Read dyu Oze ka kitabu 11 Bible Online

Oze ka kitabu 11 - dyu bible

Oze ka kitabu 11

¹ Masaba y'a fɔ ko: «Isirayɛlidenw daminɛtuma na, u koo tun ka di ne ye. Ne ye n deenw wele ka bɔ Ezipiti jamana na.

²Ne mana u wele, u b'u yɔrɔ jaɲa n na. U ye *Baali sɔn yɔrɔ caaman na, ka wusulan jɛni jaaw ye.

³K'a sɔrɔ, ne le y'u dɛmɛ u ka taama na, k'u minɛ u bolo ma. Nga, u m'a lɔn ko ne tun be janto u la.

⁴Ne y'u dɛmɛdɛmɛ adamadenya la, kanuya juru barika la. Ne tun y'u la n gaman kan i ko mɔgɔ be denɲɛnin kɛ cogo min na. Ne tun be dumuni d'u ma.

⁵U tena kɔsegi Ezipiti jamana na tugu, nga, Asirikaw le bena u mara. Bari, u banna, u ma sɔn ka kɔsegi ne ma.

⁶Murujan bena cɛnni kɛ u ka dugubabaw kɔnɔ, u juguw bena u ka dugu dondaw bɛɛ halaki. U bena cɛnni kɛ, u ka ŋaniyaw tali kosɔn.

⁷Ne ka mɔgɔw nɔrɔnin be u ka janfa la dɔrɔn. O b'u wele ka kɔsegi ne Fɛɛn bɛɛ kuntigi fɛ, nga u si te wili.

⁸ «Ne be se k'aw bila wa, Efarayimu kɔmɔgɔw? Ne be se k'aw don aw juguw bolo wa, Isirayɛlidenw? Ne be se k'aw kɛ i ko Aduma dugu wa? Ne be se k'aw kɛ i ko Seboyimu dugu wa? [1] Ne hakili ɲagaminin lo, aw makari ye ne minɛ kosɔbɛ.

⁹Ne tena ta n dimikojugu fɛ, ne tena Efarayimu kɔmɔgɔw halaki tugu. Bari, ne ye Ala ye, ne te adamaden ye. Ne saniyanin lo aw cɛma, ne tena na ni dimi ye.

¹⁰U bena na tugu ne Masaba kɔ, n bena ŋunan i ko jara. Ni n ŋunanna, n deenw bena boli minɛ ka bɔ tileben fɛ ka na.

¹¹U bena bɔ Ezipiti ka na i ko kɔnɔw, ka bɔ Asiri i ko tubaninw. Ne bena sigiyɔrɔ d'u ma u ka soo.» Masaba le ko ten.