Read dyu Kongokolon kɔnɔ kitabu 10 Bible Online

Kongokolon kɔnɔ kitabu 10 - dyu bible

Kongokolon kɔnɔ kitabu 10

¹Masaba y'a fɔ Musa ye ko:

²«I ka buru fiyɛta fila dilan ni warigwɛ ye. N'i b'a fɛ ka jama lajɛn, walima n'u ka kan ka wili ka taga tuma min na, i k'u fiyɛ.

³Ni u b'o fila bɛɛ fiyɛ tuma min na, jama bɛɛ ka lajɛn i gɛrɛfɛ Ɲɔgɔnkunbɛn fanibugu daa la.

⁴Ni buru kelen dama le be fiyɛ, Isirayɛlidenw fadenyabolow ɲamɔgɔw le be na lajɛn i gɛrɛfɛ.

⁵N'u ye buru fiyɛ belebele tuma min na, mɔgɔ minw be kɔrɔn fɛ, olu ka wili ka taama daminɛ.

⁶N'u ye buru nin fiyɛ belebele a siɲɛ filanan na fana, minw be worodugu ɲafan fɛ, olu ka wili ka taga. Buru kaan bena kɛ taamasiɲɛ ye k'a fɔ u ye ko u wilituma sera.

⁷Ni jama ka kan ka lajɛn, aw ka buruw fiyɛ, nga aw kana u fiyɛ belebele.

⁸Arɔn kɔmɔgɔ sarakalasebagaw le be buruw fiyɛ. O bena kɛ sariya ye min tena dabila abada aw, ni aw kɔmɔgɔw bɛɛ fɛ.

⁹K'aw to aw ka jamana na, n'aw jugu dɔw k'u ben'aw kɛlɛ, ni aw wilila ko aw be taga u kɛlɛ tuma min na, aw ka buruw fiyɛ belebele. O la, ne Masaba aw ka Ala bena n hakili to aw la k'aw kisi aw juguw ma.

¹⁰Aw ka ɲanagwɛlonw na fana, aw ka kalokura ɲanagwɛw la, n'aw ka ɲanagwɛ tɔw loonw na, n'aw b'aw ka saraka jɛnitaw n'aw ka jɛnɲɔgɔnya sarakaw bɔ tuma min na, aw ka buruw fiyɛ. U bena aw ka Ala hakili jigi aw ka koo la. Ne le ye Masaba ye, aw ka Ala.»

¹¹Isirayɛlidenw bɔnin kɔ Ezipiti saan filanan kalo filanan tile mugannan loon, sankaba wilila ka bɔ fanibugu kunna, min ye sariya walakaw marayɔrɔ ye.

¹²Isirayɛlidenw wilila ka bɔ kongokolon kɔnɔ Sinayi kulu gɛrɛfɛ. Sankaba tagara lɔ Paran kongokolon kɔnɔ.

¹³O kɛra u wiliko fɔlɔ ye ka kɛɲɛ ni Masaba ka kuma ye, a ye min fɔ Musa barika la.

¹⁴Zuda kɔmɔgɔw ka sigiyɔrɔ mɔgɔw n'u la kɛlɛdenw le kɔnna ka wili n'u ka taamasiɲɛ ye. Aminadabu dencɛ Nasɔn tun ye Zuda kɔmɔgɔw la kɛlɛdenw ɲamɔgɔ ye.

¹⁵Suwari dencɛ Netanɛli tun ye Isakari kɔmɔgɔw la kɛlɛdenw ɲamɔgɔ ye.

¹⁶Elɔn dencɛ Eliyabu tun ye Zabulɔn kɔmɔgɔw la kɛlɛdenw ɲamɔgɔ ye.

¹⁷O kɔ, u ye fanibugu walaka, Gɛrisɔn kɔmɔgɔw ni Merari kɔmɔgɔw y'a ta ka taga n'a ye.

¹⁸O kɔ, Urubɛn kɔmɔgɔw ka sigiyɔrɔ mɔgɔw wilila n'u la kɛlɛdenw, n'u ka taamasiɲɛ ye. Sedewuri dencɛ Elisuri tun ye Urubɛn kɔmɔgɔw la kɛlɛdenw ɲamɔgɔ ye.

