Read dyu Amɔsi ka kitabu 9 Bible Online

Amɔsi ka kitabu 9 - dyu bible

Amɔsi ka kitabu 9

¹Ne ye Masaba lɔnin ye sarakabɔyɔrɔ kan k'a fɔ ko: «Alabatoso tutunanw sanfɛla gosi waasa soo juu ka yuguyugu ka ben, mɔgɔw bɛɛ kuun ka ci. Ne bena tɔɔ nunu faga ni murujan ye. Hali mɔgɔ si tena se ka boli u cɛma. Mɔgɔ si tena kisi.

²Hali n'u sera ka lahara masɔrɔ, ne bena u sama ka bɔ yen. N'u yɛlɛla ka taga sankolo la, ne bena jigi n'u ye.

³N'u tagara dogo Karimɛli kulu kunna, ne be taga u yɔrɔ ɲini k'u minɛ yen. N'u tagara kɔgɔji jukɔrɔ ka tunu n na, ne be sira di jii kɔnɔ saa ma k'u cin.

⁴N'u tagara u yɛrɛ di ka kɛ jɔɔnw ye u juguw fɛ, ne be sira di u b'u faga ni murujan ye. Ne ɲaa bena to u kan, a tena kɛ u ka hɛrɛko ye fɔɔ u ka bɔnɛ.»

⁵Masa Ala, Setigi! A mana maga dugukolo la, o be yɛrɛyɛrɛ, diɲɛ mɔgɔw bɛɛ dusu be kasi. A be wili i ko Nili baji, a be jigi i ko Ezipiti kɔba.

⁶Min b'a ka soo labɛn sankolo kɔnɔ, k'a juu sigi dugukolo kan, min be kɔgɔji bɔ k'a yɛrɛkɛ dugukolo kan, ale tɔgɔ le ko Masaba.

⁷Masaba ko: «Isirayɛlidenw, aw te i ko Etiyopikaw ne fɛ wa? Ne le ma bɔ ni Isirayɛlidenw ye Ezipiti jamana na i ko ne bɔra ni filisiw ye cogo min na Kafitɔri [1] wa? Ka bɔ ni Sirikaw ye Kiri wa?

⁸«Ayiwa, ne Matigi, Masaba ɲaa be jamanajugu la. Ne bena u halaki ka bɔ dugukolo kan. Nga n tena Yakuba ka soo bɛɛ halaki.» Masaba le ko ten.

⁹«Ne bena sira di ka Isirayɛlidenw yɛlɛmayɛlɛma siyaw bɛɛ cɛma i n'a fɔ mɔgɔ be suman bugubugu cogo min na k'a bɛrɛmisɛnw bɛɛ bɔ, kisɛ si kana ben.

¹⁰Minw bɛɛ ye kojugu kɛ n ka mɔgɔw cɛma, olu bɛɛ bena faga ni murujan ye. Minw b'a fɔ ko: ‹Kojugu tena se an ma, a tena an sɔrɔ.› »

¹¹ Masaba ko: «Loon dɔ, Dawuda ka soo min benna, ne bena o lɔ kura ye. Ne ben'a lɔgɔw lalaga ka tomo nin wili ka lɔ. Ne bena fanga d'a ma ka kɛ i ko fɔlɔfɔlɔ,

¹²waasa, Edɔmu mara tɔɔ min tora, o ni siyaw bɛɛ ka maraw ka kɛ u ta ye, ne tɔgɔ lara siya minw kan.» Masaba min bena o kɛ, ale lo ko ten.

¹³Masaba ko: «Waati dɔ bena se, sumantigɛ bantɔ, sɛnɛ kɛtɔ, *ɛrɛzɛn jibɔko bantɔ, danni kɛtɔ. Ɛrɛzɛnsunw bena ɲa kuluw kan kosɔbɛ, sɔrɔli bena kɛ tintinw bɛɛ kan.

¹⁴Ne bena n ka jama Isirayɛli cogo yɛlɛma tugu. U bena dugu cininw lɔ ka sigi yen. U bena ɛrɛzɛnforow bɔ, k'u duvɛn min, u bena nankɔw sɛnɛ, k'u tɔnɔ dumu.

¹⁵Ne ben'a to u be sigi u ka jamana la, ne ye min di u ma. Mɔgɔ si tena u wili ka bɔ yen tugu abada.» Masaba i ka Ala ko ten!