Read dyu Kongokolon kɔnɔ kitabu 30 Bible Online

Kongokolon kɔnɔ kitabu 30 - dyu bible

Kongokolon kɔnɔ kitabu 30

¹Masaba ye min fɔ Musa ye, a y'o bɛɛ fɔ Isirayɛlidenw ye.

²Musa y'a fɔ Isirayɛlidenw bɛma tan ni fila kɔmɔgɔw ɲamɔgɔw ye ko: «Masaba ye min fɔ, o filɛ nin ye:

³ Ni mɔgɔ dɔ ye dajuru ta Masaba ye, walima n'a kalila k'a daa di, ko a bena koo dɔ kɛ, a kan'a ka kuma to kɛbali. A ye min fɔ, a k'o bɛɛ kɛ.

⁴«Ka sunguru to a facɛ ka soo, n'a ye dajuru ta Masaba ye, walima n'a kalila k'a daa di,

⁵n'a facɛ y'o dajuru, walima a ka dadili koo mɛn, n'a ma foyi fɔ a ye, o tuma na, denmuso nin ka dajuruw n'a ka dadili nunu bɛɛ dafako bena jati.

⁶Nga tuma min na a facɛ y'o koo mɛn, n'a ma sɔn o ma, denmuso nin ka dajuruw n'a ka dadiko nunu si tena jati. Masaba bena yafa a ma, bari a facɛ banna o ma.

⁷«Ni sunguru ye dajuru ta Masaba ye, walima k'a daa di koo dɔ la n'a ma sigi ka miiri fɔlɔ, ka sɔrɔ ka furu,

⁸n'a cɛɛ y'a koo mɛn loon min na, n'a ma foyi fɔ, muso nin ka layidu n'a ka dajuru bɛɛ be jati.

⁹Nga n'a cɛɛ y'a mɛn loon min, n'a ma sɔn o loon na, o b'a ka dajuru n'a ka dadiko bɔ a kunna. A tun ye min fɔ n'a ma sigi ka miiri fɔlɔ. Masaba bena o yafa a ma.

¹⁰«Firiyamuso ni muso furusanin ka dajuru n'u ka dadiko bɛɛ b'u yɛrɛ kunna.

¹¹«Ka muso to a cɛɛ fɛ, n'a ye dajuru ta, walima ka kali k'a daa di,

¹²n'a cɛɛ y'a mɛn, n'a ma foyi fɔ a ye, n'a ma ban o la, muso nin ka dajuruw n'a ka dadiko bɛɛ be jati.

¹³Nga n'a cɛɛ y'o mɛn loon min na, n'a banna o la, o tuma na, a ka dajuru n'a ka dadiko minw bɛɛ tun bɔr'a daa la olu bɛɛ be bɔ yen. A cɛɛ banna o la minkɛ, Masaba bena yafa muso nin ma.

¹⁴Muso be dajuru o dajuru ta, walima k'a daa di koo minw na k'a yɛrɛ bali koo dɔ la, a cɛɛ be se k'o to seen kan, walima k'o koo ban ka bɔ yen.

¹⁵N'a cɛɛ ma foyi fɔ a ye o koo la fɔɔ tile damani tɛmɛna, o b'a muso ka dajuruw n'a ka dadikow bɛɛ to seen kan. U be to seen kan, bari a ma foyi fɔ o koo la a mɛnlon na.

¹⁶Nga n'a y'o mɛn loon min na, n'a ma foyi fɔ fɔɔ loon wɛrɛ lo a banna, a muso ka jalaki bena kɛ cɛɛ nin kunko ye.»

¹⁷O ye sariya ye Masaba ye minw fɔ Musa ye cɛɛ n'a muso koo la, ani faa n'a denmuso koo la, k'a sunguruman to a facɛ ka soo.