Read dyu Kongokolon kɔnɔ kitabu 21 Bible Online

Kongokolon kɔnɔ kitabu 21 - dyu bible

Kongokolon kɔnɔ kitabu 21

¹ Aradi masa, min ye kanaancɛ ye, n'a siginin be jamana worodugu ɲafan fɛ, ale y'a mɛn ko Isirayɛlidenw be nana ni Atarimu sira ye. A ye Isirayɛlidenw kɛlɛ k'u dɔw minɛ.

²Isirayɛlidenw ye dajuru ta Masaba ye ko n'a ye mɔgɔ nunu don u bolo, k'u bena u ka duguw halaki pewu.

³Masaba ye mɛnni kɛ u fɛ ka Kanaan nunu don u bolo. U ye olu, n'u ka duguw halaki pewu. O kosɔn, o yɔrɔ tɔgɔ lara ko Ɔrima, o kɔrɔ ko halakili.

⁴ Isirayɛlidenw wilila ka bɔ Ɔri kulu gɛrɛfɛ ka taga ni Buruku kɔgɔji sira ye ka taga munumunu fɔɔ Edɔmu mara daan na. Nga jama fari fagara sira la.

⁵ U ye kumajugu fɔ Ala ni Musa ma. U ko: «Mun na aw y'a kɛ an bɔra Ezipiti jamana na janko an ka sa kongokolon kɔnɔ? Dumuni te yan! Jii te yan! Dumuni goman nin nigɛ bɔra an na!»

⁶O la, Masaba ye saa farimanw bila ka na jama kama. U ye Isirayɛlidenw cin, mɔgɔ caaman sara.

⁷Jama nana Musa fɛ k'a fɔ ko: «An ye kumajugu fɔ e ni Masaba ma tuma min na, an ye hakɛ kɛ. I ka Masaba daali ko a ka saa nunu bɔ an cɛma.» Musa ye Masaba daali jama ye.

⁸Masaba y'a fɔ a ye ko: «I ka saa jaa dilan k'a dulon lɔgɔjan dɔ kan. Saa mana mɔgɔ o mɔgɔ cin, n'a ye jaa nin filɛ, a tena sa.»

⁹ O la, Musa ye saa jaa dilan ni zira ye k'a dulon lɔgɔjan kan. Saa ye mɔgɔ o mɔgɔ cin, n'a ye saa ziralaman nin filɛ, o tigi ma sa.

¹⁰Isirayɛlidenw wilila ka taga sigi Obɔti.

¹¹U bɔra Obɔti ka taga sigi Iyabarimu, min be kongokolon kɔnɔ Mowabu mara kɔrɔn fɛ.

¹²U bɔra o yɔrɔ la tugu ka taga sigi Zerɛdi kɔkɛnɛ la,

¹³ka bɔ o yɔrɔ la tugu ka taga sigi Arinɔn kɔɔ kɔfɛ, min be woyo ka taga kongokolon kɔnɔ ka bɔ amoriw ka mara la. Arinɔn kɔɔ be Mowabu mara daan la, a be Mowabu mara ni amoriw ta daan bɔ ɲɔgɔn na.

¹⁴O le y'a to a fɔra Masaba ka kɛlɛkow sɛbɛ kɔnɔ ko: «Wayɛbu kɔɔ n'a bolow, Sufa jamana la, Arinɔn kɔɔ

¹⁵n'a bolow, minw jiginin be ka taga Ari faan fɛ, olu ka kɛ Mowabu mara daan ye.»

¹⁶U bɔra o yɔrɔ la fana ka taga se Beyɛri. O yɔrɔ kɔlɔn nin daa la, Masaba y'a fɔ Musa ye ko a ka jama lajɛn o yɔrɔ la, ko a bena jii d'u ma.

¹⁷O tuma na, Isirayɛlidenw ye dɔnkili nin la ko: «Kɔlɔn, i ka jii bɔ ka woyo! Aw ka dɔnkili la a koo la.

¹⁸Kuntigiw ye kɔlɔn nin sogi, mɔgɔbabaw y'a sogi, ni masaberew ye, n'u ka berew ye!» Ayiwa, u bɔra kongokolon kɔnɔ ka taga se Matana,

¹⁹ka bɔ Matana ka taga Naaliyɛli, ka bɔ Naaliyɛli ka taga Bamɔti.

