Read dyu Amɔsi ka kitabu 6 Bible Online

Amɔsi ka kitabu 6 - dyu bible

Amɔsi ka kitabu 6

¹Aw minw siginin be hɛrɛ la *Siyɔn dugu kɔnɔ, bɔnɛ ye aw ta ye! Aw minw be lafiya la Samari kulu kan, bɔnɛ ye aw ta ye! Aw minw kɛra mɔgɔbabaw ye Isirayɛlidenw cɛma, minw ka yɔrɔ ɲɔgɔn tɛ, siya wɛrɛw cɛma, Isirayɛlidenw be to ka taga bɔ aw minw fɛ, bɔnɛ ye aw ta ye!

²Aw ye tɛmɛ Kaline ka filɛli kɛ. N'aw bɔra yen, aw be taga Amati duguba nin na, ka bɔ yen ka taga Gati dugu la, Filisi jamana na. Olu ka fisa n'aw ka maraw ye wa? Olu ka maraw ka bon n'aw taw ye wa?

³Aw t'a fɛ lonjugu ka se, k'a sɔrɔ aw b'a gwɛrɛko le dabɔra!

⁴Aw be la dakamanadilanw kan, aw be la aw ka sigilanw kɔnɔ. Aw be sagatulɔninw ni misiwolomaninw le ɲimi.

⁵Aw be gɔni fɔ dɔrɔn, ka dɔnkili la i ko Dawuda, aw yɛrɛ ka lacogo la.

⁶Aw be duvɛn min ni fiyɛbabaw le ye, k'aw yɛrɛ mɔ ni tulu bɛɛ la ɲumanw le ye. Aw do te hami Yusufu kɔmɔgɔw ka sini benko la!

⁷O kama, minw bena minɛ ka taga jamana wɛrɛ la, aw le bena kɛ u mɔgɔ fɔlɔw ye. Aw ka dumunibabaw bena dabila.

⁸Masaba, Setigi Ala y'a fɔ k'a gwɛlɛya ko: «Yakuba kɔmɔgɔw ka yɛrɛboɲa ka go ne ye haali! U ka dakamana soow koo ka go ne ye! Ne bena Samari dugu bɛɛ to a juguw bolo.

⁹«Ni mɔgɔ tan tora soo min kɔnɔ, olu bena sa.

¹⁰Ni somɔgɔw dɔ y'u suu ta ko a be taga u jɛni, a tɔɲɔgɔn min tora soo kɔnɔ, a ben'a kaan to ale ma ko: ‹Mɔgɔ wɛrɛ be sɔrɔ i fɛ yen wa?› A ben'a jaabi ko: ‹A banna! Je! An man kan ka Masaba tɔgɔ wele dɛ!› »

¹¹Tiɲɛ na, Masaba be kuma dɔrɔn, bonbabaw be ci, misɛnmanw be mugumugu.

¹²Soow be boli fara le kan wa? Mɔgɔ be sɛnɛ kɛ yen ni misiw ye wa? Nga aw be tiɲɛ yɛlɛma k'a kɛ fɛnjugu ye, ka tilenninya nafa yɛlɛma k'o kɛ juguya ye.

¹³Aw minw be nisɔndiya bari aw ye Lodebari dugu minɛ, ka to k'a fɔ ko: «Anw yɛrɛ ka sebagaya le m'a to an ye Karinayimu dugu minɛ wa?» [1]

¹⁴Masaba, Setigi Ala ko: «Ne le bena siya dɔ kɔnɔnasu k'a bila aw Isirayɛlidenw na. O siya nin bena aw tɔɔrɔ k'a ta kɔgɔdugu ɲafan fɛ Lebowamati fɔɔ ka n'a bila Araba kɔɔ la worodugu ɲafan fɛ.»