Read dyu Kongokolon kɔnɔ kitabu 16 Bible Online

Kongokolon kɔnɔ kitabu 16 - dyu bible

Kongokolon kɔnɔ kitabu 16

¹ Levi dencɛ Keyati deen Yiseyari dencɛ Kore ye Eliyabu dencɛ Datan ni Abiramu, ani Pɛlɛti dencɛ One kɔnɔnasu. O mɔgɔ saba nunu tun ye Urubɛn kɔmɔgɔw ye.

²U bɛɛ wilila Musa kama. Isirayɛlidenw ɲamɔgɔ kɛmɛ fila ni bi duuru farala u kan. Jama tun ye mɔgɔ minw woloma k'u bila u ɲafɛ, olu dɔw tun lo, u tɔgɔ tun bɔnin lo.

³U ye ɲɔgɔn lajɛn ka na Musa ni Arɔn fɛ janko k'u kɛlɛ. U ko: «Aw ta tɛmɛn'a daan kan! Jama bɛɛ lajɛnnin ye Masaba ta ye, Masaba be olu fana fɛ. Mun na aw b'aw yɛrɛ fisaya ni Masaba ka jama ye?»

⁴Musa y'o mɛn tuma min na, a lara duguma k'a ɲaa biri.

⁵A y'a fɔ Kore n'a ka jama bɛɛ ye ko: «Sini sɔgɔma, mɔgɔ min ye Masaba ta ye, a bena o yira, min y'a ta ye ni min ka senu, n'a be se ka gwɛrɛ a la. A mana mɔgɔ min woloma, a ben'a to o tigi be gwɛrɛ a la.

⁶Aw ka kan ka koo min kɛ, o filɛ nin ye, e Kore n'i ka mɔgɔw bɛɛ. Aw ka wusulandagaw ta.

⁷Sini, aw ka takami ni wusulan kɛ u kɔnɔ Masaba ɲakɔrɔ. Masaba mana mɔgɔ min woloma, an ben'a lɔn k'o le ye Masaba ta ye. Levi kɔmɔgɔw, aw ta tɛmɛn'a daan kan!»

⁸Musa y'a fɔ Kore ye tugu ko: «Levi kɔmɔgɔw, aw ye mɛnni kɛ!

⁹Isirayɛli ka Ala ye aw woloma ka bɔ Isirayɛli jama cɛma ko aw ka gwɛrɛ a la ka baara kɛ ale Masaba ka fanibugu kɔnɔ, ani ka lɔ jama nɔɔ na ka baara kɛ u tɔgɔ la. O ka dɔgɔ aw ɲana wa?

¹⁰A ye ele n'i balimacɛ Levi kɔmɔgɔw bɛɛ gwɛrɛ a yɛrɛ la, sisan aw be sarakalasebaara le ɲinina fana.

¹¹O la, e n'i ka jama bɛɛ bɛnna ka muruti Masaba ma. Arɔn ye mun ye fɔɔ aw be ŋunuŋunu a kama?»

¹²O kɔ, Musa ko u ka Eliyabu dencɛ Datan ni Abiramu wele, nga u ko u te taga.

¹³Ko nɔnɔ ni lii ka ca kosɔbɛ jamana diman min kɔnɔ, a y'u bɔ yen janko k'u faga kongokolon kɔnɔ, o ye kofitini ye wa? Ko a ma dan o ma, sisan a b'a fɛ k'a yɛrɛ kɛ olu kuntigi ye fana.

¹⁴Ko a kɔni ma taga n'olu ye jamana diman na fewu, ko a ma *ɛrɛzɛnforow ni foro wɛrɛw d'u ma fana. Ko a be mɔgɔ nunu jati fiɲɛntɔw ye wa. [1] K'olu tena taga fewu.

¹⁵Musa dimina kosɔbɛ. A y'a fɔ Masaba ye ko: «Kana sɔn u ka saraka la. Ne ma hali fali kelen minɛ u fɛ, ne ma kojugu kɛ u si la.»

