Read dyu Oze ka kitabu 12 Bible Online

Oze ka kitabu 12 - dyu bible

Oze ka kitabu 12

¹Efarayimu kɔmɔgɔw be galon dama le tigɛra ne ye. Isirayɛlidenw ta ye namara le ye. Zuda mara mɔgɔw murutinin be ne Ala ma tuma bɛɛ, ne Ala kantigi ma. [1]

²Efarayimu kɔmɔgɔw kɔni be fɛnfu le fɛ, u be tile fɛnfu gwanninman yaala la ka bɔ kɔrɔn fɛ. U be dɔ fara u ka galonw, n'u ka fariyakow kan dɔrɔn. U be bɛn ni Asirikaw ye, ani ka to ka taga tulu di Ezipitikaw ma.

³Masaba be Zuda mara mɔgɔw jalakira. A bena Yakuba ka soo tɔɔrɔ u ka kɛwaliw kosɔn. U ye minw kɛ, a bena u sara ka kɛɲɛ n'o ye.

⁴ Ka Yakuba to a baa kɔnɔ, a ye bondori kɛ n'a baden ye. A nana kɔgɔ, a ye bondori kɛ ni Ala ye.

⁵ A ye bondori kɛ ni mɛlɛkɛ ye, a sera ale kɔrɔ! A kasira, k'ale daali, a ye Ala kunbɛn Betɛli, Ala kuman'a fɛ o yɔrɔ la.

⁶Ɔnhɔn, Masaba, Setigi Ala lo, a tɔgɔ ye Masaba ye.

⁷Yakuba kɔmɔgɔw, aw ka kɔsegi aw ka Ala fɛ, aw ka to aw ka kantigiya n'aw ka hɔrɔnya la, k'aw jigi lanin to aw ka Ala kan kudayi.

⁸Efarayimu kɔmɔgɔw be i ko jagokɛla min be namara don kilo la. Namara le ka di u ye.

⁹Efarayimu kɔmɔgɔw ko: «An kɛra nafolotigiw ye, an ye nafoloba sɔrɔ. O bɛɛ ye an ka baara tɔnɔ ye, u tena hakɛ si sɔrɔ yen an fɛ.»

¹⁰ O la, Masaba ko: «Ne le ye Masaba ye, aw ka Ala, kabini Ezipiti jamana na. Ne ben'a kɛ aw bena segi ka la fanibuguw kɔnɔ i ko an ka ɲɔgɔn kunbɛnwaati tile la.

¹¹Ne kumana kiraw fɛ ka koyirata caaman yira u la. Kiraw sababu la, ne ye talenw la.

¹²Galaadikaw kɛra kojugukɛlaw ye, u bena halaki pewu. U be sɔnni kɛ ni tura ye tuma bɛɛ Giligali. U ka sɔnnikɛyɔrɔw bena kɛ kabakurutonw dama ye forow kɔnɔ.»

¹³ Yakuba tun bolila ka taga Aramu jamana na ka baara kɛ yen muso kama. A ye begɛnw dɛndɛ muso kama.

¹⁴ Nga, Masaba ye Isirayɛlidenw bɔ Ezipiti jamana na kira sababu la. Isirayɛlidenw kɔlɔsibaga tun ye kira ye.

¹⁵Efarayimu kɔmɔgɔw ye Ala dimi kosɔbɛ. U ka Matigi bena o joli bɔnnin kunko la u kunna, a bena u ka dɔgɔya sara u ma.