Read dyu Abakuki ka kitabu 2 Bible Online

Abakuki ka kitabu 2 - dyu bible

Abakuki ka kitabu 2

¹Ne bena to n ka kɔlɔsilikɛyɔrɔ la, ne bena lɔ ka ɲa dugu laminikogo kan. Ne ben'a filɛ Masaba bena min fɔ n ye. Ne bena jaabili min sɔrɔ n ka makaritɔkan na, n k'o mɛn a fɛ.

²O tuma na, Masaba ye ne jaabi ko: «Ne bena min yira i la, o sɛbɛn, i k'a kɔrɔ sɛbɛn walaka kan, waasa mɔgɔw ka se k'a kalan ni gwɛlɛya t'a la.

³ Bari, koo min lo, a n'a kɛwaati lo, waati surunyana ka ban, siga t'a la. Hali n'a mɛnnin be i ɲana, e k'a kɔnɔ. A bena na se wajibi, siga t'a la.

⁴ Yɛrɛboɲala filɛ, a te kotilennin lɔn.» Nga, mɔgɔtilennin bena kisi a ka lanaya barika la.

⁵Tiɲɛ na, nafolo ye mɔgɔ janfafɛn ye. [1] Yɛrɛboɲala nin te sigi yɔrɔ kelen. A daa waganin lo i ko kaburu, a te fa i ko lahara. A ye siyaw bɛɛ sama ka se a yɛrɛ ma, ka kɛ jama bɛɛ kuntigi ye.

⁶«Nga olu bɛɛ bena na wili a kama k'a lɔgɔbɔ. U ben'a fɔ ko: ‹Mɔgɔ min be mɔgɔw ka warifɛnw cɛ ka mara a yɛrɛ fɛ, bɔnɛ y'o tigi ta ye! Fɔɔ tuma jumɛn ten sa? O be dɔ le faral'a ka juru kan!›

⁷E ka jurutigiw tena bari ka wili i kama wa? I tɔɔrɔbagaw tena wili i kama wa? I bena kɛ u ta ye!

⁸I ye jamana caaman tɔɲɔ minkɛ, siya tɔɔ minw tora, olu fana bena i tɔɲɔ! Bari i ye joli bɔn, ka fariyakow kɛ jamana kɔnɔ, ni duguw kɔnