Read dyu Kongokolon kɔnɔ kitabu 17 Bible Online

Kongokolon kɔnɔ kitabu 17 - dyu bible

Kongokolon kɔnɔ kitabu 17

¹Masaba y'a fɔ Musa ye ko:

²«A fɔ sarakalasebaga Arɔn dencɛ Eleyazari ye ko a ka wusulandaga nunu cɛ ka bɔ takami cɛma, k'u kɔnɔ takami fili yɔrɔjan, bari daga nunu ye ne ta ye.

³Mɔgɔ minw ye hakɛ kɛ n'u nii tor'a la, u ka wusulandagaw ta k'u dilan k'u kɛ sarakabɔyɔrɔ datugulan ye. Bari daga nunu nana ne Masaba ɲakɔrɔ, o le y'a to u kɛra ne ta ye. U ka kɛ taamasiɲɛ ye Isirayɛlidenw fɛ.»

⁴O la, wusulandaga ziralaman minw tun be mɔgɔ nunu fɛ minw jɛnina, sarakalasebaga Eleyazari ye olu cɛ k'u dilan k'u kɛ sarakabɔyɔrɔ datugulan ye.

⁵O kɛra hakilijigifɛn ye Isirayɛlidenw fɛ k'u hakili jigi a la ko mɔgɔ o mɔgɔ te Arɔn kɔmɔgɔ ye, o si man kan ka gwɛrɛ ka wusulan jɛni Masaba ɲakɔrɔ. N'o tɛ, koo min ye Kore n'a mɔgɔw sɔrɔ, o ɲɔgɔn bena o tigi fana sɔrɔ, Masaba tun ye min fɔ Musa barika la.

⁶O dugusagwɛ, Isirayɛli jama bɛɛ ŋunuŋununa Musa ni Arɔn kama k'a fɔ k'u ye Masaba ka mɔgɔw faga.

⁷Jama lajɛnna Musa ni Arɔn kama, u y'u ɲaa yɛlɛma ka sin Ɲɔgɔnkunbɛn fanibugu ma tuma min na, sankaba barila k'a datugu, Masaba y'a ka sebagaya yira.

⁸ Musa ni Arɔn tagara Ɲɔgɔnkunbɛn fanibugu ɲafɛ.

⁹Masaba y'a fɔ Musa ye ko:

¹⁰«Aw ye bɔ jama nin cɛma, janko ne ka se k'u halaki yɔrɔnin kelen.» U lara k'u ɲaa biri duguma.

¹¹Musa y'a fɔ Arɔn ye ko: «Wusulandaga ta ka takami bɔ sarakabɔyɔrɔ kan ka wusulan kɛ a la, ka teliya ka taga n'a ye jama fɛ janko ka u ka hakɛ yafa daali u ye, bari Masaba dimina, fɔɲɔbana daminɛna ka ban.»

¹²Arɔn ye wusulandaga ta i ko Musa y'a fɔ cogo min na, ka boli ka taga don jama cɛma. O y'a sɔrɔ fɔɲɔbana tun daminɛna ka ban u cɛma. Arɔn ye wusulan jɛni k'u ka kojugu yafa daali.

¹³A lɔra suuw ni ɲanamanw cɛma, fɔɲɔbana banna.

¹⁴Mɔgɔ waa tan ni naani ni kɛmɛ wolonwula (14 700) le sara fɔɲɔbana bolo. Minw sara Kore kosɔn, olu niin t'a la.

¹⁵O kɔ, Arɔn kɔsegira Musa fɛ Ɲɔgɔnkunbɛn fanibugu daa la, o y'a sɔrɔ fɔɲɔbana tun banna.

¹⁶Masaba y'a fɔ Musa ye ko:

¹⁷«Kuma Isirayɛlidenw fɛ ka bere tan ni fila minɛ u fɛ. I ka bere kelen minɛ u bɛma tan ni fila kɔmɔgɔw ɲamɔgɔw kelen kelen bɛɛ fɛ, k'u kelen kelen bɛɛ tɔgɔw sɛbɛn u ka berew kan.

¹⁸I ka Arɔn tɔgɔ sɛbɛn Levi kɔmɔgɔw ka bere kan. Bere kelen kelen ka kɛ u bɛma nunu kɔmɔgɔw ɲamɔgɔw kelen kelen bɛɛ tɔgɔ la.

¹⁹I k'u bila Ɲɔgɔnkunbɛn fanibugu kɔnɔ walaka bilakɛsu ɲafɛ, ne b'aw kunbɛn yɔrɔ min na.

²⁰Ne ye mɔgɔ min woloma, ale ka bere bena nugu. Ne bena Isirayɛlidenw ka ŋunuŋunuko ban aw kama ten.»

²¹Musa kumana Isirayɛlidenw fɛ. U ɲamɔgɔw kelen kelen bɛɛ ye bere kelen d'a ma ka kɛɲɛ ni Isirayɛli deenw mɔgɔda ye, bere tan ni fila tun lo. Arɔn ka bere tun be u cɛma.

²²Musa ye bere nunu bila Masaba ɲakɔrɔ, fanibugu kɔnɔ a ka sariyaw walakaw maranin be min kɔnɔ.

²³ O dugusagwɛ, Musa donna soo nin kɔnɔ tuma min na, a y'a ye ko Levi kɔmɔgɔ Arɔn ka bere tun nugura. O dama tɛ, a tun ye bolofitinifitini bɔ ka feeren, ani ka den, deen nunu fana mɔnna.

²⁴Musa ye bere nunu bɛɛ ta ka bɔ Masaba ɲakɔrɔ ka taga n'u ye Isirayɛlidenw fɛ. U y'u filɛ, u kelen kelen bɛɛ y'u ka berew ta.

²⁵Masaba y'a fɔ Musa ye ko: «Arɔn ka bere bila walaka bilakɛsu ɲafɛ yen, a ka mara ka kɛ taamasiɲɛ ye mɔgɔmurutininw fɛ. O bena u ka ŋunuŋunuko ban ne kɔrɔ janko u kana na sa.»

²⁶Masaba ye min fɔ, Musa y'o kɛ.

²⁷Isirayɛlidenw y'a fɔ Musa ye ko: «An halakira! An sara, ebe, an bɛɛ satɔ lo!

²⁸Mɔgɔ o mɔgɔ mana gwɛrɛ Masaba ka fanibugu la dɔrɔn, o tigi be sa. O tuma na, an bɛɛ bena halaki wa?»