Read dyu Amɔsi ka kitabu 4 Bible Online

Amɔsi ka kitabu 4 - dyu bible

Amɔsi ka kitabu 4

¹Aw, *Basan misiw, aw minw be Samari kulu kan, aw minw be to ka fantanw tɔɔrɔ, aw minw be ben dɛsɛbagatɔw kan, aw minw be to k'a fɔ aw ka sotigiw ye ko: «Na ni dɔrɔ ye, n b'a min!» aw ye mɛnni kɛ.

²Matigi, Masaba ka tilenninya kosɔn, a ko: «Tiɲɛ na, loon dɔ bena se, u bena aw minɛ ni dulenw ye, u bena aw kɔmɔgɔw minɛ ni jaanw ye.

³Aw bena bɔ ni dugu laminikogo woow ye, aw bɛɛ b'aw taayɔrɔ ɲini. U bena aw gwɛn ka taga Arimɔn.» Masaba le ko ten.

⁴«Aw ye taga Ala ka soo, Betɛli dugu kɔnɔ ka kojugu kɛ, aw ye taga Giligali ka dɔ fara aw ka juguya kan. Aw ka na n'aw ka sarakaw ye sɔgɔma joona, aw k'aw ka jakaw bɔ o tile sabanan loon.

⁵Aw ye taga n'aw ka buru ye k'o kɛ foli saraka ye Ala ma. Aw ka wango la ko aw ye boɲafɛn di ne ma, bari o le ka di aw Isirayɛlidenw ye.» Matigi, Masaba le ko ten.

⁶Masaba ko: «Ne le ye kɔngɔ don aw ka duguw bɛɛ la, ne le y'a kɛ dumuni dɛsɛra aw ka sigiyɔrɔw bɛɛ la. Nga aw ma sɔn ka kɔsegi ne ma.

⁷A tun tora kalo saba, aw ka sumanw be mɔ, ne ye sanji tigɛ. Ne y'a kɛ sanji benna dugu dɔ la ka dɔ to. N y'a kɛ a benna foro dɔ la k'o ɲigi k'a sɔrɔ dɔ sumanw jara.

⁸Dugu fila, dugu saba wilila ka dɛmɛdɛmɛ ka taga jii min dugu wɛrɛ la. O bɛɛ n'a ta, u minnɔgɔ ma ban. O n'a ta bɛɛ aw ma sɔn ka kɔsegi ne ma.» Masaba le ko ten.

⁹«Ne y'a kɛ sigɛn y'aw ka sumanw jɛni, k'a kɛ u tolila. Ne y'a to aw ka nankɔw, n'aw ka *ɛrɛzɛnsunw cɛnna. Tɔɔnw y'aw ka torosunw, n'aw ka olivuyiriw ɲimi. Nga aw ma sɔn ka kɔsegi ne ma.» Masaba le ko ten.

¹⁰«Fɔɲɔbana min ye Ezipiti jamana sɔrɔ, ne y'a kɛ o ɲɔgɔn wilila aw kan. Ne y'a to u y'aw ka kanbelenw faga ni murujan ye, k'aw ka soow minɛ. Ne y'a to aw ka kɛlɛdenw suuw kasa wilila u ka sigiyɔrɔ la, aw y'o mɛn. Nga aw ma sɔn ka kɔsegi ne ma.» Masaba le ko ten.

¹¹ «Ne y'aw halaki i ko Sodɔmu ni Gɔmɔri fɔɔ aw tɔɔ tora fitini. Kala tɔɔ be to tasuma fɛ cogo min na, aw tɔɔ tora ten. Nga aw ma sɔn ka kɔsegi ne ma.» Masaba le ko ten.

¹²«Ayiwa Isirayɛlidenw, ne bena min kɛ aw la, o le ye nin ye. Ne bena o kɛ aw la minkɛ, aw k'aw yɛrɛ labɛn k'aw ka Ala kunbɛn.»

¹³Min ye kuluw ni fɔɲɔ dan, ale min b'a ka kolatigɛninw yira adamaden na, ale min be tilefɛ yɛlɛma ka kɛ suu ye, ale min be taama tintinw kan, a tɔgɔ ko Masaba, Setigi Ala.