Read dyu Amɔsi ka kitabu 2 Bible Online

Amɔsi ka kitabu 2 - dyu bible

Amɔsi ka kitabu 2

¹ Masaba ko: «Mowabuw ye kojugu minw kɛ, u ye kojugu caaman minw kɛ, ne tena o yafa. Bari, u ye Edɔmu masacɛ kolow jɛni, u y'u jɛni fɔɔ k'o kɛ bugurigwɛ ye.

²Ne bena tasuma mana Mowabu mara kan, n bena Keriyɔti dakamanasow jɛni. Mowabu bena halaki pewu, kɛlɛ mankan ni buru fiyɛkan cɛma.

³Ne ben'a ɲamɔgɔ halaki, n ben'a ka mɔgɔbabaw bɛɛ faga.» Masaba le ko ten.

⁴Masaba ko: «Zuda mara ye kojugu minw kɛ, u ye kojugu caaman minw kɛ, ne tena o yafa. Bari, u ye ne Masaba ka sariya bila gɛrɛfɛ, u ma n ka kuma bato, bari, u faaw tun be joo minw sɔn, olu fana tugura o le kɔ.

⁵Ne bena tasuma mana Zuda mara kan, n bena Zeruzalɛmu dugu dakamanasow jɛni.»

⁶Masaba ko: «Isirayɛli mara ye kojugu minw kɛ, u ye kojugu caaman minw kɛ, ne tena o yafa. Bari, u be mɔgɔtilennin feere wari la, ka fantan falen sanbara seen fila la.

⁷Fantan te tiɲɛ sɔrɔ u fɛ kititigɛyɔrɔ la. U b'u tereke i ko buguri. Deen n'a faa be jɛn sunguru kelen kan, u be ne tɔgɔ senuman cɛn ten.

⁸U be la fani minw kan u ka batoliyɔrɔw bɛɛ la, o ye dɛsɛbagatɔw ka faniw le ye, u ye minw minɛ u fɛ juru dontuma na. U ye mɔgɔw ka duvɛn bɔsi k'o min u ka batolikɛso kɔnɔ.

⁹ K'a sɔrɔ amoriw minw tun ka jan i ko sɛdiriyiriba, fanga tun be minw na i ko joyiri, ne y'olu halaki u ɲana. Ne y'u halaki, k'a ta u deenw ma fɔɔ ka ta'a bila u lili la.

¹⁰Ne le tun y'aw bɔ Ezipiti jamana na, ne y'aw dɛmɛdɛmɛ kongokolon kɔnɔ saan bi naani kɔnɔ waasa aw ka na amoriw ka dugukolo tigiya sɔrɔ.

¹¹ Ne tun y'aw deen dɔw woloma k'u kɛ kiraw ye. Ne tun y'aw ka kanbelen dɔw woloma k'u kɛ n taw ye. [1] O tɛ wa, Isirayɛli jama?» Masaba le ko ten.

¹²«K'a sɔrɔ aw be duvɛn di ne taw ma, k'a fɔ kiraw ye k'u man kan ka kiraya kɛ.

¹³O kama, ne ben'aw nɔɔni yɔrɔnin kelen, i ko wotoro fanin suman na be fɛɛn nɔɔni cogo min na.

¹⁴Min seen ka teli, ale tena dogoyɔrɔ sɔrɔ. Fangatigi ka fanga ten'a mako ɲa. Cɛfari tena se ka kisi.

¹⁵Kalabonla tena lɔ seen kan, min be se boli la kosɔbɛ, o ten'a yɛrɛ bɔsi, sotigi tena se ka kisi.

¹⁶U ka kɛlɛdenw cɛma, cɛfari bena boli bololakolon o loon na.» Masaba le ko ten.