Read dyu Zonasi ka kitabu 1 Bible Online

Zonasi ka kitabu 1 - dyu bible

Zonasi ka kitabu 1

¹ Loon dɔ, Masaba kumana Amitayi dencɛ Zonasi fɛ ko:

²«Wili ka taga Ninivu, duguba nin kɔnɔ, ka sɔngɔ dugu mɔgɔw kunna k'u ka juguya nigɛ bɔra n na.»

³Nga Zonasi wilila ka Tarisisi sira ta, a tun b'a fɛ ka boli k'a yɔrɔ jaɲa Masaba la. A sera Zafa ka kurun dɔ sɔrɔ yen min tun be tagara Tarisisi. A ye taasɔngɔ sara ka don u fɛ kurun kɔnɔ ka Tarisisi sira minɛ waasa a yɔrɔ ka jaɲa Masaba la.

⁴Nga Masaba y'a kɛ fɔɲɔba dɔ wilila kɔgɔji kan. Fɔɲɔ nin juguyara fɔɔ kurun tun be ɲini ka halaki.

⁵Kurun bolibaga nunu siranna kosɔbɛ, u kelen kelen bɛɛ y'u ka joow wele waasa u k'u dɛmɛ. U ye kurun kɔnɔ minanw fili jii la waasa a ka fiɲɛya. O y'a sɔrɔ Zonasi jigira kurun jukɔrɔ, ka la n'a be sinɔgɔ.

⁶O tuma na, kurun bolilaw ɲamɔgɔ jigira k'a fɔ a ye ko: «Ee! E be sinɔgɔra le wa? Wili k'i ka batofɛn daali. N'a sɔrɔ ale ben'a janto an na k'an kisi saya ma.»

⁷O kɔ, kurun bolibagaw y'a fɔ ɲɔgɔn ye k'u bena kala la ka kojugu nin bɔyɔrɔ ɲini ni mɔgɔ min sababu lo. U ye kala la, a yirala ko Zonasi lo.

⁸O la, u y'a ɲininga ko: «E ka baara ye mun ye? O ɲafɔ an ye. E bɔra min? E ye jamana jumɛn deen le ye? I ye siya jumɛn ye?»

⁹A y'u jaabi ko: «Ne ye eburu ye, Masa Ala, Sankolotigi, min ye kɔgɔji ni dugukolo dan, ne be ale lo bato.»

¹⁰A y'a ka koo ɲafɔ u ye, ko a be bolila Masaba le ɲa. Mɔgɔ nunu siranna kosɔbɛ. U y'a ɲininga tugu ko: «I ye mun le kɛ ten?»

¹¹Jii tun be funufununa kosɔbɛ minkɛ, u ye Zonasi ɲininga tugu ko: «An ka kan ka mun kɛ i la waasa kɔgɔji ka mala?»

¹²A y'u jaabi ko: «N'aw ye n minɛ ka n fili jii la, jii tena funufunu tugu. Ne y'a lɔn ko ne kama lo fɔɲɔ b'aw ɲaa gwanna.»

¹³Yanni u k'o kɛ, kurun bolilaw banbana waasa ka se ni kurun ye baa dagolo la. Nga u ma se, dɔ tun be farala jii barika kan dɔrɔn.

¹⁴O la, u ye Masaba daali ko: «Ee! Masaba, sabali! Kan'a to cɛɛ nin kosɔn an bɛɛ be sa ɲɔgɔn fɛ! I kana an jalaki ko an ye mɔgɔ faga gwansan, an nɔɔ tɛ. Bari, ele Masaba be min fɛ, e b'o le kɛ.»

¹⁵Mɔgɔ nunu ye Zonasi minɛ k'a fili kɔgɔji la. O yɔrɔnin bɛɛ jii malara.

¹⁶U siranna Masaba ɲa kosɔbɛ, u ye saraka bɔ a ye ani ka dajuru ta a ye.