Read dyu Amɔsi ka kitabu 3 Bible Online

Amɔsi ka kitabu 3 - dyu bible

Amɔsi ka kitabu 3

¹Masaba be kuma min fɔra aw Isirayɛlidenw kama, a ye siya min bɛɛ bɔ Ezipiti jamana na, aw k'o lamɛn. A ko:

²«Ne be jantora aw le la siyaw bɛɛ cɛma. O kama, aw ye tilenbaliyako minw bɛɛ kɛ, ne bena o juru sara aw la.»

³Mɔgɔ fila be sira kelen ta ɲɔgɔn fɛ n'u ma bɛn fɔlɔ wa?

⁴Jaracɛ be sɔngɔ tuu kɔnɔ n'a ma sogo sɔrɔ wa? Jara kanbelen be kasi a layɔrɔ la n'a ma sogo dɔ minɛ wa?

⁵Kɔnɔ be minɛ jaan kɔnɔ ni dumunifɛn t'a la wa? Jaan be se ka wili ni fɛɛn dɔ ma don a la wa?

⁶Ni buru fiyɛra dugu kɔnɔ, dugumɔgɔw hakili te ɲagami wa? Ni kojugu sera dugu ma, o ma bɔ Masaba la wa?

⁷Tiɲɛ na, Matigi, Masaba te koo si kɛ n'a m'o gundo yira a ka kiraw la, minw y'a ka baarakɛlaw ye.

⁸Ni jara sɔngɔra, jɔn lo te siran? Ni Matigi, Masaba kumana, jɔn lo t'o kiraya kɛ?

⁹Aw k'a wango la Asidɔdi masaluw kɔnɔ, ani Ezipiti jamana masaluw kɔnɔ k'u ka na lajɛn Samari kuluw kan! Ɲagamini min be dugu kɔnɔ, u k'o filɛ, fariya min be yen, u k'o ye.

¹⁰«Ɲumanya miiri te Samarikaw kɔnɔ fewu.» Masaba le ko ten. Fariyakow ni benkannifɛnw le y'u ka masasow fa.

¹¹O kama, Matigi, Masaba ko: «Aw juguw bena na aw ka jamana lamini k'aw ka fanga bɔsi aw la, k'aw ka masasow kɔnɔfɛnw ta.»

¹²Masaba ko: «Begɛndɛndɛbaga be begɛn dɔ seen fila, walima a tulo tɔɔ sama ka bɔ jara daa la cogo min na, o cogo kelen na, Isirayɛlidenw bena kisi, olu minw siginin be Samari, sigilan ni dilanɲumanw kan.

¹³«Aw ka mɛnni kɛ ka kuma nin fɔ Yakuba ka somɔgɔw ye k'u lasɔmi.» Matigi, Masaba, Setigi Ala le ko ten.

¹⁴ «Ne bena Isirayɛlidenw ka kojugu juru sara u la tuma min na, ne bena Betɛli dugu sarakabɔyɔrɔw gosi, sarakabɔyɔrɔ nɔnkɔnw bena kari ka ben.

¹⁵U ye soo minw lɔ nɛnɛ ni funteni kama, ne bena olu ci, ne bena u ka dakamanasow cɛn, n bena u ka sobabaw halaki.» Masaba le ko ten.