Read dyu Oze ka kitabu 13 Bible Online

Oze ka kitabu 13 - dyu bible

Oze ka kitabu 13

¹Ni Efarayimu kɔmɔgɔw kumana, bɛɛ tun be siran. Mɔgɔbaw tun lo Isirayɛli mara la. Nga kabini u ye *Baali sɔn, jalaki sera u ma, u sara.

²Halibi, u b'a la ka hakɛ kɛ. U be warigwɛw yeelen k'u ka joow dilan ka ɲa. O bɛɛ do ye mɔgɔw ka lalagafɛnw ye. U b'a fɔ olu ma ko: «Minw be saraka bɔ, olu k'u kunbiri gwan misiden jaa nunu seen kɔrɔ.»

³O kama, u bena kɛ i ko sɔgɔma kabaforoko, i ko komiji min be tunu. U bena kɛ i ko sumanɲaga, min be ta fɔɲɔ fɛ k'a yɔrɔ jaɲa sumanbugɔyɔrɔ la, i ko sisi min be bɔra soo kɔnɔ.

⁴«K'a sɔrɔ ne le ye Masaba ye, aw ka Ala, kabini Ezipiti jamana na. Ne niin ka bɔ a la, aw te dɔ wɛrɛ lɔn. Aw kisibaga te yen ni ne tɛ.

⁵ Ne y'aw lɔn kongokolon kɔnɔ le, ne y'aw lɔn o yɔrɔ gwanninman na.

⁶Isirayɛlidenw nana dumuni sɔrɔ, u ye dumuni kɛ ka fa. U ye dumuni kɛ ka fa tuma min na, u fara u yɛrɛ la dɔrɔn ka ɲinɛ ne kɔ.

⁷O la, ne bena kɛ i ko jara u kama, ne be dɛn u ɲa sirada la i ko waraninkala.

⁸N'u ye wara deenw ta, a be fariya cogo min na, ne bena fariya u ma ten. Ne bena u boso le, k'u ɲimi i ko jara. Kongosogo bena u faranfaran.

⁹Isirayɛli mara mɔgɔw, aw halakira, ne kelenpe dama le be se k'aw dɛmɛ.

¹⁰ Aw ka masacɛ be min, waasa a k'aw kisi? Aw ka duguw ɲamɔgɔw bɛɛ be min? Aw le tun y'a ɲini n fɛ ko n ka masacɛ ni ɲamɔgɔw d'aw ma.

¹¹ Ne diminin ye masacɛ d'aw ma. Ne y'a bɔsi aw la ni dusu ye.

¹²Efarayimu kɔmɔgɔw ka fili maranin lo, u ye hakɛ min kɛ, o be yen.

¹³U bena tɔɔrɔ i ko muso, a ka jigiwaati la. Nga deen hakilitanw lo. U wolotuma sera, nga u t'a fɛ ka bɔ u baa kɔnɔ.

¹⁴ Ne ka kan ka Isirayɛlidenw bɔsi lahara bolo wa? Ne ka kan k'u kisi saya ma wa? Saya, e ka balawu be min? Lahara, e ka cɛnni be min? Ne tena makari fewu!

¹⁵Efarayimu kɔmɔgɔw ka koow mana yiriwa cogo o cogo u badenw cɛma, fɔɲɔ bena bɔ kɔrɔn fɛ ka na, Masaba ka fɔɲɔ bena bɔ kongokolon faan na. Jii bɔyɔrɔw ni kɔlɔnw bena ja. U bena u ka nafolo n'u ka fɛnɲuman bɛɛ ta ka taga.»