Read dyu Mise ka kitabu 7 Bible Online

Mise ka kitabu 7 - dyu bible

Mise ka kitabu 7

¹Ee! Ne kɛra i ko mɔgɔ min be fɛfɛli kɛra yiriforo la, k'a sɔrɔ hali yiriden kelen dumuta te sɔrɔ, min nigɛ tun bena ne minɛ.

²Mɔgɔtilennin te jamana kɔnɔ. Tiɲɛfɔla te adamadenw cɛma tugu. U bɛɛ dɛnnin lo waasa k'u tɔɲɔgɔnw faga, bɛɛ be ɲɔgɔn dɛndɛ.

³U be se kojugu la kosɔbɛ. Ɲamɔgɔw be bolo nɛmuyɔrɔ fɛ fɔlɔ ka sɔrɔ ka ɲuman kɛ. Kititigɛbagaw be kiti tigɛ tɔnɔ kama. Mɔgɔbabaw b'u diyanako fɔ kɛnɛ kan ka namara kɛ k'o sɔrɔ.

⁴Mɔgɔ min ka ɲi u cɛma, ale kɛra i ko ŋɔnitu. Min tilennin lo u bɛɛ ye, ale kɛra i ko wɛɛrɛ ka ŋɔni. I ka kɔlɔsilikɛbagaw ye tɔɔrɔlon min koo fɔ, o surunyana. U kɔnɔ gwantuma sera.

⁵Kana la i ka mɔgɔw si la, kana la i teriw si la. Kana sɔn ka dɔ fɔ i ka muso yɛrɛ ɲana.

⁶ Bari dencɛ b'a faa dɔgɔya, denmuso be wili a baa kama, dencɛ muso be wili a biranmuso kama. Bɛɛ jugu bena kɛ a yɛrɛ ka somɔgɔw le ye.

⁷Nga, ne kɔni ɲaa sinnin be Masaba le ma. Ne jigi be Ala le kan, ne kisibaga, a bena mɛnni kɛ ne fɛ.

⁸Kana yɛlɛ ne ma dɛ, ne jugu! Ni ne benna, ne bena wili. Ni ne be dibi la, Masaba bena kɛ ne ka yeelen ye.

⁹Ne ka kan ka Masaba ka tɔɔrɔ muɲu, fɔɔ n'a ye ne ka koo filɛ k'a ɲanabɔ, bari ne y'a hakɛ ta. A bena ne bɔ dibi la, ne ben'a ka tilenninya nafa ye.

¹⁰Ne jugu ben'a ye, a bena maloya. Ale min tun b'a fɔra ne ye ko: «Masaba, e ka Ala be min?» Ne bena n jugu nin ye yɛrɛ yɛrɛ le. A bena nɔɔni i ko sira kan bɔgɔ.

¹¹N'aw ka dugu laminikogo bena lɔ loon min na, a daan bena bɔ kɔfɛ.

¹²O loon na, mɔgɔw bena bɔ Asiri jamana ni Ezipiti jamana na ka na aw fɛ. K'a ta Ezipiti fɔɔ ka ta'a bila Efarati baji la, k'a ta kɔgɔji kelen ma ka ta'a bila dɔ wɛrɛ la, k'a ta kulu dɔ la ka ta'a bila dɔ wɛrɛ la, u bena na aw fɛ.

¹³Dugukolo lakolon bena to mɔgɔw kosɔn, u ka kɛwaliw kosɔn.

¹⁴I ka bere kɛ k'i ka jama mara. I ka sagakulu lo, i niyɔrɔ lo, minw siginin be u kelen na, tuu kɔnɔ, yiriforow cɛma. Taga u dɛndɛ *Basan ni Galaadi i ko a tun be cogo min na fɔlɔfɔlɔ la.

¹⁵«Ne bena kabakow kɛ aw b'a ye, i ko aw bɔwaati la, Ezipiti jamana na.»

¹⁶Siya wɛrɛw ben'a ye, u bena maloya, u n'u ka sebagaya bɛɛ. U bena u bolo la u daa la, u tulo be geren.

¹⁷U bena buguri dumu i ko saa, u bena kɛ i ko fɛɛn minw be fofo u kɔnɔbara kan. U yɛrɛyɛrɛtɔ le bena bɔ u ka yɔrɔ barikamanw na, u jaa tigɛnin. U bena u ɲaa sin Masaba an ka Ala ma siranya fɛ.

¹⁸Ala, i ɲɔgɔn te batofɛnw cɛma, ele min be hakɛ yafa, ni min filila, e b'o ye k'a to yen. I ka mɔgɔw tɔɔ min tora, olu kanu kama, olu minw ye i ta ye, i diminin tena to u kɔrɔ tuma bɛɛ, nga ka makari u la, o ka d'i ye.

¹⁹I bena makari an na tugu. I bena an ka kojugu nɔɔni i seen kɔrɔ. I bena an ka hakɛw bɛɛ fili fɔɔ kɔgɔji jukɔrɔ.

²⁰I bena i ka kantigiya yira Yakuba kɔmɔgɔw la, i bena i ka ɲumanya kɛ Ibrayima kɔmɔgɔw ye, i ko e tun y'i daa di an faaw ma cogo min na kabini fɔlɔfɔlɔ.