Read dyu Kongokolon kɔnɔ kitabu 3 Bible Online

Kongokolon kɔnɔ kitabu 3 - dyu bible

Kongokolon kɔnɔ kitabu 3

¹Musa ni Arɔn kɔmɔgɔw filɛ nin ye, tuma min na Masaba tun be kuma Musa fɛ Sinayi kulu kan.

² Arɔn dencɛw tɔgɔ filɛ: Nadabu le ye deen fɔlɔ ye, Abiyu ni Eleyazari ni Itamari ka tugu.

³U tun ye tulu mɔn Arɔn deen minw na k'u don sarakalasebaara la, n'u tun b'a kɛra, olu tɔgɔ filɛ:

⁴ Nadabu ni Abiyu tun nana ni takami dɔ ye Masaba ɲakɔrɔ min y'a tana ye, o la, olu sara yen kongokolon kɔnɔ Sinayi kulu gɛrɛfɛ. U tun ma deenw sɔrɔ fɔlɔ. Eleyazari ni Itamari le tora k'o baara kɛ u facɛ Arɔn kɔrɔ.

⁵Masaba y'a fɔ Musa ye ko:

⁶«A to Levi kɔmɔgɔw ka gwɛrɛ ka na to sarakalasebaga Arɔn kɔrɔ ka to k'a dɛmɛ baara la.

⁷U bena to k'a dɛmɛ ka baara kɛ jama bɛɛ ye Ɲɔgɔnkunbɛn fanibugu ɲafɛ, ani k'a kɔnɔnabaara kɛ.

⁸Olu le bena to k'a kɔnɔnaminanw bɛɛ kɔlɔsi, ani ka Isirayɛlidenw ka baara kɛ u ye fanibugu kɔnɔ.

⁹I bena Levi kɔmɔgɔw di Arɔn n'a deenw ma. U bena to a bolo kan Isirayɛlidenw tɔgɔ la.

¹⁰A to Arɔn n'a deenw dama ka sarakalasebaara kɛ. Ni mɔgɔ wɛrɛ gwɛrɛla o yɔrɔ la, o tigi bena faga.»

¹¹Masaba y'a fɔ Musa ye tugu ko:

¹²«Ayiwa, ne ye Levi kɔmɔgɔw ta Isirayɛlidenw cɛma k'u kɛ n taw ye, Isirayɛlidenw dencɛ fɔlɔw nɔɔ na. U bena kɛ ne taw ye.

¹³ Bari, deen fɔlɔw bɛɛ ye ne taw ye. Loon min na ne ye Ezipitikaw deen fɔlɔw bɛɛ faga, o waati la, ne ye Isirayɛlidenw deen fɔlɔw kɛ n yɛrɛ ta ye. Adamadenw ta, ni begɛnw ta fana, u bɛɛ ye ne taw ye. Ne le ye Masaba ye.»

¹⁴Masaba kumana Musa fɛ kongokolon kɔnɔ Sinayi kulu gɛrɛfɛ ko:

¹⁵«Levi kɔmɔgɔw jati gwaaw kɔnɔ, ani fadenyabolo la. I ka cɛdenw jati, k'a ta kalokelendenw ma fɔɔ ka yɛlɛ sanfɛ.»

¹⁶Masaba y'a ɲini Musa fɛ cogo min na, a y'u jati ka kɛɲɛ n'a ka fɔta ye ten.

¹⁷Levi dencɛw tɔgɔ filɛ: Gɛrisɔn ni Keyati ani Merari.

¹⁸Gɛrisɔn deenw ka fadenyabolow ye Libini ni Simeyi kɔmɔgɔw ye.

¹⁹Keyati deenw taw ye Amuramu ni Yiseyari ni Eburɔn ani Uziyɛli kɔmɔgɔw ye.

²⁰Merari deenw taw ye Mali ni Musi kɔmɔgɔw ye. Fadenyabolo minw bɔra Levi la, olu ye nin ye, gwatigi gwatigi.

²¹Fadenyabolo fila bɔra Gɛrisɔn na, Libini ta, ani Simeyi ta.

²²Olu fɛ, cɛden minw tɔgɔ sɛbɛnna k'u jati, k'a ta kalokelendenw ma fɔɔ ka yɛlɛ, olu kɛra mɔgɔ waa wolonwula ni kɛmɛ duuru (7 500) ye.

²³Fadenyabolo minw bɔra Gɛrisɔn na, olu sigira fanibugu kɔfɛ tileben fɛ.

²⁴U ka gwatigi tun ye Layɛli dencɛ Eliyazafu ye.

²⁵U ka baara tun ye min ye Ɲɔgɔnkunbɛn fanibugu kɔnɔ, o tun ye a kɔlɔsiko ye: fanibugu yɛrɛ, n'a birifani, ani a dalafani.

²⁶Luu min tun be fanibugu ni sarakabɔyɔrɔ lamini, o luu faniw n'a dalataw, ani fanibugu sirijuruw, olu kɔlɔsiko tun b'u bolo fana.

²⁷Fadenyabolo minw bɔra Keyati la, o ye Amuramu ni Yiseyari ni Eburɔn ani Uziyɛli taw ye.

²⁸Cɛden daa min sɔrɔla olu fɛ, o kɛra mɔgɔ waa seegi ni kɛmɛ wɔɔrɔ (8 600) ye, k'a ta kalokelendenw ma fɔɔ ka yɛlɛ. Olu le kɛra Masaba ka yɔrɔ kɔlɔsibagaw ye.

