Read dyu Nawumu ka kitabu 1 Bible Online

Nawumu ka kitabu 1 - dyu bible

Nawumu ka kitabu 1

¹ Kirayakuma min fɔra Ninivu kosɔn, o filɛ nin ye. Ala ye koo minw yira Ɛlikɔsika Nawumu la, o kitabu filɛ:

²Masaba ye Ala ye keliya be min na. A be mɔnɛ bɔ. A diminin ma ɲi! Masaba b'a mɔnɛ bɔ a juguw la, a t'a kɔniyabagaw to gwansan.

³Masaba te dimi joona. See b'a ye kosɔbɛ. Nga, a te kojugukɛla to gwansan. Masaba be taama funufunu ni sanfɔɲɔ le kɔnɔ. Sankabaw y'a seen ka gwangwan ye.

⁴A be sɔngɔ kɔgɔji kunna ale be ja. A be bajiw bɛɛ kɛ u be ja. *Basan kongo ni Karimɛli kulu be ja. Liban jamana biin be fɔnsɔnfɔnsɔn.

⁵Kuluw be yɛrɛyɛrɛ Masaba ɲa, tintinw be lamaga. Dugukolo fana be yɛrɛyɛrɛ a ɲa, diɲɛ n'a kɔnɔnafɛnw bɛɛ be yɛrɛyɛrɛ.

⁶Jɔn be se ka lɔ ka Masaba ka dimi kɔnɔ? N'a dusu gwanna, jɔn be se ka lɔ? N'a dimina, o be se yɔrɔ bɛɛ i ko tasuma, faraw be mugumugu a ɲa.

⁷Masaba ka ɲi, dogoyɔrɔ lo tɔɔrɔlon na. Mɔgɔ minw b'u yɛrɛ kalifa a ma, a be olu tanga,

⁸hali jiba natuma na. Nga a ben'a juguw halaki, a bena u bila lahara.

⁹Aw be mun kojugu le miirila Masaba kosɔn? Ale lo be koo bɛɛ ban. Tɔɔrɔ tena sɔrɔ tugu.

¹⁰Aw juguw be i ko ŋɔnitu min dondonnin be ɲɔgɔn na i ko dɔrɔtɔw. U bena jɛni pepewu i ko biin janin.

¹¹Mɔgɔ dɔ bɔra ele Ninivu dugu kɔnɔ min be kojugu labɛnna Masaba kama. Miirijugu tigi lo.

¹²Masaba ko Zuda mara mɔgɔw ma: «Hali ni fanga b'u la, hali n'u ka ca fana, u bena tunu ka bɔ yen pewu! Ne tun y'aw kuun surun, ne tena aw kuun surun tugu.

¹³Sisan, u be tɔɔrɔ min lara aw kan, n bena o ban, n bena aw foni ka bɔ aw sirijɔrɔkɔ la.»

¹⁴Masaba be min fɔra e Ninivu kosɔn, o filɛ nin ye: «Kɔmɔgɔ tena sɔrɔ i la, e tɔgɔ bena la min kan. I ye jaa minw lɛsɛ ka minw yelen ka bila i ka joso kɔnɔ, n bena u halaki. N b'i kaburu lalaga, bari i te foyi ye.»