Read dyu Kongokolon kɔnɔ kitabu 1 Bible Online

Kongokolon kɔnɔ kitabu 1 - dyu bible

Kongokolon kɔnɔ kitabu 1

¹ Ka Isirayɛlidenw to kongokolon kɔnɔ Sinayi kulu gɛrɛfɛ, u bɔnin kɔ Ezipiti jamana na, a saan filanan kalo filanan tile fɔlɔ loon, Masaba kumana Musa fɛ Ɲɔgɔnkunbɛn fanibugu kɔnɔ ko:

²«I ka Isirayɛli jama bɛɛ mɔgɔda jati, fadenw fadenw, ni gwaso gwaso, u tɔgɔ ka sɛbɛn kelen kelen, cɛɛw bɛɛ.

³Ele ni Arɔn, aw bena u jati ka kɛɲɛ n'u ka kɛlɛden jɛnkuluw cogo ye, Isirayɛliden minw bɛɛ be se ka taga kɛlɛ la, n'u ye saan mugan sɔrɔ ani ka tɛmɛ o kan.

⁴Mɔgɔ kelen kelen ka kan ka bɔ Isirayɛli ka deen tan ni fila kɔmɔgɔw cɛma ka fara aw kan, olu ka kɛ gwatigiw ye.

⁵Mɔgɔ minw ka kan ka fara aw kan, olu tɔgɔ filɛ: Urubɛn kɔmɔgɔw fɛ: — Sedewuri dencɛ Elisuri

⁶Simeyɔn kɔmɔgɔw fɛ: — Surisadayi dencɛ Selumiyɛli

⁷Zuda kɔmɔgɔw fɛ: — Aminadabu dencɛ Nasɔn

⁸Isakari kɔmɔgɔw fɛ: — Suwari dencɛ Netanɛli

⁹Zabulɔn kɔmɔgɔw fɛ: — Elɔn dencɛ Eliyabu

¹⁰«Yusufu deenw Efarayimu ni Manase kɔmɔgɔw fɛ: Efarayimu: — Amiwudi dencɛ Elisama Manase: — Pedasuri dencɛ Gameliyɛli.

¹¹Bɛnzamɛn kɔmɔgɔw fɛ: — Gidewoni dencɛ Abidan

¹²Dan kɔmɔgɔw fɛ: — Amisadayi dencɛ Ayezɛri

¹³Asɛri kɔmɔgɔw fɛ: — Okiran dencɛ Pagiyɛli

¹⁴Gadi kɔmɔgɔw fɛ: — Dewuyɛli dencɛ Eliyazafu

¹⁵Nɛfutali kɔmɔgɔw fɛ: — Enan dencɛ Ayira.»

¹⁶Mɔgɔ minw tun wolomana ka bɔ jama cɛma, olu le ye nunu ye. U tun kɛra u faaw kɔmɔgɔw kuntigiw ye. Olu le tun ye kɛlɛden jɛnkuluw kuntigiw ye.

¹⁷Mɔgɔ minw tun wolomana n'u tɔgɔ fɔra, Musa ni Arɔn ye olu fara u yɛrɛ kan.

¹⁸U ye Isirayɛlidenw bɛɛ lajɛn kalo filanan tile fɔlɔ loon. Ka kɛɲɛ n'u ka fadenyabolow ni gwatigiw ye, mɔgɔ minw ye saan mugan sɔrɔ ani minw tɛmɛna o kan, u ye olu tɔgɔ sɛbɛn kelen kelen, cɛɛw bɛɛ.

¹⁹Musa y'u jati kongokolon kɔnɔ Sinayi kulu gɛrɛfɛ ka kɛɲɛ ni Masaba ka fɔta ye.

²⁰Urubɛn min tun ye Isirayɛli deen fɔlɔ ye, u ye ale kɔmɔgɔw tɔgɔ sɛbɛn ka kɛɲɛ ni fadenyabolow ni gwatigiw ye u ka buruju la, k'a ta cɛɛw ma minw ye saan mugan sɔrɔ ani ka tɛmɛ o kan, u ye olu bɛɛ tɔgɔ sɛbɛn kelen kelen k'u jati, minw bɛɛ tun be se ka taga kɛlɛ la.

²¹Mɔgɔ minw jatira ka sɔrɔ Urubɛn kɔmɔgɔw fɛ, olu kɛra mɔgɔ waa bi naani ni wɔɔrɔ ani kɛmɛ duuru (46 500) ye.

²²U ye Simeyɔn taw tɔgɔ sɛbɛn ka kɛɲɛ n'u fadenyabolo ye n'u gwatigiw ye, u ka buruju la. Cɛden minw bɛɛ jatira k'a ta saan mugan ma ani ka tɛmɛ o kan, minw tun be se ka taga kɛlɛ la.

²³O kɛra mɔgɔ waa bi duuru ni kɔnɔntɔn ani kɛmɛ saba (59 300) ye.

²⁴U ye Gadi kɔmɔgɔw tɔgɔ sɛbɛn ka kɛɲɛ n'u fadenyabolo ye, n'u gwatigiw ye, u ka buruju la, u ye sanmugandenw le jati, ani minw tɛmɛna o kan, minw bɛɛ be se ka taga kɛlɛ la.

²⁵O kɛra mɔgɔ waa bi naani ni duuru, ani kɛmɛ wɔɔrɔ ni bi duuru (45 650) ye.

²⁶U ye Zuda taw tɔgɔ sɛbɛn ka kɛɲɛ n'a fadenyabolo ye n'u gwatigiw ye, u ka buruju la, u ye sanmugandenw le jati, ani minw tɛmɛna o kan, minw bɛɛ be se ka taga kɛlɛ la.

