Read dyu Kongokolon kɔnɔ kitabu 20 Bible Online

Kongokolon kɔnɔ kitabu 20 - dyu bible

Kongokolon kɔnɔ kitabu 20

¹Isirayɛli jama bɛɛ sera Zin kongokolon kɔnɔ saan kalo fɔlɔ la, ka sigi Kadɛsi. Miriyama sara o yɔrɔ la, u y'a suu don yen.

²Jii tun te jama fɛ minkɛ, u lajɛnna ka wili Musa ni Arɔn kama.

³U y'a daminɛ ka Musa kɛlɛ, u ko: «Masaba y'an balimaw faga tuma min na, n'an fana tun sara o tuma na, o tun ka fisa!

⁴Mun na aw nana ni Masaba ka jama ye kongokolon nin kɔnɔ yan? Janko an n'an ka begɛnw ka sa kɛ?

⁵Mun na aw bɔra n'an ye Ezipiti jamana na ka na n'an ye yɔrɔjugu nin na? Sɛnɛyɔrɔ te yan, torosun te yan, *ɛrɛzɛnsun te yan, gerenadiyiri te yan. Jii minta yɛrɛ te yan!»

⁶Musa ni Arɔn bɔra jama cɛma ka taga Ɲɔgɔnkunbɛn fanibugu daa la ka la k'u ɲaa biri duguma. Masaba y'a ka sebagaya yira u la.

⁷Masaba y'a fɔ Musa ye ko:

⁸«Bere nin ta, e n'i kɔrɔcɛ Arɔn ka jama wele k'u lajɛn. Aw ka kuma farakuru nin fɛ u ɲana, jii bena bɔ a la. I b'a kɛ jii be bɔ a kɔnɔ k'a di jama n'u ka begɛnw ma, u k'a min.»

⁹O la, Musa ye bere nin ta, a min tun bilanin be Masaba ka soo kɔnɔ, ka kɛɲɛ ni Masaba ka fɔta ye.

¹⁰Musa ni Arɔn ye jama wele ka u lajɛn farakuru kɔrɔ. Musa y'a fɔ u ye ko: «Aw mɔgɔmurutinin nunu, aw ye lamɛnni kɛ. An ka kan ka jii bɔ aw ye farakuru nin le kɔnɔ wa?»

¹¹O kɔ, Musa y'a bolo kɔrɔta ka farakuru gosi n'a ka bere ye siɲɛ fila. Jii caaman bɔra, jama ye minni kɛ, ani u ka begɛnw fana.

¹²Masaba y'a fɔ Musa ni Arɔn ye ko: «Aw ma la ne la, k'a to ne k'a yira Isirayɛlidenw na ko ne ɲɔgɔn te yi, ko see be ne ye minkɛ, o la, ne be jamana min di jama nin ma, aw tena don n'u ye o kɔnɔ.»

¹³O kɛlɛ le y'a to u b'a fɔ ko Meriba [1] jii, bari Isirayɛlidenw tun ye kɛlɛ ɲini Masaba fɛ o yɔrɔ la, nga Masaba y'a yɛrɛ yira u la yen ko a saniyanin lo.

¹⁴Musa ye cidenw bila ka bɔ Kadɛsi ka taga Edɔmu masacɛ sɛgɛrɛ k'a fɔ a ye ko: «I balima Isirayɛlidenw ko: I b'an ka sɛgɛn bɛɛ kala ma.

¹⁵An bɛmaw tagara Ezipiti jamana na, an sigira yen fɔɔ ka mɛn. Nga Ezipitikaw ye an bɛmaw ni anw tɔɔrɔ.

¹⁶An kasira Masaba nɔɔ fɛ tuma min na, a y'an kasikan mɛn ka mɛlɛkɛ ci k'an bɔ Ezipiti. Sisan an sera Kadɛsi yan, dugu nin b'i ka mara daan na.

¹⁷An b'i daali, i ka sɔn an ka tɛmɛ i ka jamana kɔnɔ. An tena don *ɛrɛzɛnforo, walima foro wɛrɛ si la, an tena aw ka kɔlɔnw jii min. An bena tɛmɛ ni masacɛ ka siraba ye, fɔɔ ka taga bɔ i ka mara kɔnɔ an tena faran ka taga kinibolo, walima numanbolo fɛ.»

¹⁸Edɔmu masacɛ y'a jaabi ko: «Aw tena tɛmɛ yan yɔrɔ la, n'o kɛra, ne bena bɔ k'aw kunbɛn ni murujan ye.»

¹⁹Isirayɛlidenw y'a fɔ a ye ko: «An bena tɛmɛ ni siraba ye. Ni anw, walima an ka begɛnw ye i ka jii dɔ min, an ben'o sara. An b'a fɛ ka taama ka tɛmɛ seen na dɔrɔn, koo wɛrɛ t'a la.»

²⁰Edɔmu masacɛ segira k'a fɔ ko: «Aw tena tɛmɛ yan fewu.» O kɔ, a bɔra k'u kunbɛn ni kɛlɛden barikamanw ye caaman.

²¹Edɔmu masacɛ ma sɔn ka tɛmɛyɔrɔ di u ma a ka mara la minkɛ, Isirayɛlidenw faranna ka taga faan wɛrɛ fɛ.

²²Isirayɛli jama bɛɛ wilila ka bɔ Kadɛsi ka taga se Ɔri kulu ma.

²³K'u to Ɔri kulu gɛrɛfɛ, Edɔmu mara daan na, Masaba y'a fɔ Musa ni Arɔn ye ko:

²⁴«Arɔn bena ta'a faaw fɛ. Ne be jamana min di Isirayɛlidenw ma, a tena don o kɔnɔ, bari aw tun ma sɔn ka ne ka fɔta bato Meriba jiyɔrɔ la.

²⁵Taga ni Arɔn n'a dencɛ Eleyazari ye Ɔri kulu kan.

²⁶I ka Arɔn ka sarakalasefaniw bɔ a kaan na k'u don a deen Eleyazari kaan na. Bari Arɔn bena ta'a faaw fɛ, a bena sa o yɔrɔ la.»

²⁷Masaba ye min fɔ, Musa y'o kɛ. U yɛlɛla Ɔri kulu kan jama bɛɛ ɲana.

²⁸ Musa ye Arɔn ka fani nunu bɔ a kaan na k'u don a deen Eleyazari kaan na. Arɔn sara kulu kunna yen. O kɔ, Musa ni Eleyazari jigira ka bɔ kulu kan.

²⁹Jama bɛɛ y'a faamu ko Arɔn sara, Isirayɛlidenw bɛɛ y'a suu kasi tile bi saba kɔnɔ.