Read dyu Kongokolon kɔnɔ kitabu 22 Bible Online

Kongokolon kɔnɔ kitabu 22 - dyu bible

Kongokolon kɔnɔ kitabu 22

¹Isirayɛlidenw wilila ka taga sigi Mowabu kɛnɛba la, Zurudɛn baji kɔfɛ Zeriko faan fɛ.

²Isirayɛlidenw tun ye min kɛ amoriw la, Sipɔri dencɛ Balaki tun y'o bɛɛ ye.

³Mowabuw y'a ye ko mɔgɔ nunu ka ca kosɔbɛ, u siranna haali. Tiɲɛ na, u jaa tun tigɛra Isirayɛlidenw kosɔn.

⁴Mowabuw y'a fɔ Madiyan cɛkɔrɔbaw ye ko: «Jama nin bena an lamini bɛɛ halaki sisan i n'a fɔ misi be biin ɲimi k'a ban kongo kɔnɔ cogo min na.» O y'a sɔrɔ Sipɔri dencɛ Balaki le tun ye Mowabu masacɛ ye.

⁵ A ye cidenw bila ka taga Bewɔri dencɛ Balamu fɛ k'a wele. Ale tun b'a faso la Petɔri, Efarati baji daa la. A y'a fɔ a ye ko: «Siya dɔ bɔra Ezipiti jamana la ka na yɔrɔ bɛɛ ta. U sera ne gɛrɛfɛ ka sigi.

⁶Ayiwa, ne b'i daali, i ka na mɔgɔ nunu danga, bari u barika ka bon ni ne ta ye. N'i y'o kɛ, n'a sɔrɔ ne bena se u kɔrɔ, ani ka se k'u gwɛn ka bɔ jamana nin kɔnɔ, bari ne y'a lɔn ko n'i ye duba kɛ mɔgɔ min ye, o tigi ta be ɲa. N'i ye min danga, o tigi ta be cɛn.»

⁷Mowabu ni Madiyan cɛkɔrɔbaw wilila ka taga ni boɲafɛnw ye u bolo janko k'o di lagwɛlikɛla ma. U sera Balamu fɛ tuma min na, u ye Balaki ka kuma fɔ a ye.

⁸Balamu y'a fɔ u ye ko: «Aw ye si yan bii, Masaba mana min fɔ ne ye, ne bena aw jaabi ka kɛɲɛ n'o ye.» O la, Mowabu ɲamɔgɔ nunu tora Balamu fɛ yen.

⁹Ala nana Balamu fɛ k'a ɲininga ko: «Mɔgɔ minw be n'i ye yan, jɔnw lo?»

¹⁰Balamu y'a jaabi ko: «Sipɔri dencɛ Balaki, ni Mowabu masacɛ lo, ale lo y'u ci ka n'a fɔ n ye ko

¹¹siya dɔ min bɔra Ezipiti jamana na, ko u ye yɔrɔ bɛɛ ta. Ko ne ka na u danga a ye, ko n'o kɛra, n'a sɔrɔ ale bena se k'u kɛlɛ k'u gwɛn ka bɔ yen.»

¹²Ala y'a fɔ Balamu ye ko: «Kana taga n'u ye. Kana siya nin danga, bari dubadenw lo.»

¹³O dugusagwɛ, Balamu wilila k'a fɔ Balaki ka ɲamɔgɔw ye ko: «Aw ye segi aw ka jamana na, bari Masaba ma sɔn ne ka taga n'aw ye.»

¹⁴O la, Mowabu ɲamɔgɔw kɔsegira Balaki fɛ k'a fɔ ko: «Balamu banna ka na n'an ye.»

¹⁵Balaki ye ɲamɔgɔ dɔ wɛrɛw ci tugu, olu tun ka ca ni fɔlɔtaw ye, u fana tun jatinin lo kosɔbɛ ka tɛmɛ fɔlɔtaw kan.

¹⁶U sera Balamu fɛ k'a fɔ a ye ko: «Sipɔri dencɛ Balaki ko i kan'a to foyi k'i bali ka na ale fɛ.

¹⁷Ko bari ale bena i boɲa fɔɔ ka ɲa, ko i mana min fɔ, ko ale bena o bɛɛ kɛ. Ko a b'i daali, i ka na mɔgɔ nunu danga ale ye.»

¹⁸Balamu ye Balaki ka cidenw jaabi ko: «Hali ni Balaki y'a ka soo fa warigwɛ ni sanu na k'o bɛɛ di ne ma, ne te se ka foyi si kɛ ka tɛmɛ Masaba ne ka Ala ka kuma kan, a kɛra koba ye wo, walima kofitini.

¹⁹Sisan aw ye si yan bii i n'a fɔ tɔw y'a kɛ cogo min na, yanni ne k'a lɔn Masaba bena min fɔ ne ye tugu.»

