Read dyu Mise ka kitabu 2 Bible Online

Mise ka kitabu 2 - dyu bible

Mise ka kitabu 2

¹Mɔgɔ minw be kojugu miiri, minw be baarajugu dɔ ŋaniya ta u ka ladilan kan, dugu mana gwɛ dɔrɔn, n'u ye sababu sɔrɔ, u b'o kɛ. Bɔnɛ ye olu ta ye!

²N'u ɲaa bɔra mɔgɔw ka forow la, u b'u bɔsi. N'u ɲaa bɔra mɔgɔw ka soo la, u b'u minɛ. U be lutigi n'a ka somɔgɔw bololafɛnw bɔsi, u b'u ka forow minɛ.

³O kama, Masaba ko: «Ne bena bɔnɛ la mɔgɔ nunu kan. Aw tena se k'aw kuun bɔ min kɔrɔ, aw tena se fana k'aw kuun kɔrɔta. Bari a bena kɛ bɔnɛ waati ye.

⁴O tuma na, mɔgɔw bena ɲadonya dɔnkili la aw kosɔn. U ben'a fɔ ko aw halakira pewu! Aw ka siya niyɔrɔ kɛra mɔgɔ wɛrɛw ta ye. Ee! A kɛra di u b'a bɔsira aw la? U b'aw ka forow tilanna murutibagaw cɛ.»

⁵O kama, aw si tena foro sɔrɔ Masaba ka mɔgɔw ka yɔrɔ tilantuma na.

⁶Dɔw b'a fɔ ne ye ko: «E kana kirayakuma nin ɲɔgɔn fɔ. K'a fɔ ko maloya yɔrɔ man jan, o ye fatɔyakuma ye.

⁷Yakuba ka somɔgɔw, aw be sɔn ka kuma ten wa? O tuma na, Masaba ka Nii ka muɲuli ser'a daan na le wa? Yala a be to k'a kɛ ten le wa?» Ne ka kuma te hɛrɛkuma ye mɔgɔtilenninw fɛ wa?

⁸ Masaba ko: «Aw wilila ne ka mɔgɔw kama ka kɛ u juguw ye. Mɔgɔ minw be kɔsegira ka bɔ kɛlɛkɛyɔrɔ la n'u jigi siginin lo, aw be olu ka delekeba bɔsi.

⁹Aw be ne ka mɔgɔw ka musow gwɛn ka bɔ u diyanasow kɔnɔ. Ne ye kunkɔrɔta min di u deenw ma, aw b'o nagasira pepewu.

¹⁰Aw ye wili ka taga! Aw ka lafiɲɛ banna! Aw ka tilenbaliyakow kama, tɔɔrɔba bena aw sɔrɔ.

¹¹Ni mɔgɔ dɔ wilila ka to ka kumakolon fɔ, n'a be galon tigɛ ko: ‹Aw bena duvɛn, ani dɔrɔ fariman caaman sɔrɔ.› Ɔnhɔn, o kira fufɔla ɲɔgɔn le ka kan ni siya nin ye!

¹²«Yakuba ka somɔgɔw, ne bena aw bɛɛ lajɛn. Isirayɛli ka mɔgɔ tɔɔ minw tora, ne bena olu lajɛn. Ne bena u kɛ ɲɔgɔn kan i ko sagaw, wɛɛrɛ kɔnɔ, i ko sagakulu, ɲiminikɛyɔrɔ la. U ka mankan bena boɲa.

¹³Mɔgɔ min ka kan ka tɛmɛyɔrɔ bɔ u ye, ale bena bila u ɲa, ka daa yɛlɛ. U be tɛmɛ ka bɔ ni donda ye. U ka masacɛ bena bila u ɲa, Masaba bena kɛ u kunna.»