Read dyu Abakuki ka kitabu 1 Bible Online

Abakuki ka kitabu 1 - dyu bible

Abakuki ka kitabu 1

¹Ala ye koo min yira kira Abakuki la, o filɛ.

²Masaba, ne ka kan ka dɛmɛ ɲini i fɛ fɔɔ tuma jumɛn e ka sɔrɔ ka ne jaabi? Ne ka kan ka kule ka juguya koo fɔ fɔɔ tuma jumɛn e ka sɔrɔ k'an kisi?

³Mun na i b'a to ne ɲaa be la tilenbaliyakow kan? Mun na i be sɔn kojugu ka kɛ i ɲana? Ne te foyi yera ni benkanni ani fariyakow dama tɛ! Kɛlɛw be kɛra, bɛnbaliya ka ca.

⁴O la, sariya te batora tugu, tilenninya nagasira. Mɔgɔjugu be see sɔrɔla mɔgɔtilennin kan. O tuma na, tiɲɛ te fɔ tugu kiti la.

⁵ Masaba ko: «Aw ye filɛli kɛ siya wɛrɛ fɛ, aw ɲaa k'a ye, ka kabakoya kosɔbɛ! N bena koo kɛ aw ɲana, ni mɔgɔ b'o lakali aw ye, aw tena la o la.

⁶ Ayiwa, ne bena Babilɔnikaw bila aw la. O siya nin ka jugu, u ka fari, u be taga yɔrɔ bɛɛ diɲɛ kɔnɔ ka mɔgɔw ka yɔrɔw minɛ.

⁷Siraɲamɔgɔw lo, u be mɔgɔ jaa tigɛ! Olu yɛrɛ le b'u ka sariyaw sigi, k'u yɛrɛ boɲa!

⁸U ka soow ka teli ka tɛmɛ waraninkala kan, u ka jugu ka tɛmɛ kongowulu kɔngɔtɔlaman kan. U ka sotigiw be panna ka na, u ka sotigiw natɔ filɛ ka bɔ fɔɔ yɔrɔjan. U be leru i ko sɛgɛn jigitɔ a ka dumuni tayɔrɔ.

⁹U bɛɛ be nana benkanni le kama. U be filɛli kɛ u ɲafɛ dɔrɔn. U be jɔɔnw minɛ caaman, u daa te se ka lɔn!

¹⁰U b'u ɲaa don masaw la. Jamana ɲamɔgɔw te foyi ye u ɲana. Dugu barikaman te foyi ye u ɲana. U be yɛlɛyɛlɛnan kɛ o kɔfɛ ka don ka dugu minɛ.

¹¹O kɔ, u be tɛmɛ u ka sira fɛ i ko fɔɲɔba. Fɛnjuguw lo, u ka fanga le y'u ka Ala ye.»

¹²Kabini diɲɛ daminɛ na, e le te Masaba ye wa? Ne ka Ala, i ka ɲi, i tena sa. An tangabaga Masaba, i ye siya nin woloma ka barika don u la waasa ka na an ɲaa gwan.

¹³I tilennin lo, kojugu filɛ ma. I te se ka benkanni muɲu. Mun na i do be muɲu janfamɔgɔw kɔrɔ? Mun na i be je, mɔgɔjuguw be mɔgɔtilenninw halaki?

¹⁴I be mɔgɔw kɛ i ko jigɛw, i ko fɛnmisɛnw, kuntigi te minw fɛ.

¹⁵An juguw be mɔgɔw minɛna i ko jigɛ be minɛ ni dulen ye cogo min na. U b'u minɛ jɔɔ kɔnɔ, u b'u cɛ n'u ka jɔmisɛnw ye, u nisɔn be diya kosɔbɛ!

¹⁶U b'u ka jɔɔw sɔn, u be wusulan jɛni u ka jɔmisɛnw ye. Bari, olu sababu la, niyɔrɔ ɲanaman sɔrɔla, dumuni diyara!

¹⁷Yala, a bena to k'a ka jɔɔ yɛlɛma kudayi wa? Yala, a bena to ka siyaw halaki ka taga n'a te makari wa?