Read dyu Oze ka kitabu 4 Bible Online

Oze ka kitabu 4 - dyu bible

Oze ka kitabu 4

¹Aw ye mɛnni kɛ Masaba ka kuma na, aw Isirayɛli mara mɔgɔw. Bari, Masaba b'aw jalakira, jamanadenw. A ko: «Tilenninya ni kanuya te yen, mɔgɔ si te Ala lɔnna jamana kɔnɔ.

²U be ɲɔgɔn danga, u be galonw tigɛ, ka ɲɔgɔn faga, soɲali ni ɲamɔgɔya be kɛ. O be caya, mɔgɔw be faga ka tugu ɲɔgɔn na.

³O le kama, jamana be dusukasi la, a kɔnɔ mɔgɔw bɛɛ be fasafasara, fɔɔ ka taga se kongosogow ni kɔnɔw ma, hali jigɛw yɛrɛ bena tunu.

⁴«Mɔgɔ si kan'a daa don a la, mɔgɔ si kana sɔsɔli kɛ. Aw ka siya tena se k'a daa don a la, aw minw ye sarakalasebagaw ye u cɛma, aw tena se k'aw daa don a la.

⁵Aw bena talon suu ni tile, kiraw fana bena talon n'aw ye. Ne bena aw bamuso ta cɛn pepewu.

⁶Ne ka mɔgɔw ta cɛnna ne lɔnbaliya kosɔn. Aw banna ka ne lɔn minkɛ, ne fana bena ban aw la, aw tena kɛ ne ka sarakalasebagaw ye tugu. Aw ɲinɛna ne, aw ka Ala ka sariya kɔ minkɛ, ne fana bena ɲinɛ aw deenw kɔ.

⁷Sarakalasebagaw be cayara cogo min na, u be hakɛ kɛra ne ɲakɔrɔ ten. Ne bena u ka kunkɔrɔta yɛlɛma ka kɛ maloya ye.

⁸Ne ka mɔgɔw be hakɛ yafa saraka minw bɔ, u be balo o le la. U b'a fɛ ne ka mɔgɔw ka taga ɲa kojugu la dɔrɔn.

⁹Ne bena sarakalasebagaw ni jama minɛ cogo kelen na. Ne bena u ɲaa gwan u ka kɛta kosɔn, n bena u sara ka kɛɲɛ n'u ka kɛwaliw ye.

¹⁰U bena dumuni kɛ, nga u tena fa, u bena kakalaya kɛ, nga u tena deenw sɔrɔ. Bari u ye ne Masaba to yen, ka kɛ kakalaw ye.

¹¹«Dɔrɔtɔya kɛnin be ka ne ka mɔgɔw kunnacɛn.

¹²U be taga u ka joo yirilaman ɲininga, u bololabere le b'u ka koow ɲafɔ u ye. Bari kakalaya miiri y'u kunnacɛn. U ka kakalaya nin y'u yɔrɔ jaɲa u ka Ala la.

¹³U be taga kuluw kunna ka sɔnni kɛ, ka taga wusulanw jɛni tintinw kan, yiribabaw jukɔrɔ, joyiriw, ni pepiliyeyiriw, ani terebɛntiyiriw, olu suma ka di. O kama, aw deen musomanw be kakalaya kɛ, aw dencɛw ka musow be ɲamɔgɔya kɛ.

¹⁴Ne tena u ɲaa gwan u ka kakalaya n'u ka ɲamɔgɔya kosɔn dɛ, bari aw yɛrɛ be taga ni kakalamusow ye gɛrɛfɛ, k'aw ka joow sɔn ni ɲɔgɔn ye. Siya hakilitan be taga banyɔrɔ le.

¹⁵Ni aw Isirayɛli mara mɔgɔw be to ka kakalaya kɛ, Zuda mara mɔgɔw kan'a to u niin be sɔrɔ o kunko la! Aw kana taga Giligali batoli kɛyɔrɔ la, aw kana taga Bɛtavɛni. [1] Aw kana kali fana ko: ‹Masaba kosɔn!›

¹⁶Isirayɛli mara mɔgɔw kɛra banbagaw ye, i ko misi min banna juru la. Sisan, Masaba bena u dɛndɛ i ko sagadenw, lɛɛ belebele kɔnɔ wa?

¹⁷Efarayimu kɔmɔgɔw ni joow kɛra jɛnɲɔgɔnw ye. U to!

¹⁸N'u y'u ka minniw kɛ ka ban, u be to kakalaya la. Maloyako le ka di u ɲamɔgɔw ye.

¹⁹Fɔɲɔ le bena u ta ka taga n'u ye. U bena maloya sɔrɔ u ka josɔn kama.