²⁰U bɔra Bamɔti ka taga kɔkɛnɛ la min be Mowabu mara la, Pisiga kulu faan fɛ, ale min be kongokolon gɛrɛfɛ.

²¹Isirayɛlidenw ye cidenw bila ka taga amoriw ka masacɛ Siŋɔn fɛ k'a fɔ a ye ko:

²²«An b'i daali, i ka sɔn an ka tɛmɛ i ka jamana kɔnɔ. An tena faran ka don *ɛrɛzɛnforo, walima foro wɛrɛ si kɔnɔ. An tena kɔlɔnw jii min. An bena tɛmɛ ni masacɛ ka siraba ye, fɔɔ ka taga bɔ i ka mara kɔnɔ.»

²³Nga Siŋɔn ma sɔn Isirayɛlidenw ka tɛmɛ a ka mara kɔnɔ. A y'a ka kɛlɛdenw bɛɛ lajɛn ka bɔ ka taga Isirayɛlidenw kunbɛn kongokolon kɔnɔ Yaasi, k'u kɛlɛ o yɔrɔ la.

²⁴Isirayɛlidenw y'u caaman faga k'a ka jamana minɛ k'a ta Arinɔn kɔɔ daa la ka taga se Yabɔki kɔɔ daa la. U tagara dan amoniw ka mara daan na, bari olu tun y'u ka mara daan labɛn kosɔbɛ.

²⁵Isirayɛlidenw ye Ɛsibɔn n'a dafɛdugudenninw bɛɛ minɛ ani amoriw ka duguw tɔw bɛɛ, k'u yɛrɛ ka mɔgɔw sigi u kɔnɔ.

²⁶Ɛsibɔn tun ye amoriw ka masacɛ Siŋɔn ka sigidugu ye, ale min tun ye Mowabu mara masacɛkɔrɔ kɛlɛ ka mara bɛɛ minɛ a la fɔɔ ka taga se Arinɔn kɔɔ daa la.

²⁷O le y'a to dɔnkililabagaw b'a fɔ ko: «Aw ye na Ɛsibɔn k'a lɔ kura ye! Aw ye Siŋɔn ka dugu lalaga k'a lɔ.

²⁸ Tasuma bɔra Ɛsibɔn, tasuma wilila Siŋɔn ka dugu kɔnɔ. A ye Ari dugu jɛni Mowabu mara la, a ye Arinɔn kuluyɔrɔw jɛni.

²⁹Bɔnɛ b'aw ye, Mowabuw! *Kemɔsi sɔnbagaw, aw halakira! A sɔnbaga cɛmanw kɛra bolibagatɔw ye, amoriw ka masacɛ Siŋɔn ye musomanw minɛ.

³⁰Anw y'u sɔgɔ n'an ka biɲɛw ye. K'a ta Ɛsibɔn fɔɔ ka taga se Dibɔn dugu ma, a bɛɛ cɛnna. An y'u halaki fɔɔ ka taga se Nofa, fɛɛn o fɛɛn b'o yɔrɔ la fɔɔ Madaba, o bɛɛ.»

³¹Isirayɛlidenw sigira amoriw ka mara la.

³²Musa ye cidenw bila ka taga Yazɛri kɔlɔsi. O kɔ, Isirayɛlidenw y'a dafɛdugudenninw minɛ k'o yɔrɔ amoriw gwɛn ka bɔ yen.

³³O kɔ, u faranna ka taga *Basan sira minɛ. Basan masacɛ Ɔgi n'a ka kɛlɛdenw bɛɛ bɔra ka taga u kunbɛn k'u kɛlɛ Edirɛyi.

³⁴Masaba y'a fɔ Musa ye ko: «Kana siran a ɲa, ne ye ale n'a ka mara, n'a ka kɛlɛdenw bɛɛ don i bolo. I ye min kɛ amoriw ka masacɛ Siŋɔn na, ale min tun siginin be Ɛsibɔn, i k'o ɲɔgɔn kɛ nin na fana.»

³⁵O la, u ye ale n'a dencɛw, n'a ka kɛlɛdenw bɛɛ faga, u ma mɔgɔ kelen yɛrɛ to yen. U y'a ka mara minɛ.