²⁷O kɛra mɔgɔ waa bi wolonwula ni naani, ani kɛmɛ wɔɔrɔ (74 600) ye.

²⁸U ye Isakari taw tɔgɔ sɛbɛn k'a ta saan mugan ma fɔɔ ka yɛlɛ, ka kɛɲɛ n'u fadenyabolo ye n'u gwatigiw ye, u ka buruju la, minw bɛɛ be se ka taga kɛlɛ la.

²⁹O kɛra mɔgɔ waa bi duuru ni naani, ani kɛmɛ naani (54 400) ye.

³⁰U ye Zabulɔn taw tɔgɔ sɛbɛn k'a ta saan mugan ma fɔɔ ka yɛlɛ, minw bɛɛ be se ka taga kɛlɛ la ka kɛɲɛ n'u fadenyabolo ye n'u gwatigiw ye, u ka buruju la.

³¹O kɛra mɔgɔ waa bi duuru ni wolonwula, ani kɛmɛ naani (57 400) ye.

³²Yusufu deenw ta filɛ. Efarayimu ta, u ye olu ka buruju sɛbɛn ka kɛɲɛ n'u fadenyabolo ye n'u gwatigiw, k'a ta sanmugandenw ma fɔɔ ka yɛlɛ, minw bɛɛ be se ka taga kɛlɛ la.

³³O kɛra mɔgɔ waa bi naani ani kɛmɛ duuru (40 500) ye.

³⁴Manase taw, u ye olu buruju sɛbɛn ka kɛɲɛ n'u gwatigiw, n'u fadenyabolo ye, k'a ta sanmugandenw ma fɔɔ ka yɛlɛ, minw bɛɛ be se ka taga kɛlɛ la.

³⁵O kɛra mɔgɔ waa bi saba ni fila, ani kɛmɛ fila (32 200) ye.

³⁶U ye Bɛnzamɛn taw tɔgɔ sɛbɛn ka kɛɲɛ n'u fadenyabolo n'u gwatigiw ye, u ka buruju la, k'a ta sanmugandenw ma fɔɔ ka yɛlɛ, minw bɛɛ be se ka taga kɛlɛ la.

³⁷O kɛra mɔgɔ waa bi saba ni duuru, ani kɛmɛ naani (35 400) ye.

³⁸U ye Dan taw sɛbɛn ka kɛɲɛ n'u fadenyabolo n'u gwatigiw ye, u ka buruju la, k'a ta sanmugandenw ma fɔɔ ka yɛlɛ, minw bɛɛ be se ka taga kɛlɛ la.

³⁹O kɛra mɔgɔ waa bi wɔɔrɔ ni fila ani kɛmɛ wolonwula (62 700) ye.

⁴⁰U ye Asɛri taw sɛbɛn ka kɛɲɛ n'u fadenyabolo ye n'u gwatigiw ye u ka buruju la, k'a ta sanmugandenw ma fɔɔ ka yɛlɛ, minw bɛɛ be se ka taga kɛlɛ la.

⁴¹O kɛra mɔgɔ waa bi naani ni kelen ani kɛmɛ duuru (41 500) ye.

⁴²U ye Nɛfutali taw sɛbɛn ka kɛɲɛ n'u fadenyabolo n'u gwatigiw ye, u ka buruju la, k'a ta sanmugandenw ma fɔɔ ka yɛlɛ, minw bɛɛ be se ka taga kɛlɛ la.

⁴³O kɛra mɔgɔ waa bi duuru ni saba ani kɛmɛ naani (53 400) ye.

⁴⁴Musa ni Arɔn ani ɲamɔgɔ tan ni fila nunu, minw bɔra Isirayɛli deen tan ni fila nunu na kelen kelen, olu ye Isirayɛliden minw jati, olu le y'o ye.

⁴⁵Isirayɛliden minw bɛɛ jatira k'a ta sanmugandenw ma fɔɔ ka yɛlɛ, minw bɛɛ be se ka taga kɛlɛ la,

⁴⁶o kɛra mɔgɔ waa kɛmɛ wɔɔrɔ ni waa saba ani kɛmɛ duuru ni bi duuru (603 550) ye.

⁴⁷Levi kɔmɔgɔw fadenyabolo ma jati ka fara u kan.

⁴⁸Masaba y'a fɔ Musa ye ko:

⁴⁹«Kana Levi kɔmɔgɔw jati, kana u tɔgɔ fana sɛbɛn ka fara Isirayɛliden tɔw kan.

⁵⁰Ne ka layidu walaka be bila fanibugu min kɔnɔ, o baara koo don Levi kɔmɔgɔw bolo, n'a kɔnɔnaminanw bɛɛ, ani fɛɛn o fɛɛn ye o yɔrɔ ta ye. U bena to k'a walaka k'a ta, ani a kɔnɔnaminanw bɛɛ. A kɔnɔnabaara bena to u bolo, u bena sigi k'a lamini.

⁵¹Ni bugu nin ka kan ka taga yɔrɔ wɛrɛ la, Levi kɔmɔgɔw le b'a walaka. N'a ka kan ka lɔ, olu le b'a lɔ. Ni mɔgɔ wɛrɛ gwɛrɛl'a la, o tigi be faga.

⁵²Isirayɛliden tɔw bena sigi, u kelen kelen bɛɛ n'u ka sigiyɔrɔ, ka kɛɲɛ n'u ka kɛlɛden jɛnkuluw ye u ka taamasiɲɛ kɔrɔ.

⁵³Levi kɔmɔgɔw le bena sigi ka bugu nin lamini, janko ne kana dimi jama kɔrɔ. U bena to k'a kɔlɔsi.»

⁵⁴Masaba tun ye koo minw bɛɛ fɔ Musa ye, Isirayɛlidenw ye olu kɛ tigitigi.