Read dyu Kongokolon kɔnɔ kitabu 5 Bible Online

Kongokolon kɔnɔ kitabu 5 - dyu bible

Kongokolon kɔnɔ kitabu 5

¹Masaba y'a fɔ Musa ye ko:

²«A fɔ Isirayɛlidenw ye ko ni *kaba be minw na, walima cɛyabana, walima musoyabana, ani mɔgɔ minw magara suu la k'u yɛrɛ nɔgɔ, olu ka kan ka gwɛn ka bɔ aw cɛma.

³A cɛɛ fara muso kan, aw k'u gwɛn k'u bila aw ka sigiyɔrɔ kɔfɛ janko u kana aw ka sigiyɔrɔ nin nɔgɔ, bari ne be aw cɛma.»

⁴Isirayɛlidenw y'a kɛ ten. U y'u gwɛn k'u bila u ka sigiyɔrɔ kɔfɛ. Masaba tun ye min fɔ Musa ye, Isirayɛlidenw y'o kɛ.

⁵Masaba y'a fɔ Musa ye tugu ko:

⁶ «A fɔ Isirayɛlidenw ye ko ni cɛɛ dɔ, walima muso dɔ ye hakɛ dɔ kɛ a tɔɲɔgɔn na ka ne Masaba hakɛ ta, o tigi jalakinin lo.

⁷A ye hakɛ min kɛ, a bena lɔ n'o ye. A ye fɛɛn min namara, a b'o kɔsegi a tigi ma, k'a ɲɔgɔn tilan duurunan fara a kan.

⁸N'o y'a sɔrɔ balima te fɛntigi nin kɔfɛ, fɛɛn nin be se ka di min ma, o be kɛ ne Masaba ta ye. A bena di sarakalasebaga ma, ani sagajigi min ka kan ka bɔ a ka kojugu yafa kama.

⁹«Isirayɛlidenw bena to ka ne Masaba boɲa ni fɛɛn minw ye, o be di sarakalasebaga min ma, o bɛɛ bena kɛ ale ta ye.

¹⁰Mɔgɔ kelen kelen bɛɛ ben'a ka boɲafɛn minw di Masaba ma, o y'a yɛrɛ ta ye. Nga minw be di sarakalasebaga ma, o be kɛ ale ta ye.»

¹¹Masaba y'a fɔ Musa ye ko:

¹²«A fɔ Isirayɛlidenw ye ko ni cɛɛ dɔ ka muso y'a to yen ka taga kakalaya kɛ

¹³ni cɛɛ wɛrɛ ye, n'a cɛɛ t'a kala ma, n'a dogora k'a kɛ, ni mɔgɔ si te yen min be se k'a fɔ ko ale y'u ye, n'a ma minɛ a kɛyɔrɔ la,

¹⁴n'a keliya b'a cɛɛ dusu la, n'a be keliya kɛ a muso koo la, n'o y'a sɔrɔ muso y'a kɛ, walima n'a m'a kɛ,

¹⁵cɛɛ nin ben'a ka muso nin minɛ ka na n'a ye sarakalasebaga fɛ, ani mugu kilo saba ye k'o kɛ saraka ye. A kana tulu bɔn o kan, a fana kana na ni wusulan ye. Bari o ye keliya saraka ye, fili yiracogo lo.

¹⁶«Sarakalasebaga ben'a to muso nin be gwɛrɛ ka na lɔ Masaba ɲakɔrɔ.

¹⁷A be Masaba ka jii dɔ bɔ jidaga kɔnɔ, ani ka buguri dɔ cɛ fanibugu kɔnɔ k'o don jii nin kɔnɔ,

¹⁸ka sɔrɔ ka muso nin minɛ k'a lɔ Masaba ɲakɔrɔ, k'a kunsigi foni, ka saraka nin don a bolo, min ye fili yira saraka ye, ani keliya ta. Sarakalasebaga bena jii kunaman nin fana ta, min be danga lase mɔgɔ ma,

¹⁹k'a to muso nin be kali. A ben'a fɔ a ye ko: ‹N'i ma la ka ye ni cɛɛ wɛrɛ ye, k'i to i cɛɛ fɛ, n'i ma kakalaya kɛ ka ye fewu, n'i ma i yɛrɛ ɲagami k'i cɛɛ lafili, jii kunaman nin, min be na ni danga ye, Ala k'i tanga o danga ma.

²⁰Nga n'a y'a sɔrɔ k'i to i cɛɛ fɛ, i y'a to yen ka kakalaya kɛ k'i yɛrɛ ɲagami, n'i lara ni cɛɛ wɛrɛ ye,

²¹Masaba k'i kɛ wolobali ye, i kɔnɔ ka funu. A k'a kɛ i tɔgɔ ka kɛ i ka siya fɛ ɲɔgɔndangafɛn ye.

²²Jii nin, min be na ni danga ye, n'o donna i kɔnɔ na, i kɔnɔ ka funu, i ka kɛ wolobali ye.› Muso nin k'a fɔ ko: ‹Amiina yarabi.›

²³Sarakalasebaga bena dangakuma nunu sɛbɛn, k'o sɛbɛnninɔ ko ni jii kunaman nin ye.

²⁴O kɔ, a k'a di muso nin ma a k'a min. Jii nin ben'a tɔɔrɔ.

²⁵Sarakalasebaga ka keliya saraka nin minɛ a bolo, k'a fifa ne Masaba ɲakɔrɔ, ka sɔrɔ ka na n'a ye sarakabɔyɔrɔ la.

²⁶A ben'a tigɛ ɲaa kelen bɔ sarakamugu nin na, min ye hakilijigi ta ye, k'o jɛni sarakabɔyɔrɔ kan. O kɔ, a be sɔrɔ ka jii nin di muso nin ma a k'a min.

²⁷Ni muso nin ye jii nin min, n'o y'a sɔrɔ a tun y'a cɛɛ to yen ka taga kakalaya kɛ k'a yɛrɛ ɲagami, mɔgɔdangaji nin dontɔ a kɔnɔna, a k'a tɔɔrɔ. A ka kɛ wolobali ye, a kɔnɔ ka funu. O la, muso nin be kɛ dangaden ye a ka siya cɛma.

²⁸Nga n'o y'a sɔrɔ muso nin tun ma kakalaya kɛ, k'a yɛrɛ ɲagami, a be kɛ hɔrɔn ye, a bena se ka deen sɔrɔ.

²⁹«Ni muso dɔ y'a cɛɛ to yen ka kakalaya kɛ k'a yɛrɛ ɲagami, o sariya lo, keliya ta,

³⁰walima ni keliya be cɛɛ dɔ dusu la a ka muso koo la, n'a sɔmina koo dɔ la, a be taga n'a ye, sarakalasebaga ka muso nin minɛ ka n'a lɔ Masaba ɲakɔrɔ ka sariya nin sira bɛɛ taama a kama.

³¹Cɛɛ bena jati hɔrɔn ye, nga muso bena lɔ n'a ka kojugu kunko ye.»