Read dyu Kongokolon kɔnɔ kitabu 8 Bible Online

Kongokolon kɔnɔ kitabu 8 - dyu bible

Kongokolon kɔnɔ kitabu 8

¹Masaba y'a fɔ Musa ye ko:

² «A fɔ Arɔn ye ko n'a be fitinɛdaga wolonwula nunu sigira tuma min na, a k'u sigi ka ɲasin fitinɛbilayɔrɔ ɲatilen kan.»

³Arɔn y'a kɛ ten, a ye fitinɛdaga nunu sigi k'u ɲaa sin u bilayɔrɔ ɲatilen kan ka kɛɲɛ ni Masaba ka fɔta ye Musa ma.

⁴Fitinɛ nin baaracogo filɛ: U tun ye fitinɛ bilayɔrɔ kɛ ni sanu faganin ye, k'a ta a juu ma fɔɔ a kuun na, min be i n'a fɔ yirifeerenw. Masaba tun y'a fɔ Musa ye cogo min na, u ye fitinɛ bilayɔrɔ nin dilan ten.

⁵Masaba y'a fɔ Musa ye ko:

⁶«Levi kɔmɔgɔw woloma k'u bɔ Isirayɛliden tɔw cɛma k'u saniya.

⁷I bena u saniya cogo min na, o filɛ: i be to ka jii min kɛ ka fɛɛn saniya k'u kɛ Masaba ta ye, i k'o dɔ seriseri u kan. O kɔ, u k'u farisi bɛɛ li, k'u ka faniw ko, u bena saniya.

⁸O kɔ, u ka na ni tura dɔ ye, ani suman saraka min ka kan ka fara o kan, min ye mugu tɛntɛnnin nɔɔninin ye, tulu la. I ka tura wɛrɛ minɛ k'o kɛ hakɛ yafa ta ye.

⁹I ben'a to Levi kɔmɔgɔw be na Ɲɔgɔnkunbɛn fanibugu ɲafɛ, o kɔ, i ka Isirayɛlidenw lajɛn.

¹⁰I ben'a to Levi kɔmɔgɔw be lɔ ne Masaba ɲakɔrɔ, Isirayɛlidenw b'u bolow la u kan.

¹¹Arɔn bena Levi kɔmɔgɔw kalifa ne Masaba ma i n'a fɔ boɲafɛn, Isirayɛlidenw tɔgɔ la, u be ne ka baara kɛ.

¹²«O kɔ, Levi kɔmɔgɔw k'u bolow la tura nunu kuun na, i ka kelen kɛ hakɛ yafa saraka ye, ka kelen nin kɛ saraka jɛnita ye, ne Masaba ye, janko Levi kɔmɔgɔw ka yafa sɔrɔ.

¹³I k'a to Levi kɔmɔgɔw be lɔ Arɔn n'a deenw ɲafɛ, o kɔ, i k'u di ne ma i ko saraka.

¹⁴I bena Levi kɔmɔgɔw faran ka bɔ Isirayɛliden tɔw la ten, u bena kɛ ne taw ye.

¹⁵«O kɔ, Levi kɔmɔgɔw bena baara kɛ Ɲɔgɔnkunbɛn fanibugu kɔnɔ. I bena u saniya k'u di ne ma ten.

¹⁶Bari u kɛra ne taw ye pepewu Isirayɛlidenw cɛma. Ne y'u kɛ n taw ye deen fɔlɔw nɔɔ na, Isirayɛlidenw ka deen fɔlɔw.

¹⁷ Isirayɛlidenw ka deen fɔlɔw bɛɛ ye ne taw ye, adamaden ta fara begɛnw ta kan. Kabini ne ye Ezipitikaw ka deen fɔlɔw bɛɛ faga, k'a ta o tuma na, deen fɔlɔw kɛra ne taw ye.

¹⁸Nga ne ye Levi kɔmɔgɔw ta Isirayɛlidenw ka deen fɔlɔw nɔɔ na.

¹⁹N ye Levi kɔmɔgɔw di Arɔn n'a deenw ma Isirayɛlidenw cɛma janko u ka to ka baara kɛ Isirayɛlidenw ye Ɲɔgɔnkunbɛn fanibugu kɔnɔ, u ka to ka hakɛ yafa daali u ye. O la, Isirayɛlidenw tena bɔnɛ sɔrɔ tugu. Bari u tena to ka gwɛrɛ ne ka sigiyɔrɔ la tugu.»

²⁰Masaba tun ye koo minw fɔ Musa ye Levi kɔmɔgɔw koo la, Musa ni Arɔn ani Isirayɛlidenw bɛɛ lajɛnnin y'o kɛ tigitigi.

²¹Levi kɔmɔgɔw y'u yɛrɛ saniya k'u ka faniw ko. Arɔn ye taamasiɲɛ dɔ kɛ Masaba ɲakɔrɔ k'u ka kojuguw yafa daali janko k'u saniya.

²²O kɔ, u nana u ka baara kɛ Ɲɔgɔnkunbɛn fanibugu kɔnɔ. Arɔn n'a deenw le tun be u kunna. Masaba tun ye min fɔ Musa ye Levi kɔmɔgɔw koo la, u y'o kɛ.

²³Masaba y'a fɔ Musa ye tugu ko:

²⁴«Fɛɛn min latigɛra Levi kɔmɔgɔw koo la, o filɛ: Levi kɔmɔgɔ minw sii sera saan mugan ni duuru ma ani ka tɛmɛ o kan, olu bena to ka don Ɲɔgɔnkunbɛn fanibugu kɔnɔ ka baara kɛ.

²⁵Ni min nana saan bi duuru sɔrɔ, o tigi be baara dabila. O kana baara kɛ yen tugu.

²⁶O be se ka to a balimaw kɔrɔ yen ka to k'u dɛmɛ u ka baara la, a tɔgɔlabaara tena d'a ma tugu. Fɛɛn o fɛɛn kɛra Levi kɔmɔgɔw ka baara ye, i ben'o kɛ ten.»