Read dyu Amɔsi ka kitabu 8 Bible Online

Amɔsi ka kitabu 8 - dyu bible

Amɔsi ka kitabu 8

¹Matigi, Masaba ye fɛɛn min yira ne la, o filɛ: Yiriden sinsin ɲaa kelen tun lo. Yiriden minw be mɔ laban na, olu tun lo.

²A ko ne ma: «Amɔsi, i ɲaa be mun le la?» Ne y'a jaabi ko: «Yiriden minw be mɔ laban na, o sinsin ɲaa kelen lo.» Masaba ko n ma: «Ne ka jama Isirayɛli ka koo labanwaati le sera fana. N tena yafa u ma tugu.

³Makaridɔnkiliw le bena la masaso kɔnɔ o loon na.» Matigi, Masaba le ko ten. «Suuw bena caya, yɔrɔ bɛɛ be sumaya tɛtɛtɛ.»

⁴Amɔsi ko: «Aw minw be ben fantanw kan, aw minw be jamana dɛsɛbagatɔw nagasi, aw ye tulo malɔ.

⁵Aw minw b'a fɔ ko: ‹Kalokura ɲanagwɛ bena ban tuma jumɛn sa, waasa an b'an ka sumanw feere? Lafiɲɛlon bena tɛmɛ tuma jumɛn sa, waasa an be bɔ n'an ka sumanbɔɔrɔw ye, ka gongo dɔgɔya, ka dɔ far'a sɔngɔ kan, ka namara don kilo la?

⁶An bena dɛsɛbagatɔw san ni wari ye, ka fantan falen sanbara seen fila la. Hali suman bugu, an ben'a feere!› »

⁷Ayiwa, Masaba, Yakuba ka Ala y'a fɔ ka gwɛlɛya ko: «Ne tena ɲinɛ u ka kɛwaliw si kɔ.

⁸Yala o tena kɛ sababu ye dugukolo be yɛrɛyɛrɛ ka mɔgɔw bɛɛ bila dusukasi la wa? A bena wili i ko Nili baji, a bena funu ka tila ka jigi, i ko Ezipiti kɔba.»

⁹Matigi, Masaba ko: «O loon na, n bena suu ko tilegwangwan fɛ. Dibi bena kɛ dugukolo kan k'a sɔrɔ tilefɛ lo.

¹⁰Ne ben'a kɛ aw ka ɲanagwɛw be yɛlɛma ka kɛ sangaw ye. Aw ka dɔnkiliw bɛɛ bena yɛlɛma ka kɛ kasi ye. Ne ben'a kɛ bɛɛ be dusukasifani don, k'u kuunw li. O bena kɛ i ko dencɛ kelenpe sayako. A laban bena kɛ lonjugu ye.»

¹¹Matigi, Masaba ko: «Waati dɔ bena se, ne bena kɔngɔ yɛrɛkɛ jamana kɔnɔ. A tena kɛ dumuniko, walima jiko ye dɛ! Nga o bena kɛ Masaba ka kuma mɛnko nigɛ ye.

¹²U bena to ka dɛmɛdɛmɛ ka bɔ kɔgɔji kelen daa la ka taga dɔ wɛrɛ daa la. U bena munumunu ka bɔ kɔgɔdugu ɲafan fɛ ka taga kɔrɔn fɛ n'u be Masaba ka kuma fɔbaga yɔrɔ ɲini. Nga u ten'a ye.

¹³O loon na, kanbelenkɔgɔninw ni sungurufaninw barika bena ban minnɔgɔ bolo.

¹⁴Minw be Samari joo wele, minw be Dan joo wele, minw be Bɛriseba joo wele, olu bena ben, u te wili tugu.»