¹⁶Musa y'a fɔ Kore ye ko: «E n'i ka jama bɛɛ ka na Masaba ɲakɔrɔ sini, ani Arɔn.

¹⁷Aw kelen kelen bɛɛ ka na n'aw ka wusulandagaw ye ka wusulan kɛ u kɔnɔ, u bɛɛ lajɛnnin ka kɛ wusulandaga kɛmɛ fila ni bi duuru ye, wusulan be jɛni Masaba ye. E ni Arɔn fana ka na n'aw taw ye.» [2]

¹⁸U kelen kelen bɛɛ y'u ka wusulandagaw ta ka takami ni wusulan kɛ u kɔnɔ, ka lɔ ni Musa ni Arɔn ye Ɲɔgɔnkunbɛn fanibugu daa la.

¹⁹Kore y'a ka mɔgɔw bɛɛ lajɛn Musa ni Arɔn kama Ɲɔgɔnkunbɛn fanibugu daa la ka ban tuma min na, Masaba y'a ka sebagaya yira jama bɛɛ la.

²⁰A y'a fɔ Musa ni Arɔn ye ko:

²¹«Aw ye bɔ jama nin cɛma janko ne ka se k'u halaki sisan sisan.»

²²Musa ni Arɔn y'u kunbiri gwan k'u ɲaa biri duguma k'a fɔ ko: «Ala, e min be nii don adamadenw bɛɛ la, mɔgɔ kelen ye hakɛ kɛ, i bena dimi jama bɛɛ kɔrɔ wa?»

²³Masaba ye Musa jaabi ko:

²⁴«A fɔ jama ye ko u ka bɔ Kore ni Datan ani Abiramu ka fanibuguw gɛrɛfɛ.»

²⁵Musa wilila ka taga Datan ni Abiramu fɛ, Isirayɛli cɛkɔrɔbaw tugur'a kɔ.

²⁶A y'a fɔ jama ye ko: «Aw ka bɔ mɔgɔjugu nunu ka fanibuguw gɛrɛfɛ! Aw kana maga u ka fɛɛn si la, n'o tɛ, aw bena halaki n'u ye u ka hakɛ bɛɛ kosɔn.»

²⁷O la, u bɔra Kore ni Datan ani Abiramu ka fanibuguw gɛrɛfɛ. Datan ni Abiramu tun bɔra ka lɔ u ka fanibuguw daa la, u ni u musow n'u deenw ani u mamadenw.

²⁸Musa ko: «Aw ben'a lɔn nin le fɛ ko Masaba ye ne ci ka koo nunu bɛɛ kɛ, ne ma n yɛrɛ sago kɛ.

²⁹Ni mɔgɔ nunu sara mɔgɔ tɔw sacogo la, n'u ta kɛra i n'a fɔ mɔgɔ tɔw ta, o tuma na, Masaba ma ne ci.

³⁰Nga ni Masaba ye koo dɔ kɛ min ɲɔgɔn ma deli ka kɛ, ni dugukolo pɛrɛnna u n'u bololafɛnw bɛɛ ka jigi a kɔnɔ, u ɲanaman ka taga lahara, o tuma na, aw ben'a lɔn ko mɔgɔ nunu ye Masaba mafiɲɛya.»

³¹A tilara kuma nin bɛɛ la dɔrɔn, dugukolo pɛrɛnna u kɔrɔ,

³²dugukolo daa yɛlɛla k'u kunun, u n'u ka somɔgɔw ani Kore ka mɔgɔw bɛɛ, n'u bololafɛnw bɛɛ.

³³U ɲanaman tagara lahara n'u bololafɛnw bɛɛ ye, dugukolo daa tugura u kan, u halakira ka bɔ jama cɛma.

³⁴Isirayɛliden minw tun be u lamini na, olu bɛɛ bolila u kulekan kosɔn. U ko: «An ka boli, n'o tɛ, dugukolo bena an fana kunun dɛ!»

³⁵Tasuma bɔra Masaba fɛ ka mɔgɔ kɛmɛ fila ni bi duuru jɛni pewu, minw tun be wusulan jɛnina.