N'i segira sini sɔgɔma ka n'a sɔrɔ ni Bɛli m'a bɛɛ dumu, an be faga. Nga n'a dumuna, Daniyɛli le bena faga. Bari a bena ye ko a ye galon le la anw kan.»

¹³Murutigi nunu lanin tun b'u yɛrɛ la kosɔbɛ. Sabu, u tun ye daa dɔ sɔgɔ dogo la tabali jukɔrɔ. Tuma o tuma, u tun be don n'o yɔrɔ le ye ka sarakafɛn nunu ta.

¹⁴U bɔra ka ban tuma min na, dumuni min ka kan ka bila Bɛli ye, masacɛ y'o bila. Daniyɛli y'a fɔ a ka baaradenw ye k'u ka na ni bugurigwɛ ye. U nana n'o ye k'a seriseri jobon nin kɔnɔ yɔrɔ bɛɛ, masacɛ kelenpe ɲana. U bɔra ka daa tugu, ka taamasiɲɛ kɛ a kan ni masacɛ ka bololanigɛ ye ka taga.

¹⁵Murutigiw nana sufɛ i n'a fɔ u be deli k'a kɛ cogo min na, olu n'u ka musow n'u deenw. U ye dumuni nin bɛɛ dumu ka dɔrɔ nin bɛɛ min.

¹⁶Masacɛ wilila sɔgɔma joona ka na ni Daniyɛli ye.

¹⁷A ye Daniyɛli ɲininga ko: «Daniyɛli, taamasiɲɛ b'a nɔɔ na wa?» Daniyɛli ko: «A b'a nɔɔ na, masacɛ!»

¹⁸U ye daa yɛlɛ tuma min na, masacɛ ye filɛli kɛ dumuni bilayɔrɔ la, a kulera! A y'a fɔ ko: «Ele Bɛli ka bon, dibidibi te i ka koo la!»

¹⁹Daniyɛli yɛlɛla! A ma sɔn masacɛ ka don jobon nin kɔnɔ. A y'a fɔ a ye ko: «Duguma filɛ, sennɔ nunu ye jɔn ta ye?»

²⁰Masacɛ ko: «N ɲaa be cɛɛw sennɔ na, ni muso ani denmisɛnw ta la.»

²¹A dimininba k'u ka murutigiw minɛ ka na, n'u ka musow n'u deenw. U tun be don ni daa dogonin min ye ka dumuni nunu dumu u bilayɔrɔ la, u y'o yira masacɛ la.

²²A y'u faga, ka Bɛli don Daniyɛli bolo. Daniyɛli y'a walaka k'a sɔnso ci fana.

²³Babilɔnikaw tun be to ka saa belebeleba dɔ jati kosɔbɛ k'a sɔn.

²⁴Masacɛ y'a fɔ Daniyɛli ye loon dɔ ko: «I tena se k'a fɔ ko nin te batofɛn ɲanaman ye do. E k'ale bato sa!»

²⁵Daniyɛli ko: «Ne bena Matigi, n ka Ala le bato. Ale dama ɲanaman lo.

²⁶Ayiwa, masacɛ, n'i ye sira di ne ma, ne bena saa nin faga. N tena muru ta a kama, walima bere.» Masacɛ ko: «N ye sira d'i ma.»

²⁷O la, Daniyɛli ye yiri ɲaji ta, ni sogotulu ni sogo dɔ sii. A y'u ɲagami ɲɔgɔn na k'o tobi. A y'o mɔnmɔn ɲɔgɔn na ka taga o fili saa daa la, ale y'o kunun, a fununa ka ci. Daniyɛli kulera k'a fɔ ko: «Aw ka batofɛn nin tɛ?»

²⁸Babilɔnikaw y'o mɛn tuma min na, u dimininba wilila masacɛ kama. U tora k'a fɔ ko: «Masacɛ y'a yɛrɛ kɛ Zuwifu ye! A y'a to u ye Bɛli walaka, ka saba nin faga, ka murutigiw halaki!»

²⁹O kɔ, u tagara masacɛ sɔrɔ k'a fɔ a ye ko: «Daniyɛli don an bolo, n'i banna, an b'i faga, e n'i ka somɔgɔw.»

³⁰Masacɛ y'a ye ko mɔgɔ nunu b'u sɔbɛ la minkɛ, a dɛsɛra ka Daniyɛli di u ma.

³¹U ye Daniyɛli fili jaraw ma dingɛ kɔnɔ, a ye tile wɔɔrɔ kɛ yen.

³²Jara wolonwula le tun be dingɛ nin kɔnɔ. Loon o loon, u tun be to ka adamaden suu fila ni saga fila le d'u ma. Nga nin loon nin na, u ma foyi d'u ma, janko u ka Daniyɛli ɲimi.

³³O y'a sɔrɔ kira Abakuki tun be Zude mara la. A tun ye baga tobi, ka buru tigɛtigɛ k'a don sinsin na, a tun be tagara n'o ye foro la k'a di sumantigɛlaw ma.

³⁴Matigi ka mɛlɛkɛ y'a fɔ a ye ko: «Taga ni dumuni nin ye Babilɔni k'a di Daniyɛli ma jaraw ka dingɛ kɔnɔ.»

³⁵Abakuki y'a jaabi ko: «Matigi, ne ma deli ka taga Babilɔni, ne te dingɛ nin fana yɔrɔ lɔn.»

³⁶Matigi ka mɛlɛkɛ ye Abakuki minɛ a kunsigi ma ka taga n'a ye teliya la fɔɔ ka tɛmɛ fɔɲɔ yɛrɛ kan, ka ta'a bila dingɛ nin daa la Babilɔni.

³⁷Abakuki pɛrɛnna ko: «Daniyɛli, Daniyɛli! Dumuni filɛ Ala ye min ci e ma! N'a minɛ.»

³⁸Daniyɛli ko: «Ee! Ala, e y'i hakili to ne la. I koo ka di minw ye, i te olu fili.»

³⁹A wilila ka dumuni kɛ. Matigi ka mɛlɛkɛ ye Abakuki ta ka kɔsegi n'a ye o yɔrɔnin bɛɛ a ka jamana na.

⁴⁰A tile wolonwulanan loon, masacɛ nana ko a bena Daniyɛli sayako kasi kɛ. A gwɛrɛla ka filɛli kɛ dingɛ kɔnɔ, a ye Daniyɛli siginin ye hɛrɛ la.

⁴¹Masacɛ kulera! A y'a fɔ ko: «See b'i ye Matigi, Daniyɛli ka Ala! I kelenpe le fana be yen!»

⁴²O kɔ, u ye Daniyɛli bɔ dingɛ kɔnɔ, minw tun be Daniyɛli ka saya fɛ, u ye olu fili yen. O yɔrɔnin bɛɛ, jaraw y'u ɲimi masacɛ ɲana.