Read dyu Oze ka kitabu 7 Bible Online

Oze ka kitabu 7 - dyu bible

Oze ka kitabu 7

¹ne b'a fɛ ka Isirayɛli ka tɔɔrɔ ban tuma min na, o waati yɛrɛ la, Efarayimu kɔmɔgɔw ka tilenbaliyakow be ye, Samari ka juguyakow be bɔ kɛnɛ kan. Tiɲɛ na, u be namarakow kɛ. Soonw be don boonw kɔnɔ, benkannikɛlaw fariyanin be kɛnɛma.

²U t'a miiri ko u ka kojuguw bɛɛ maranin be ne fɛ. Sisan, u ka kojuguw le kɛnin be k'u siri, ne ɲaa b'o la.

³«U be masacɛ n'a ka ɲamɔgɔw nisɔndiya, k'a sɔrɔ u kɔnɔ finnin lo.

⁴U bɛɛ ye kakalaw ye. U be i ko dibi gwannin. Kabini a tigi y'a ka mugu nɔɔni k'a bila, a ma tasuma lalaga tugu fɔɔ a fununa.

⁵An ka masacɛ ka loon na, ɲamɔgɔw be minni kɛ fɔɔ ka bana. Masacɛ b'a bolo di a ka mɔgɔkolonw ma.

⁶U kɔnɔ be i ko dibi gwannin, namarako dama le b'u kɔnɔ. Sufɛ, u dusu malanin lo, dugu mana gwɛ, u dusu be gwan i ko tasumaba.

⁷U bɛɛ fariyanin be i ko dibi, u b'u ɲamɔgɔw halaki. U ka masaw bɛɛ benna, nga hali mɔgɔ kelen t'u cɛma min bena kule ne nɔɔ fɛ.

⁸«Efarayimu kɔmɔgɔw ɲagaminin lo ni siya tɔw ye. U kɛra ŋɔmi ye, min ma yɛlɛma tasuma kan.

⁹Lonanw b'u fanga nagasira, u yɛrɛ t'o kala ma. U kunsigi be gwɛra, u yɛrɛ t'o kala ma.

¹⁰Isirayɛlidenw ka yɛrɛboɲa b'u cogo yira. Nga, u do te segira ne Masaba u ka Ala ma. O bɛɛ la, u te ne yɔrɔ ɲini.

¹¹Efarayimu kɔmɔgɔw kɛra i ko tuganin nalonman, min te miiri. U be Ezipitikaw wele k'u ka na u dɛmɛ, u be taga Asirikaw fɛ.

¹²U taatɔ, ne be n ka jɔɔ fili u kan, ne bena u minɛ i ko kɔnɔw. Ni ne y'a mɛn k'u lajɛnna dɔrɔn, ne b'u minɛ.

¹³Bɔnɛ y'u ta ye, bari u be bolila ne ɲa! U ta ye halakili ye, bari u murutira ne ma! Ne do ka kan k'u hɔrɔnya wa? Minw be galonw tigɛra ka la ne kan.

¹⁴U be kulera ne nɔɔ fɛ fu, a ma bɔ u dusu la. Nga, u be to ka kasi u ka dilanw kan. U b'u yɛrɛ fari tigɛtigɛ dumuni, ani duvɛnkɛnɛ kama. U b'u kɔɔ sin ne ma.

¹⁵Ne tun y'u ladi, ka barika don u la. Nga u te foyi miiri ne koo la ni kojugu tɛ.

¹⁶Hali n'u kɔsegira, u te kɔsegi ne Fɛɛn bɛɛ kuntigi ma. U kɛra i ko kala min ɲanaman tɛ. U ɲamɔgɔw bena halaki ni murujan ye u ka dabayakuma kosɔn. Ezipitikaw bena yɛlɛ u ma u ka jamana kɔnɔ.