Read dyu Oze ka kitabu 9 Bible Online

Oze ka kitabu 9 - dyu bible

Oze ka kitabu 9

¹Isirayɛlidenw, aw kana ɲanagwɛ kɛ, aw kana nisɔndiya i ko siya tɔw. Bari aw y'aw ka Ala to ka taga joow sɔn. Aw ye tɔnɔ min sɔrɔ sumangosiyɔrɔw bɛɛ la, o diyara aw ye.

²Suman min be gosira a kɛnɛ na, ni tulu min be bɔr'a bɔyɔrɔ la, tena kɛ aw ta ye. Aw be duvɛnkura min kɔnɔna, aw tena o nɛnɛ.

³Aw tena to Masaba ka jamana kɔnɔ. Efarayimu kɔmɔgɔw bena kɔsegi Ezipiti jamana na. U bena u tana dumu Asiri jamana na.

⁴U tena Masaba sɔn ni duvɛn ye tugu. U ka sarakaw tena diy'a ye. O bena kɛ u bolo i ko sangadumuni, ni minw bɛɛ y'o dumu, olu bɛɛ be nɔgɔ Ala ɲakɔrɔ. O dumuni nin le bena kɛ u ta ye, o tena don Masaba ka soo.

⁵Aw bena mun le kɛ ɲanagwɛba loon na, Masaba ka lonba la?

⁶A ye, u be bolila halakili ɲa. Ezipiti jamana bena u kunbɛn, Manfisi dugu bena kɛ u kaburu ye! U ka nafolo marayɔrɔw bena fa ŋɔni la, ŋɔni bena falen u ka soow kɔnɔ.

⁷ Ɲagwan waati sera, kojugu juru sarawaati sera. Isirayɛli k'o lɔn! Kira kɛra i ko fatɔ aw ka kojugu caaman kosɔn. Ala ka dalaminɛ hakili ɲagamina aw ka juguya barika kosɔn.

⁸Efarayimu kɔmɔgɔw kɔlɔsibaga be ni ne ka Ala ye, kira lo. U be jaan l'a ka tɛmɛsiraw bɛɛ kan, u b'a kɛlɛ hali a ka Ala ka soo kɔnɔ.

⁹ U kɔgɔra juguya la i ko Gibeyakaw. Ala tena ɲinɛ u ka juguya kɔ, a bena u ka hakɛw juru sara u la.

¹⁰ Masaba y'a fɔ ko: «Ne ye Isirayɛlidenw ye, u tun be i ko *ɛrɛzɛn mɔnin, kongokolon kɔnɔ. Ne y'aw faaw ye, u tun be i ko toro deen fɔlɔw. Nga u tagara se Baalipewɔri dɔrɔn, u y'u yɛrɛ kalifa o maloyafɛn nin ma. O la, u kɛra fɛnjuguw ye i ko fɛɛn min koo ka di u ye.

¹¹Boɲa min be Efarayimu kɔmɔgɔw kan, o bena bɔ pewu i ko kɔnɔ vantɔ. Deen tena wolo tugu, muso tena kɔnɔ ta tugu, muso lasiriko tena fɔ tugu.

¹²Hali n'u ye deenw lamɔ, yanni o deenw ka kɔrɔbaya, ne bena u faran ɲɔgɔn na. Ni ne y'u bila, o ye bɔnɛ ye u ma!

¹³Ne ɲaa be Efarayimu kɔmɔgɔw la, i ko Tiri dugu. U sigiyɔrɔ ka ɲi. Nga, u bena taga n'u deenw ye fagayɔrɔ la.»

¹⁴Masaba, u sɔn. I bena u sɔn ni mun ye? U sɔn ni wolobaliya ye, ni sinjitanya ye.

¹⁵Masaba y'a fɔ ko: «U ka juguya bɛɛ bɔra kɛnɛma Giligali dugu kɔnɔ le. O yɔrɔ la, u koo goyara ne ye. U ka kɛwalijuguw kosɔn, ne bena u gwɛn ka bɔ n ka yɔrɔ la. U koo tena diya ne ye tugu. U ɲamɔgɔw bɛɛ ye banbagaw ye.

¹⁶Efarayimu kɔmɔgɔw ta cɛnna, u lili bɛɛ jara, u tena deen wolo tugu. Hali n'u ye deenw sɔrɔ fana, n'u koo ka di u ye, ne bena u faga.»

¹⁷Ne ka Ala bena u bila bari u ma mɛnni kɛ a fɛ. U bena munumunu siya wɛrɛw cɛma.