Read dyu Zowɛli ka kitabu 2 Bible Online

Zowɛli ka kitabu 2 - dyu bible

Zowɛli ka kitabu 2

¹Aw ka buru fiyɛ *Siyɔn dugu kɔnɔ, aw ka lasɔmili kɛ ne ka kulu senuman kan. Jamana mɔgɔw bɛɛ ka yɛrɛyɛrɛ bari, Masaba ka loon be nana, a surunyana.

²Dibi bena don, dibiba lo. Saan be fin kirikiri, bugun bena kɛ o loon na. Suu be ko ka dibi kɛ kuluw kan cogo min na, cɛnnikɛfɛn barikamanw bena yɔrɔ datugu ten. O ɲɔgɔn ma deli ka ye, a ɲɔgɔn tena ye fana.

³U ɲafɛ, tasuma le be cɛnni kɛra, u kɔfɛ, tasuma le be manana. Jamana b'u ɲafɛ i ko Edɛn yɔrɔɲuman, u tɛmɛnin kɔ, yɔrɔ kɛra lakolon ye, foyi ma to u kɔ.

⁴ U bɔnin be soow le fɛ, u be boli i ko sotigiw.

⁵N'i y'u vantɔ mankan mɛn kuluw kan, a be i ko wotorow bolikan. A be i ko tasumaba mankan, biin kɔnɔ. U be i ko kɛlɛden farimanw, minw labɛnnin lo kɛlɛ kama.

⁶Siyaw be yɛrɛyɛrɛ u ɲa, bɛɛ ɲaa be wulen.

⁷U be girin i ko cɛfariw, u be yɛlɛ kogow kan i ko kɛlɛdenw. U bɛɛ be tilen u ɲafɛ, u si t'a ka sira bila.

⁸U si te ɲɔgɔn ɲɔti, u bɛɛ be tilen n'a ka sira ye. U b'u balifɛnw kari ka tɛmɛ, foyi te se k'u lalɔ.

⁹U be girin dugu kan, u be boli dugu laminikogo kan. U be yɛlɛ boonw kan, u be don ni fenɛtiriw ye i ko soonw.

¹⁰ Dugukolo be yɛrɛyɛrɛ u ɲafɛ, sankolo be ɲagami, tile ni kalo be dibi, lolow te yeelen bɔ tugu.

¹¹ Masaba kumakan be bɔ a ka kɛlɛdenw ɲafɛ, u ka ca kosɔbɛ. Barika b'a ka kuma batobagaw la. Masaba ka loon ye lonba ye, siranyalon lo. Jɔn be se ka lɔ o loon na?

¹²Masaba y'a fɔ ko: «Halibi sa, aw ye kɔsegi ne ma sɔbɛ la, aw ye suun don, ka kasi kosɔbɛ.»

¹³Aw kana aw ka faniw faran dusukasi fɛ, aw k'aw sɔɔn le yɛlɛma. Aw ye kɔsegi Masaba aw ka Ala ma. A ka ɲi, makaritigi lo. A te dimi joona, a ka ɲumanya ka bon kosɔbɛ. N'a ye jama ɲaa gwan, a be tila ka nimisa o la.

¹⁴Jɔn b'a lɔn? N'a sɔrɔ a bena nimisa do, ka hɛrɛ kɛ aw ye. O tuma na, aw bena se ka suman saraka ni jii bɔ Masaba aw ka Ala ye.

¹⁵Aw ka buru fiyɛ *Siyɔn dugu kɔnɔ, aw ka sundonko wango la, aw ka ɲɔgɔnyeba loon sigi ka Ala boɲa.

¹⁶Aw ka jama lajɛn, aw ka ɲɔgɔnye kɛ Ala tɔgɔ la. Aw ka cɛkɔrɔbaw ni denmisɛnw lajɛn, hali minw be siin min. Kɔɲɔcɛ ka bɔ a ka kɔɲɔbon na, kɔɲɔmuso ka bɔ a layɔrɔ la.

¹⁷Sarakalasebagaw ka kasi sarakabɔyɔrɔ ni bulon cɛ, olu minw be baara kɛ Masaba ye. U k'a fɔ ko: «Makari i ka mɔgɔw la, Masaba! E kana i ka mɔgɔw di maloya ma, siya wɛrɛw k'u lɔgɔbɔ! Siya wɛrɛw k'a fɔ ko: ‹U ka Ala be min?› Mun na o bena fɔ?»

¹⁸Masaba ka jamana koo ka d'a ye haali, a be makari a ka jama na.

¹⁹Masaba b'a ka mɔgɔw jaabira ko: «Ayiwa, ne bena suman di, ni duvɛnkɛnɛ, ni tulu. Aw bena wasa o la fana. Abada, ne tena maloya bila aw la siyaw cɛma tugu.

²⁰Aw jugu minw be bɔ kɔgɔdugu ɲafan fɛ, n bena olu yɔrɔ jaɲa aw la, n bena u gwɛn ka taga u bila dugukolo janin na, yɔrɔlakolon na. Ne bena u ɲamɔgɔw fili kɔrɔn fɛ kɔgɔji kɔnɔ, k'u kɔmɔgɔw fili tileben fɛ kɔgɔji kɔnɔ. U suuw kasa bena bɔ ka yɛrɛkɛ fɔɲɔ na. Bari, u ye kobabaw kɛ.»

²¹Dugukolo, kana siran, i nisɔn diya. Bari Masaba be kobabaw le kɛ.

²²Kongosogow, aw kana siran, biin be nugura kongo la. Yiriw be denna, torosun ni *ɛrɛzɛnsunw be denna.

²³*Siyɔnkaw, aw ka nisɔndiya kosɔbɛ Masaba aw ka Ala barika la. Bari, a ye sanji di a dicogo la. A ye sanji fɔlɔ n'a laban di i ko fɔlɔfɔlɔ.

²⁴Sumangosiyɔrɔw bena fa suman na, minanw bena fa duvɛnkɛnɛ ni tulu la.

²⁵«Ne tun ye n ka cɛnnikɛfɛn minw ci aw kama, olu ye cɛnni min kɛ aw fɛ saan damani kɔnɔ, ne bena o ɲɔgɔn segi aw ma. Tumuw ni burunburun, ani tɔnmisɛnw ni tɔnwulenw ye fɛɛn minw cɛn.

²⁶Aw bena dumuni kɛ fɔɔ ka fa, aw bena Masaba aw ka Ala tanu. Ale min ye kobabaw kɛ aw ye. Ne ka mɔgɔw tena maloya sɔrɔ tugu abada.

²⁷Aw ben'a lɔn ko ne be Isirayɛli fɛ, ko ne ye Masaba ye, aw ka Ala, ko dɔ wɛrɛ te yen tugu. Ne ka mɔgɔw tena maloya sɔrɔ tugu abada.