Read dyu Kongokolon kɔnɔ kitabu 25 Bible Online

Kongokolon kɔnɔ kitabu 25 - dyu bible

Kongokolon kɔnɔ kitabu 25

¹Isirayɛlidenw tun siginin be Sitimu tuma min na, u y'a daminɛ ka kakalaya kɛ ni mowabumusow ye.

²Muso nunu y'u daali ko u k'u ka joow sɔn. Jama ye dumuni kɛ k'u kunbiri gwan joo nunu kɔrɔ.

³A kɛra ten Isirayɛlidenw fana tugura joo dɔ kɔ min tɔgɔ ko Baalipewɔri. Masaba dimina u kɔrɔ kosɔbɛ.

⁴A y'a fɔ Musa ye ko: «I ka jama ɲamɔgɔw bɛɛ minɛ k'u faga kɛnɛ kan ne Masaba ɲakɔrɔ, janko ne dusu ka suma Isirayɛlidenw kɔrɔ, bari ne diminin be kosɔbɛ.»

⁵Musa y'a fɔ Isirayɛlidenw ka kititigɛlaw ye ko: «Aw balima minw tugura Baalipewɔri kɔ, aw kelen kelen bɛɛ ka olu faga.»

⁶Ka Musa ni jama to kasi la Ɲɔgɔnkunbɛn fanibugu daa la, Isirayɛliden dɔ ye madiyanmuso dɔ minɛ ka na don n'a ye a ka somɔgɔw fɛ bɛɛ ɲana.

⁷Sarakalasebaga Arɔn deen Eleyazari dencɛ Pinasi y'o ye tuma min na, a wilila ka bɔ jama cɛma, ka taga taman ta a bolo,

⁸ka tugu a kɔ ka taga don a ka fanibugu kɔnɔ. A ye cɛɛ, ni muso nin kori k'u sɔgɔ ni taman ye u kɔnɔbara kɔrɔ. O kɔ, fɔɲɔbana tɛmɛna ka bɔ Isirayɛlidenw cɛma.

⁹Mɔgɔ waa mugan ni naani (24 000) le sara o fɔɲɔbana nin fɛ.

¹⁰Masaba y'a fɔ Musa ye ko:

¹¹«Sarakalasebaga Arɔn deen Eleyazari dencɛ Pinasi ye ne dusu suma Isirayɛlidenw faan fɛ, bari a ma sɔn fɛɛn wɛrɛ ka bato ni ne kelen tɛ. Ne ma u halaki tugu n ka koo keliya kama.

¹²O la, a fɔ a ye ko ne bena bɛɛn n'a ye, o bena kɛ hɛrɛ ye a ma.

¹³A n'a kɔmɔgɔw bena to sarakalasebaara la kudayi. Bari a ka Ala ka koo keliya tun b'a la. A y'a kɛ Isirayɛlidenw ka hakɛ yafara.»

¹⁴Isirayɛliden min fagara ni madiyanmuso nin ye, ale tun ye Salu dencɛ Zimuri ye. Salu tun ye Simeyɔn kɔmɔgɔw ɲamɔgɔ dɔ ye.

¹⁵Madiyanmuso min fagara, ale tun ye Suri denmuso Kozibi ye. A faa tun ye madiyanw ka ɲamɔgɔ dɔ ye.

¹⁶O kɔ, Masaba y'a fɔ Musa ye ko:

¹⁷«Aw ka madiyanw kɛlɛ k'u faga,

¹⁸bari u kɛra aw juguw ye tuma min na u y'aw nigɛ Pewɔri, ani u balimamuso Kozibi koo la, min tun ye u ka ɲamɔgɔ dɔ denmuso ye, n'a fagara fɔɲɔbana wiliwaati la Pewɔri.»