Read dyu Oze ka kitabu 5 Bible Online

Oze ka kitabu 5 - dyu bible

Oze ka kitabu 5

¹«Sarakalasebagaw, aw y'aw tulo malɔ! Isirayɛli ka somɔgɔw, aw k'aw tulo malɔ kosɔbɛ! Masa ka somɔgɔw, aw k'aw tulo malo fana! Aw le tun ka kan ka kotilennin kɛ. Aw kɛra jaan ye ne ka jama ɲa Misipa, aw kɛra jɔɔ ye k'a minɛ Tabɔri kulu kan.

²Murutibagaw ka juguya ye dingɛba bɔ. Ne fana labɛnnin lo u bɛɛ kama.

³Ne be Efarayimu kɔmɔgɔw lɔn. Isirayɛli mara mɔgɔw ma dogo n ma. Efarayimu kɔmɔgɔw, aw tora kakalaya la, Isirayɛli mara nɔgɔra.

⁴U ka kɛwaliw b'u bali ka gwɛrɛ tugu ne, u ka Ala la. Bari, kakalaya miiriya le b'u kɔnɔ, u te ne Masaba lɔn fana.

⁵Isirayɛli mara mɔgɔw ka yɛrɛboɲa b'u ka fili yira. U be talon u yɛrɛ ka kojugu kosɔn. Zuda mara mɔgɔw fana be talonna n'u ye.

⁶U be misiw ni begɛnmisɛnw minɛ ka segi ka na ne Masaba yɔrɔ ɲini. Nga, u tena ne ye, ne ye n yɔrɔ jaɲa u la.

⁷U ye ne Masaba janfa, bari u ye ɲamɔgɔdenw wolo. Sisan olu, n'u ka forow bena halaki kalo kelen kɔnɔ.

⁸«Aw ka buru fiyɛ Gibeya dugu kɔnɔ! Aw k'a fiyɛ Arama kɔnɔ! Aw ka mɔgɔw lasɔmi Bɛtavɛni! [1] Bɛnzamɛn kɔmɔgɔw, aw ka kɔlɔsili kɛ aw kɔfɛ!

⁹Efarayimu mara bena kɛ tomo ye u ɲagwan loon na. Ne be min fɔ Isirayɛlidenw ye, o ye wajibiko le ye.

¹⁰Zuda mara ɲamɔgɔw kɛra u ka mara daan yɛlɛmabagaw ye. Ne bena n ka dimi bɔ u la i ko jiba be cɛnni kɛ cogo min na.

¹¹Efarayimu kɔmɔgɔw be tɔɔrɔla, kiti y'u ta cɛn. Bari u tora ka tugu fɛɛn fufafu kɔ.

¹²Ne bena Efarayimu kɔmɔgɔw tɔɔrɔ i ko kabafin. Ne bena Zuda mara mɔgɔw tɔɔrɔ i ko jolijugu.

¹³Efarayimu kɔmɔgɔw y'u ka bana lɔn, Zuda mara mɔgɔw y'u ka joliw ye. O la, Efarayimu kɔmɔgɔw tagara Asirikaw ye, u ye cii sama masacɛba ma. Nga, ale te se k'aw kɛnɛya, a te se k'aw ka joli ban.

¹⁴Bari, ne bena kɛ i ko jara, Efarayimu ka soo ma. Ne bena kɛ i ko waraba, Zuda mara mɔgɔw ma. Ne yɛrɛ le bena fagali kɛ, ne bena taga ni n ka sogo ye, mɔgɔ si tena se k'a bɔsi n na.

¹⁵Ne bena bɔ u cɛma ka to n ka sigiyɔrɔ la fɔɔ n'u y'u ka kojugu lɔn tuma min na k'u ɲaa sin ne ma. Ni sɛgɛn sera u ma, u bena ne yɔrɔ ɲini.»