²⁰O sufɛ, Ala nana Balamu fɛ k'a fɔ a ye ko: «Mɔgɔ nunu nana i wele kama minkɛ, wili ka taga n'u ye, nga ne be min fɔ i ye, i k'o dama kɛ.»

²¹O dugusagwɛ sɔgɔma, Balamu wilila k'a ka fali labɛn ka taga ni Mowabu ɲamɔgɔw ye.

²²Ala y'a taatɔ ye tuma min na, a dimina kosɔbɛ. Masaba ka mɛlɛkɛ lɔra sira la k'a ɲaa tigɛ. Balamu tun b'a ka fali kan, a ka baaraden fila tun be n'a ye.

²³Fali ye Masaba ka mɛlɛkɛ lɔnin ye sira kan n'a ka murujan b'a bolo. A faranna ka bɔ sira kan ka don foro la. Balamu y'a gosi janko a ka segi sira kan.

²⁴O kɔ, Masaba ka mɛlɛkɛ tagara lɔ sira fitiniyɔrɔ dɔ la *ɛrɛzɛnforow furancɛ la, O y'a sɔrɔ kogo tun be sira nin faan fila bɛɛ la.

²⁵Fali ye Masaba ka mɛlɛkɛ ye, fali dɛnna kogo la ka Balamu seen digi o la. Balamu y'a gosi tugu.

²⁶O kɔ, Masaba ka mɛlɛkɛ tagara ɲafɛ tugu ka lɔ yɔrɔ dɔ la, sira ka dɔgɔ yɔrɔ min na, munumunuyɔrɔ si tun te yen, ka taga kinibolo, walima numanbolo fɛ.

²⁷Fali ye Masaba ka mɛlɛkɛ ye, a lara duguma ni Balamu ye. Balamu dimina k'a gosi n'a ka bere ye.

²⁸Masaba ye daa di fali ma, a y'a fɔ Balamu ye ko: «Ne ye mun le kɛ i la fɔɔ i ye ne gosi siɲɛ saba?»

²⁹Balamu y'a fɔ fali ye ko: «Bari i ye tulon kɛ ne la! Ni murujan tun be ne bolo, n tun bena i faga sisan sisan.»

³⁰Fali y'a fɔ Balamu ye ko: «Ne t'i ka fali ye wa? I tun te yɛlɛ ne kan kabini i ye ne sɔrɔ foo ka na se bii ma wa? Ne delila ka nin ɲɔgɔn kɛ i la wa?» Balamu ko: «Ayi.»

³¹O tuma na, Masaba ye Balamu ɲaa yɛlɛ, a ye Masaba ka mɛlɛkɛ lɔnin ye sira kan ni murujan y'a bolo. Balamu y'a kunbiri gwan k'a ɲaa biri duguma.

³²Masaba ka mɛlɛkɛ y'a ɲininga ko: «Mun na e y'i ka fali bugɔ siɲɛ saba? Ne nana k'i ɲaa tigɛ, bari ne y'a ye ko i be sira min kan, halakisira lo.

³³Fali ye ne ye ka faran ka bɔ ne ɲa siɲɛ saba. N'a tun ma faran, ne tun bena i faga o yɔrɔnin kelen ka fali nin to yen.»

³⁴Balamu y'a fɔ Masaba ka mɛlɛkɛ ye ko: «Ne ye hakɛ kɛ. Ne tun m'a lɔn ko i lɔnin be sira kan ka ne ɲaa tigɛ. Sisan, ni taga nin man d'i ye, ne bena kɔsegi.»

³⁵Masaba ka mɛlɛkɛ y'a fɔ Balamu ye ko: «Taga ni mɔgɔ nunu ye, nga ne be kuma min fɔ i ye, i k'o dama fɔ.» O la, Balamu tagara ni Balaki ka ɲamɔgɔw ye.

³⁶Balaki y'a mɛn ko Balamu be sira la minkɛ, a bɔra ka ta'a kunbɛn mowabuw ka dugu dɔ la min be Arinɔn daa la a ka mara daan na.

³⁷A y'a fɔ Balamu ye ko: «Ne ma cii bila ka taga i wele wa? Mun na i tun ma na? See te ne ye k'i sara wa?»

³⁸Balamu y'a jaabi ko: «Ne nana i fɛ sisan. Yala ne bena se ka kuma n kunfɛ wa? Ala mana kuma min don ne daa la, n bena o dama le fɔ.»

³⁹Balamu tagara ni Balaki ye Kiriyatusɔti.

⁴⁰Balaki ye misiw ni sagaw faga saraka ye k'o sogo dɔ di Balamu ma ni ɲamɔgɔ minw y'a bila sira.

⁴¹O dugusagwɛ sɔgɔma, Balaki tagara ni Balamu ye, ka yɛlɛ ka taga Bamɔtibaali. Ka Balamu to o yɔrɔ la, a ye Isirayɛliden dɔw ye.