Read dyu Mise ka kitabu 4 Bible Online

Mise ka kitabu 4 - dyu bible

Mise ka kitabu 4

¹Waati dɔ bena se, Masaba ka soo be kulu min kan, ale bena kɛ kuluw ni tintinw bɛɛ ɲa. O tuma na, siya caaman bena to ka na ale kan.

²Siya caaman bena na ale kan ka to k'a fɔ ko: «Aw ye na an ka yɛlɛ Masaba ka kulu kan, an ka taga Yakuba ka Ala ka soo. A bena an kalan a ka koow la, an ben'a sira taama.» Tiɲɛ na, Ala ka sariya be bɔ *Siyɔn le, a ka kuma be bɔ Zeruzalɛmu.

³ A bena siya caaman ka koo ɲanabɔ ka siya barikamanw ka kiti tigɛ, hali yɔrɔjan taw. U bena u ka murujanjanw bugɔ k'u kɛ dabaw ye, u bena u ka tamanw kɛ wɔrɔsɔw ye. Jamanaw tena murujanjanw ta ɲɔgɔnw kama tugu. Mɔgɔw tena kɛlɛ kɛcogo dege tugu.

⁴ Bɛɛ bena sigi a yɛrɛ ka *ɛrɛzɛnsun kɔrɔ, u bena sigi u yɛrɛ ka torosun kɔrɔ. Mɔgɔ si tena u hakili ɲagami. Masaba, Setigi le ko ten.

⁵Ka siya tɔw bɛɛ to u ka josɔn na, anw kɔni bena tugu Masaba an ka Ala kɔ tuma bɛɛ.

⁶Masaba ko: «O waati la, ne bena senkelenninw lajɛn, ne ye minw gwɛn ka jɛnsɛn, k'u tɔɔrɔ, ne bena olu kafo ɲɔgɔn kan.

⁷Tɔɔ bena sɔrɔ senkelenninw na. Minw tun gwɛnna ka taga fɔɔ yɔrɔjan, n bena olu kɛ siya barikaman ye. Masaba bena kɛ u ka masa ye *Siyɔn kulu kan k'a ta o waati ma, ni tuma bɛɛ.

⁸Ele Siyɔn kulu, e min be jama kɔlɔsi i ko begɛndɛndɛbaga, fɔlɔfɔlɔ kuntigiya nin bena segi ele ma. Masaya bena se Zeruzalɛmukaw le ma.»

⁹Mun na aw b'a la ka kule sisan? Masa te aw fɛ wa? Aw ladibagaw sara wa? O la, aw be tɔɔrɔla i ko muso min be tiin na.

¹⁰Aw *Siyɔnkaw, aw ka tɔɔrɔ kosɔbɛ, aw ka kule i ko muso min be tiin na. Bari sisan, aw bena bɔ dugu kɔnɔ ka taga sigi kongo kɔnɔ. Aw bena taga fɔɔ Babilɔni. O yɔrɔ la, aw bena kisi. Masaba bena aw bɔsi aw juguw la yen le.

¹¹Sisan, siya caaman y'u daa kɛ kelen ye aw kama. U b'a fɔra ko: «Fɔɔ Siyɔnkaw ka cɛn pewu! A ciko k'an waasa.»

¹²Nga, olu ma Masaba ka koo latigɛninw lɔn do, a bena min miiri, olu m'o lɔn do! A bena u lajɛn i ko suman gosita, gwenege kan.

¹³Haya! Siyɔnkaw, aw ye bɔ ka suman gosi. Ne bena aw kɛ i ko misiw. Ne bena gɔɔn nigɛlaman d'aw ma. Ne bena sɔnnifara ziralaman d'aw ma. Aw bena jamana caaman tereke k'u bololafɛnw di ne Masaba ma. U ka nafolow ka kɛ ne diɲɛ bɛɛ kuntigi ta ye.

¹⁴Nga sisan Zeruzalɛmukaw, aw ka lajɛn. U y'aw datugu. U bena bere le kɛ ka Isirayɛlidenw ka ɲamɔgɔ daa bugɔ.