¹⁹Surisadayi dencɛ Selumiyɛli tun ye Simeyɔn kɔmɔgɔw la kɛlɛdenw ɲamɔgɔ ye.

²⁰Dewuyɛli dencɛ Eliyasafu tun ye Gadi kɔmɔgɔw la kɛlɛdenw ɲamɔgɔ ye.

²¹O kɔ, Keyati kɔmɔgɔw ye Ala ka sigiyɔrɔ minanw ta ka tugu. U ɲamɔgɔw tun ka kan ka fanibugu nin lɔ sanni u ka se.

²²O kɔ tugu, Efarayimu kɔmɔgɔw ka sigiyɔrɔ mɔgɔw wilila n'u la kɛlɛdenw, n'u ka taamasiɲɛ ye. Amiwudi dencɛ Elisama le tun ye Efarayimu kɔmɔgɔw la kɛlɛdenw ɲamɔgɔ ye.

²³Pedasuri dencɛ Gamaliyɛli tun ye Manase kɔmɔgɔw la kɛlɛdenw ɲamɔgɔ ye.

²⁴Gidewoni dencɛ Abidan tun ye Bɛnzamɛn kɔmɔgɔw la kɛlɛdenw ɲamɔgɔ ye.

²⁵A laban na, Dan kɔmɔgɔw ka sigiyɔrɔ mɔgɔw wilila n'u la kɛlɛdenw n'u ka taamasiɲɛ ye, ka tugu tɔ nunu bɛɛ kɔ. Amisadayi dencɛ Ayezɛri tun ye Dan kɔmɔgɔw la kɛlɛdenw ɲamɔgɔ ye.

²⁶Okiran dencɛ Pagiyɛli tun ye Asɛri kɔmɔgɔw la kɛlɛdenw ɲamɔgɔ ye.

²⁷Enan dencɛ Ayira tun ye Nɛfutali kɔmɔgɔw la kɛlɛdenw ɲamɔgɔ ye.

²⁸O ye Isirayɛlidenw wilicogo ye, u n'u la kɛlɛdenw, ka tugu ɲɔgɔn kɔ u taatuma na.

²⁹Musa y'a fɔ a birancɛ, madiyankan Erewuyɛli dencɛ Obabu ye ko: «Masaba y'a fɔ ko a bena yɔrɔ min d'an ma, an taatɔ filɛ o yɔrɔ la sisan. Na an be taga ɲɔgɔn fɛ, Masaba ye layidu ta ko a bena koɲuman min kɛ Isirayɛlidenw ye, i bena dɔ sɔrɔ o la an fɛ.»

³⁰Obabu y'a jaabi ko: «Ne tena taga n'aw ye, ne be kɔsegi ka taga n ka jamana na, n faso la.»

³¹Musa y'a fɔ a ye ko: «Ne b'i daali, kana faran an na. An be se ka sigi yɔrɔ minw na yan kongokolon kɔnɔ, i b'o lɔn minkɛ, i be se ka sira yira an na.

³²N'i tagara n'an ye, Masaba bena koɲuman min kɛ an ye, i bena dɔ sɔrɔ o la an fɛ.»

³³U wilila ka bɔ Masaba ka kulu kɔrɔ ka tile saba taama kɛ. Masaba ka layidu taamasiɲɛ kɛsu bilara u ɲa o tile saba kɔnɔ ka lafiɲɛyɔrɔ ɲini u ye.

³⁴U taatuma na, Masaba ka sankaba tun b'u kunna tilefɛ.

³⁵ Ni kɛsu nin tun kɔrɔtara ka taga tuma o tuma, Musa tun be to k'a fɔ ko: «Masaba, wili! I juguw ka jɛnsɛn, i kɔniyabagaw ka boli i ɲa.»

³⁶N'a tun be lɔ tuma min na, a tun b'a fɔ ko: «Masaba, kɔsegi Isirayɛlidenw cɛma, mɔgɔ waa caaman minw daa te se ka lɔn.»