Read dyu Amɔsi ka kitabu 7 Bible Online

Amɔsi ka kitabu 7 - dyu bible

Amɔsi ka kitabu 7

¹Matigi, Masaba ye fɛɛn min yira ne la, o filɛ: A tun be tɔnwulenw labɛnna caaman. O y'a sɔrɔ masacɛ niyɔrɔ suman tun tigɛra ka ban. Biin minw be nugu sumanw tigɛnin kɔ, olu tun be nugura.

²U tun be dugukolo biinw bɛɛ ɲimina minkɛ, ne ko: «Matigi, Masaba, yafa i ka mɔgɔw ma! Yakuba kɔmɔgɔw bena balo cogo di? See t'u ye.»

³Masaba nana makari. A ko: «O koo nin tena kɛ.»

⁴Matigi, Masaba ye fɛɛn min yira ne la, o filɛ: Matigi, Masaba tun ye tasuma labɛn k'a ka mɔgɔw ɲaa gwan u ka kojugu kosɔn. A tun be dugukolo jukɔrɔ jii banna, ka forow jɛni.

⁵Ne y'a fɔ ko: «Matigi, Masaba, o lalɔ sa! Yakuba kɔmɔgɔw bena balo cogo di? See t'u ye.»

⁶Masaba makarila. A ko: «O koo nin fana tena kɛ.»

⁷Matigi ye fɛɛn min yira ne la, o filɛ: A tun lɔnin be kogo dɔ kan kogo tilenfɛn b'a bolo.

⁸Masaba ye ne ɲininga ko: «Amɔsi, i be mun le yera?» Ne y'a jaabi ko: «Ne ɲaa be kogo tilenfɛn na.» Masaba ko ne ma: «Ne bena kogo tilenfɛn nin jigi n ka jama Isirayɛli cɛma. Ne tena yafa u ma tugu fewu!

⁹ Sɔnnikɛyɔrɔ minw be Isiyaka ka somɔgɔw fɛ, ne bena olu halaki. Ka Isirayɛli ka batolikɛyɔrɔw ci. Ne bena wili masacɛ Zerobowamu ka mɔgɔw kama ni murujan ye.»

¹⁰Sarakalasebagaw ɲamɔgɔ min tun be Betɛli dugu kɔnɔ, n'o ye Amaziyasi ye, ale ye mɔgɔ ci ka ta'a fɔ Isirayɛli masacɛ Zerobowamu ye ko: «Amɔsi b'a fɛ ka janfa siri i la Isirayɛlidenw cɛma dɛ! Jamanadenw te sera k'a ka kuma muɲu tugu dɛ! Bari a b'a fɔra ko:

¹¹‹Murujan le bena Zerobowamu halaki, Isirayɛlidenw bɛɛ be minɛ ka taga fɔɔ yɔrɔjan na!› »

¹²O kɔ, Amaziyasi y'a fɔ Amɔsi ye ko: «Kira, tɛmɛ! taga Zuda mara la k'i ka kiraya kɛ yen k'i ka balo sɔrɔ.

¹³Kana kirayakuma fɔ yan Betɛli tugu. Bari, yan ye masacɛ ka batolikɛyɔrɔ ye, jamana ka batolikɛyɔrɔba lo!»

¹⁴Amɔsi ye Amaziyasi jaabi ko: «Ne tun te kira ye, ne te kiraya kɛ n ka balo kama, nga ne ye begɛnmarabaga le ye, yiriforo be n fɛ.

¹⁵Masaba ye ne to n ka begɛnw kɔfɛ ka n wele, k'a fɔ n ye ko: ‹taga kiraya kɛ n ka jama Isirayɛli ye.›

¹⁶Ele Amaziyasi do ko ne kana kirayakumajugu fɔ Isirayɛlidenw koo la, ko ne kana dajugu la Isiyaka ka somɔgɔw kan. O la, i tulo malɔ Masaba ka kuma na sisan.

¹⁷«Masaba ko: ‹I ka muso bena kɛ jantara ye dugu kɔnɔ. I dencɛw n'i denmusow bena faga ni murujan le ye. Juruw bena la k'i ka forow tilan. Ele yɛrɛ bena taga sa dugukolo min kan, o yɛrɛ danganin be. Isirayɛlidenw bena minɛ ka taga fɔɔ yɔrɔjan.› »