Read dyu Oze ka kitabu 8 Bible Online

Oze ka kitabu 8 - dyu bible

Oze ka kitabu 8

¹«Aw ka buru fiyɛ! Bari, bɔnɛ be nana ne Masaba ka soo kan, i ko sɛgɛn jigitɔ k'a ka dumuni ta! Bari, u ye ne ka bɛɛn cɛn n'u ye, u murutira ne ka ladiliw ma.

²U b'a la ka kule ne nɔɔ fɛ ko: ‹An ka Ala, an Isirayɛlidenw b'i lɔn.›

³U banna hɛrɛ la. U juguw k'u gwɛn!

⁴U ye masaw sigi k'a sɔrɔ u ma ne ɲininga, u ye ɲamɔgɔw sigi n ɲinɛ ma. U y'u ka warigwɛw n'u ka sanuw ta k'o lalaga joow ye. O be na n'u ka halakili ye.

⁵ Samarikaw, ne banna aw ka turadenni jaa la. Ne dimina u kɔrɔ. Ee! U bena se ka mɔgɔsɔbɛya kɛ tuma jumɛn sa?

⁶Misiden jaa nin bɔra Isirayɛlidenw fɛ, mɔgɔ dɔ ka baara lo, Ala tɛ. Tiɲɛ na, Samari joo nin bɛɛ bena mugumugu.

⁷U ye baarafu kɛ, u fana bena fufafu le sɔrɔ. An b'a lɔn ko ni suman ma kuun sɔrɔ, kisɛ fana te sɔrɔ. Min mana sɔrɔ, lonanw le bena taga n'o ye.

⁸Isirayɛli mara mɔgɔw tagara! U filɛ siya wɛrɛw cɛma, u be i ko mɔgɔ mako t'u la.

⁹U tagara Asirikaw fɛ, u b'u danna i ko kongofali. Efarayimu kɔmɔgɔw ye wari bɔ waasa ka teri sɔrɔ.

¹⁰Hali n'u be boɲafɛnw tilantilan siyaw cɛma, ne bena u lajɛn sisan. Yanni dɔɔni, u bena tɔɔrɔ masacɛ barikaman bolo.

¹¹Efarayimu kɔmɔgɔw ye sɔnnikɛyɔrɔw caya hakɛ yafa kama, o nana u bila hakɛ la.

¹²Hali ne mana n ka sariyaw sɛbɛn k'o caya k'a di u ma, u b'o filɛ i ko lonan dɔ ka koo lo.

¹³U be begɛnw kɛ saraka ye, k'u sogo ɲimi. Nga o man di ne Masaba ye. Sisan, ne hakili b'u ka kojuguw la. N bena u ka hakɛw juru sara u la. U bena kɔsegi Ezipiti jamana na.

¹⁴Isirayɛli mara mɔgɔw ɲinɛna u Danbaga kɔ, ka masasow lɔ. Zuda mara mɔgɔw ye dugu barikaman caaman lɔ. Nga, ne bena tasuma mana o dugu nunu kan!»