Read dyu Oze ka kitabu 10 Bible Online

Oze ka kitabu 10 - dyu bible

Oze ka kitabu 10

¹Isirayɛlidenw tun be i ko yiri ɲanaman min be deen kɛ kosɔbɛ. U deenw mana caya, u b'u ka batolikɛyɔrɔw caya. U ka dugukolo mana nafa di, u b'u ka jokabakuruw masiri.

²U kɔnɔ ye filafila ye. O la, u ben'o sara sɔrɔ fana. Masaba le bena u ka batoliyɔrɔ nunu halaki, a bena u ka jokabakuruw mugumugu.

³U ben'a fɔ sisan ko: «Masacɛ t'an fɛ, bari, an ma siran Masaba ɲa. Masacɛ yɛrɛ bena mun le ɲa an ye?»

⁴U be kumafu dama le fɔ, u be kali fu, u be bɛnkolon kɛ ɲɔgɔn fɛ. O la, u ka ɲɔgɔnkiti be cayara i ko baga, forow kɔnɔ.

⁵Samarikaw be yɛrɛyɛrɛ misiden jaa kosɔn, min be Bɛtavɛni. A sɔnbagaw be dusukasi la a kosɔn, murutigiw be kasir'a kosɔn. Bari boɲa min tun b'a kan, o bɔra.

⁶U bena taga n'a ye Asiri jamana na, ka masacɛba boɲa n'a ye. O maloya be kɛ Efarayimu kɔmɔgɔw ta ye. Isirayɛli mara mɔgɔw ye ŋaniya minw ta, u bena maloya olu kosɔn.

⁷Samari ta banna, a ka masacɛ ta fana banna, a kɛra i ko kala, jii sanfɛ.

⁸ Isirayɛlidenw ye hakɛ kɛ Bɛtavɛni sɔnnikɛyɔrɔ minw na, olu bena halaki. Ŋɔni, ni biin le bena fa u ka josɔnyɔrɔw la. U bena n'a fɔ kuluw ye ko: «Aw k'an datugu!» K'a fɔ tintinw ye ko: «Aw ka ben an kan!»

⁹ Masaba y'a fɔ ko: «K'a ta Gibeya dugu ka koo kɛwaati la, Isirayɛlidenw be hakɛ la, u ma yɛlɛma. Yala, juguw ka kɛlɛ tena se u ma Gibeya le wa?

¹⁰Ne bena u ɲaa gwan n sago la. Siya wɛrɛw bena jɛn u kama, k'u minɛ, u ka kojugu caaman kama.

¹¹Efarayimu kɔmɔgɔw ye sɛnɛkɛmisi ɲanaman ye, min be sɔn ka suman gosi. Ayiwa, ne bena lɔgɔ la u kaan cɛɲuman kan. Zuda kɔmɔgɔw bena foro bugubugu, Yakuba deenw bena siɲɛni kɛ.

¹² O la, aw ka tilenninya sira taama, aw bena ɲumanya sɔrɔ. Aw k'aw sɔɔnw yɛlɛma. Ne Masaba ɲinituma le ye sisan ye fɔɔ ka taga se ne nawaati ma, k'aw kɛ mɔgɔtilenninw ye.

¹³Aw ye baarajugu kɛ, k'o tɔnɔjugu sɔrɔ! Aw ye galon tɔnɔ nɛnɛ fana. Aw y'aw jigi la aw yɛrɛ ka fanga kan, k'aw jigi la aw ka kɛlɛdenw ka caya kan.

¹⁴O la, kɛlɛ mankan bena wili aw ka mɔgɔw cɛma, fɔɔ aw ka dugu barikamanw bɛɛ bena halaki i ko Salamani ye Bɛtaribɛli halaki cogo min na kɛlɛ loon na, u ye baa ni deenw nɔɔni ɲɔgɔn kan tuma min na.

¹⁵Ne Masaba bena o le kɛ aw la, aw ka juguya daan tɛmɛnin kosɔn. Dugu mana gwɛ, o ye Isirayɛli mara masacɛ ta bannin ye!»