Read dyu Kongokolon kɔnɔ kitabu 24 Bible Online

Kongokolon kɔnɔ kitabu 24 - dyu bible

Kongokolon kɔnɔ kitabu 24

¹Balamu y'a ye ko a diyara Masaba ye ka Isirayɛlidenw ta ɲa. A ma lagwɛli kɛ tugu ka Ala ɲininga i n'a fɔ a tun y'a kɛ ka tɛmɛ cogo min na, nga a y'a ɲaa yɛlɛma ka sin kongokolon faan fɛ. [1]

²A y'a ɲaa kɔrɔta ka Isirayɛlidenw siginin ye, u tun sigira ka kɛɲɛ n'u bɛmaw kɔmɔgɔw ye. Ala ka Nii jigir'a kan.

³«A y'a ka kirayakuma fɔ ko: Bewɔri dencɛ Balamu ka kirayakuma filɛ nin ye, ale min be yeli kɛ kosɔbɛ, ale ka kuma lo.

⁴Ala be min fɔ, a b'o mɛn, Setigi be min yira a la, a b'o ye, n'a b'a bato tuma min na, a b'a ɲaa yɛlɛ, ale ka kuma lo.

⁵Yakuba kɔmɔgɔw, aw ka fanibuguw ka ɲi dɛ! Isirayɛlidenw, aw ka sigiyɔrɔw ka ɲi sa!

⁶U yɛrɛkɛnin bɛ i ko kɔɔ min fara ka yɛrɛkɛ, i ko bada la nankɔw. U be i ko alowɛsiyiriw, Masaba ye minw tutu, i ko sɛdiriyiriw, jida la.

⁷U ka jibɔyɔrɔw fanin be, u ka sumanw bena jii sɔrɔ kosɔbɛ. U ka masacɛ bena tɛmɛ Agagi kan, u ka masaya bena barika sɔrɔ.

⁸Ala y'u bɔ Ezipiti jamana la, u fanga be i ko kongomisi ta. Siya minw be wili u kama, u be olu halaki, u b'u kolow karikari, u b'u sɔgɔ n'u ka biɲɛw ye.

⁹ U be sonsori, ka la i ko jara, u be sonsori, ka la i ko waraba. Jɔn be se k'u wili? Isirayɛlidenw, mɔgɔ minw be duba kɛ aw ye, Ala ka olu ta ɲa. Minw b'aw danga, Ala ka olu ta cɛn.»

¹⁰O tuma na, Balaki dimina Balamu kɔrɔ kosɔbɛ. A y'a tigɛ gosi ɲɔgɔn na k'a fɔ a ye ko: «Ne y'i wele ko i ka na ne juguw danga le. E do ye duba kɛ u ye fɔɔ siɲɛ saba.

¹¹Wili ka taga i ka soo sisan! Ne tun ko n bena i boɲa fɔɔ ka ɲa, nga Masaba y'i bali k'o boɲa sɔrɔ.»

¹²Balamu ye Balaki jaabi ko: «Ne tun m'o le fɔ i ka cidenw ye wa?

¹³Ko hali ni Balaki y'a ka soo fa warigwɛ ni sanu na k'o bɛɛ di ne ma, ne te se ka foyi kɛ n yɛrɛ ma ka tɛmɛ Masaba ka kuma kan, a kɛra koɲuman ye wo, walima kojugu. Masaba mana min fɔ, ne bena o le fɔ.

¹⁴Ayiwa, sisan ne be segi ka taga n ka mɔgɔw fɛ. Nga mɔgɔ nunu bena min kɛ i ka mɔgɔw la sini, ne b'a fɛ k'i lasɔmi o la fɔlɔ.»

¹⁵Balamu y'a ka kirayakuma fɔ ko: «Bewɔri dencɛ Balamu ka kirayakuma filɛ nin ye, ale min be yeli kɛ kosɔbɛ, ale ka kuma lo.

¹⁶Ala be min fɔ, a b'o mɛn. A be lɔnniya sɔrɔ ka bɔ Fɛɛn bɛɛ kuntigi fɛ. Setigi be min yira a la, a b'o ye. N'a b'a bato tuma min na, a b'a ɲaa yɛlɛ. Ale ka kuma lo.

¹⁷Koo min bena kɛ, ne y'o ye, nga sisan koo tɛ. Ne ɲaa b'a la, nga a yɔrɔ ka jan. Lolo dɔ be bɔra Yakuba kɔmɔgɔw cɛma, masa dɔ be wilila Isirayɛlidenw cɛma. A bena mowabuw gosi u kuun na, a bena Sɛti kɔmɔgɔw bɛɛ kuun ci.

¹⁸A bena Edɔmu mara minɛ, a ben'a juguw ka jamana, *Seyiri minɛ. Nga Isirayɛlidenw bena barika sɔrɔ.

¹⁹Kuntigi dɔ bena bɔ Yakuba la. Dugumɔgɔ minw tora, a bena olu halaki.»

²⁰Balamu ye amalɛkiw ye tugu ka sɔrɔ k'a ka kirayakuma fɔ ko: «Amalɛkiw tun be siya tɔw bɛɛ ɲafɛ, nga a laban na, u bena halaki.»

²¹Balamu ye keniw ye k'a ka kirayakuma fɔ ko: «Aw sigiyɔrɔ sutaranin lo, kɔnɔ ɲaga lo, farakuru kan.

²²O bɛɛ n'a ta, aw ka sigiyɔrɔw bena jɛni, Asirikaw bena aw minɛ ka taga aw bila jɔnya la.»

²³Balamu y'a ka kirayakuma fɔ ko: «Aa! Jɔn be se ka balo ni Ala y'a ta kɛ?

²⁴Kurunbaw bena na ka bɔ Kitimu jamana na, [2] u bena se Asirikaw ni Ebɛri kɔmɔgɔw kɔrɔ, [3] nga olu yɛrɛw bena nagasi.»

²⁵O kɔ, Balamu wilila ka segi ka ta'a ka soo, Balaki fana tagara n'a ka sira ye.