Read dyu Oze ka kitabu 2 Bible Online

Oze ka kitabu 2 - dyu bible

Oze ka kitabu 2

¹ Isirayɛlidenw bena caya i n'a fɔ kɔgɔji daa la cɛncɛn, min te se ka suma, walima ka jati. Waati dɔ bena se, a tun be fɔra u ma yɔrɔ min na ko: «Aw te ne ka mɔgɔw ye», a bena fɔ u ma o yɔrɔ kelen na ko: «Ala deenw.»

²Zuda mara mɔgɔw, ni Isirayɛli mara taw bena jɛn tugu, ka ɲamɔgɔ kelen woloma ka bila u ɲa. U bena see sɔrɔ jamana kɔnɔ. Bari Ziziriyɛli [1] ka loon bena kɛ lonba ye.

³«Aw k'a fɔ aw balimacɛw n'aw balimamusow ye ko u ye ne ka jama ni n diyanamɔgɔw ye.

⁴«Aw k'aw bamuso le jalaki, aw k'ale lo jalaki! Bari ne ka muso tɛ, ne fana t'a cɛɛ ye. A ka kakalaya dabila, ka kakalaya masirifɛnw bɔ a yɛrɛ la.

⁵N'o tɛ, ne ben'a walaka, n ben'a kɛ i ko a wololon na. N ben'a kɛ i ko kongokolon, ne ben'a kɛ dugukolo janin ye. Minnɔgɔ le ben'a ta cɛn.

⁶A deenw koo tena diya ne ye, bari u sɔrɔla kakalaya le la.

⁷U bamuso ye kakalaya kɛ tigitigi! A ye maloyako kɛ k'u kɔnɔ ta. A y'a fɔ: ‹Ne kɔni be boli n ɲamɔgɔcɛw kɔ dɛ, olu le be dumuni di ne ma, ka jii, ni faniw, ni tulu ani dɔrɔ di ne ma.›

⁸O kama, ne ben'a ka sira datugu ni ŋɔni ye, ne bena kogo kɛ k'a lamini, a tena sira sɔrɔ ka bɔ.

⁹A ben'a ɲamɔgɔcɛw kɔgwɛn, a tena u sɔrɔ. A bena u yɔrɔ ɲini, a tena u ye. O tuma na, a ben'a fɔ ko: ‹Ne b'a fɛ ka segi n cɛkɔrɔ fɛ. Bari ne cogo tun ka fisa fɔlɔ ka tɛmɛ bii kan.›

¹⁰A tun m'a lɔn ko ne le tun be suman d'a ma, ni duvɛnkɛnɛ, ni tulu. Ne le tun be warigwɛ ni sanu d'a ma, u ye minw ta k'o kɛ *Baali sɔnfɛn ye.

¹¹O kama, ne ben'a kɛ a tena suman sɔrɔ tugu a tigɛwaati la, a tena duvɛnkura sɔrɔ *ɛrɛzɛn mɔtuma na. A fana tena faniw sɔrɔ, minw y'a suturafɛn ye.

¹²Sɔbɛ la, ne ben'a julakolon bɔ a ɲamɔgɔcɛw ɲana. Mɔgɔ si te yen min ben'a bɔsi n bolo.

¹³Ne ben'a to a ka nisɔndiyakow bɛɛ be dabila: ɲanagwɛw te kɛ, kalokura ta tena kɛ, lafiɲɛlon ta fana tena kɛ, n'o ɲɔgɔnna wɛrɛw.

¹⁴Ne ben'a ka ɛrɛzɛnforow, ni torosunforow halaki, a tun b'a fɔ minw kosɔn ko: ‹Ne ɲamɔgɔcɛw ye sara minw di ne ma, olu lo.› Ne bena o foro nunu kɛ waga ye, kongosogow bena na u ka dumuni yaala yen.

¹⁵A ye Baali sɔn yɔrɔ caaman na waati minw na, ka wusulanw jɛni a ye, ne ben'a tɔɔrɔ o kosɔn. A y'a yɛrɛ masiri n'a ka bololanigɛ ye, ni kannakɔnɔ ye, ka to ka boliboli a ɲamɔgɔcɛw kɔ, a ɲinɛna ne kɔ. Masaba le ko ten.

¹⁶«Ayiwa, ne ben'a nigɛnigɛ haali! Ne bena bɔ n'a ye ka taga n'a ye kongokolon kɔnɔ. Ne bena kuma diman fɔ a ye.

¹⁷ Ne ben'a ka *ɛrɛzɛnforow d'a ma o yɔrɔ la. Akɔri [2] kɔkɛnɛ bena kɛ jigi tuguyɔrɔ ye. A sunguruman tun be ne kaan mɛn cogo min na, a bena mɛnni kɛ ne fɛ ten o yɔrɔ la, i ko a bɔwaati la Ezipiti jamana na.»

¹⁸Masaba ko: «O loon na, i bena ne wele ko: ‹N cɛɛ!› I tena ne wele tugu ko: ‹Baali, n tigi.›

¹⁹Ne ben'a kɛ Baali tɔgɔ te mɛn a daa la tugu yɔrɔ si. A tɔgɔ tena wele tugu.

²⁰O loon na, ne ben'a kɛ u be bɛn ni kongosogow ye, ni kɔnɔw, ani fɛɛnw ye, minw be fofo duguma. Ne bena kala, ni murujan ani kɛlɛ ban pewu jamana kɔnɔ. Ne ben'a to u be sigi yen ɲasuma na.

²¹Isirayɛli, ne bena i kɔɲɔya kɛ i be kɛ n ta ye pepewu. Ne bena i kɔɲɔya kɛ tilenninya, ni tiɲɛ na, ne bena i kanu ka makari i la.

²²Ne bena i maminɛ ka kɛ n ta ye tilenninya la. O tuma na, i bena ne Masaba lɔn.»

²³Masaba ko tugu: «N'o loon sera, ne bena mɛnni kɛ i fɛ. Ne bena sɔn sankolo sago ka kɛ, ale fana bena dugukolo sago kɛ.

²⁴Dugukolo fana bena sɔn suman sago be kɛ, duvɛnkura ni tulu be sɔrɔ. Olu fana bena Zizireyɛli [3] mako ɲa.

²⁵ Ne bena tila ka Zizireyɛli sigicogo sabati, ne bena makari Loruwama la. Ne ben'a fɔ Lowami ye ko: ‹I ye ne ta ye.› Ale ben'a fɔ ne ye fana ko: ‹N ka Ala.› »