Read dyu Mise ka kitabu 1 Bible Online

Mise ka kitabu 1 - dyu bible

Mise ka kitabu 1

¹ Zuda mara masacɛw Yotamu, ni Akazi, ani Ezekiyasi ka waatiw la, Masaba ye kuma min fɔ Morɛsɛtika Mise ye, a ye min yir'a la Samari ni Zeruzalɛmu kosɔn, o filɛ.

²Siya bɛɛ k'a tulo malɔ! Dugukolo ni fɛɛn o fɛɛn b'a kan, u bɛɛ ka mɛnni kɛ ka ɲa! Matigi, Masaba bena aw jalaki k'a to a ka sigiyɔrɔ la,

³Masaba bɔtɔ filɛ nin ye a ka sigiyɔrɔ la. A be jigira, a be taamana kulujanjanw kan.

⁴Kuluw be yelenn'a seen kɔrɔ i ko tasuma be liɲaga yelen cogo min na. U be yɛrɛkɛ i ko jii.

⁵O bɛɛ be kɛra Yakuba kɔmɔgɔw ka kojuguw kama, o be kɛra Isirayɛli somɔgɔw ka hakɛw kama. Yakuba kɔmɔgɔw ka kojugu be bɔ min? Samari dugu tɛ wa? Zuda mara mɔgɔw ka josɔn bɔra min? Zeruzalɛmu tɛ wa?

⁶Masaba ko: «Ne bena Samari dugu kɛ tomo ye, n ben'a kɛ foro ye. N ben'a kabakuruw walaka k'u fili kɔkɛnɛ na, n ben'a walaka fɔɔ a daan na.

⁷A ka joow bɛɛ bena ci, a ka tɔnɔ bɛɛ bena jɛni. Ne ben'a ka jaaw bɛɛ halaki. Bari, o bɛɛ sɔrɔla kakalaya la. U do bena kɛ kakalamusow ka sara ye.»

⁸Ne bena kasi, ka kasi! Ne bena taama senlakolon, ni farilakolon. Ne bena kasi i ko kongowulu, ne bena ŋunan i ko kɔnɔsogolon.

⁹Fura te Samari ka jolida nin na, a be yogoyogora fɔɔ ka taga se Zuda mara ma, fɔɔ ka se ne ka mɔgɔw ka duguba Zeruzalɛmu kɔnɔ!

¹⁰Aw kana o kibaruya nin fɔ Gati dugu kɔnɔ. Aw kana kasi. Aw ka kolonkolon buguri la Bɛtileyafara [1] dugu kɔnɔ.

¹¹Safirikaw, aw ka tɛmɛ ka bɔ julakolon, ni maloya ye. Saanankaw yɛrɛ te sera ka bɔ u ka dugu kɔnɔ. Kasimisɛnw le be kɛra Bɛtesɛli dugu kɔnɔ. Aw dɛmɛko kuma kɔni banna sa!

¹²Marɔtikaw sirannin be u ka hɛrɛ sɔrɔko la. Bari, Masaba ye bɔnɛ bila ka jigi Zeruzalɛmu dugu kɔnɔ.

¹³Lakisikaw, aw k'aw ka wotorow siri soow la. Aw le ye *Siyɔnkaw bila hakɛ la. Bari aw le kɔnna ka Isirayɛli mara mɔgɔw ka kojuguw ɲɔgɔn kɛ.

¹⁴O kama, aw ka kan ka faran Morɛsɛtigatikaw la. Akizibu dugu tena se ka foyi ɲa Isirayɛli masaw ye.

¹⁵ Ne bena kɛlɛdenw bila ka na aw Maresakaw kama tugu, u bena se aw kɔrɔ. Isirayɛli kunkɔrɔtabagaw bena boli ka taga dogo Adulamu farawo kɔnɔ.

¹⁶Aw k'aw kunsigiw tigɛ, aw k'aw kuun li aw deen kanuninw ka saya kosɔn! Aw k'aw kuun kɛ i ko duga ta. Bari, u bena aw deen nunu minɛ ka taga n'u ye yɔrɔjan.