²⁹Fadenyabolo minw bɔra Keyati la, olu tun sigira fanibugu worodugu ɲafan fɛ.

³⁰U ka gwatigi tun ye Uziyɛli dencɛ Elisafan ye.

³¹Ala ka layidu taamasiɲɛ kɛsu marako tun be olu bolo, ni buruw bilayɔrɔ, ani fitinɛ, ni sarakabɔyɔrɔw, ani Masaba ka yɔrɔ baarakɛminanw, ni soo nin cɛtigɛfani. Fɛɛn o fɛɛn tun be yen, o marako tun be u bolo.

³²Levi kɔmɔgɔw ɲamɔgɔba tun ye sarakalasebaga Arɔn dencɛ Eleyazari ye. Mɔgɔ minw tun be Masaba ka yɔrɔ kɔlɔsi, ale lo tun be olu kunna.

³³Fadenyabolo minw bɔra Merari la, o ye Mali ni Musi taw ye.

³⁴Cɛden minw tɔgɔ sɛbɛnna jatili la, k'a ta kalokelendenw ma fɔɔ ka yɛlɛ, olu kɛra mɔgɔ waa wɔɔrɔ ni kɛmɛ fila (6 200) ye.

³⁵U ka gwatigi tun ye Abiyayili dencɛ Suriyɛli ye. Olu tun sigira fanibugu nin kɔgɔdugu ɲafan fɛ.

³⁶U ye fanibugu lɔgɔw kɔlɔsiko don olu le bolo, n'a banabiriw, n'a tutunanw, n'u jusigilanw, n'a baaraminanw bɛɛ. A lɔminanw bɛɛ kɔlɔsiko tun be olu le bolo,

³⁷ani tutunan minw tun kɛra ka luu lamini, n'u jusigilanw, ani gweenw ni juruw.

³⁸Musa ni Arɔn n'a deenw tun sigira Masaba ka sigiyɔrɔ ɲafɛ, kɔrɔn fɛ. O kɔrɔ ko u tun be Ɲɔgɔnkunbɛn fanibugu tilebɔ fɛ. U tun be to ka janto Ala ka yɔrɔ nin na, Isirayɛlidenw tɔgɔ la. Ni mɔgɔ wɛrɛ tun gwɛrɛl'a la, ale be faga.

³⁹Musa ni Arɔn ye Levi kɔmɔgɔ minw jati ka kɛɲɛ n'u ka fadenyabolow ye, i ko Masaba tun y'a fɔ cogo min na, k'a ta kalokelendenw ma fɔɔ ka yɛlɛ, olu bɛɛ lajɛnnin kɛra cɛden waa mugan ni fila (22 000) ye.

⁴⁰Masaba y'a fɔ Musa ye ko: «Deen fɔlɔ minw ye cɛmanw ye, olu bɛɛ jati Isirayɛlidenw cɛma, k'a ta kalokelendenw ma fɔɔ ka yɛlɛ, k'u tɔgɔ sɛbɛn.

⁴¹O kɔ, i ka Levi kɔmɔgɔw bila ne Masaba ye, Isirayɛlidenw deen fɔlɔw bɛɛ nɔɔ na, k'u ka begɛnw bila ne ye Isirayɛlidenw ta bɛɛ nɔɔ na.»

⁴²Musa ye Isirayɛlidenw deen fɔlɔ cɛmanw bɛɛ jati ka kɛɲɛ ni Masaba ka fɔta ye.

⁴³Dencɛ fɔlɔ minw tɔgɔ sɛbɛnna jatili la k'a ta kalokelendenw ma fɔɔ ka yɛlɛ, olu kɛra mɔgɔ waa mugan ni fila ani kɛmɛ fila ni bi wolonwula ni saba (22 273) ye.

⁴⁴Masaba y'a fɔ Musa ye tugu ko:

⁴⁵«Levi kɔmɔgɔw bila ne ye, Isirayɛlidenw dencɛ fɔlɔw bɛɛ nɔɔ na, k'u ka begɛnw bila ne ye Isirayɛlidenw ta nɔɔ na. Levi kɔmɔgɔw bena kɛ ne ta ye. Ne le ye Masaba ye.

⁴⁶Mɔgɔ kɛmɛ fila ni bi wolonwula ni saba minw tora Isirayɛlidenw dencɛw la, ni Levi kɔmɔgɔw ta ma u labɔ,

⁴⁷i ka warigwɛ kuru duuru duuru minɛ u kelen kelen bɛɛ tɔgɔ la, min be bɛn garamu tan ma, ne Masaba ka sigiyɔrɔ warigwɛ kuru jaticogo la.

⁴⁸Isirayɛlidenw deen fɔlɔ cɛman mɔgɔda min tɛmɛna Levi kɔmɔgɔw ta kan, i ka olu kunmabɔwari minɛ k'o di Arɔn n'a deenw ma.»

⁴⁹Minw tun tɛmɛna Levi kɔmɔgɔw mɔgɔda kan, Musa ye olu kunmabɔwari minɛ.

⁵⁰A ye wari min minɛ Isirayɛlidenw deen fɔlɔ cɛmanw tɔgɔ la, o tun kɛra warigwɛ kuru waa kelen ni kɛmɛ saba ni bi wɔɔrɔ ani duuru (1 365) ye, Masaba ka sigiyɔrɔ warigwɛ jaticogo la.

⁵¹Masaba y'a ɲini Musa fɛ cogo min na, a y'o wari di Arɔn n'a deenw ma ka kɛɲɛ ni Masaba ka fɔta ye.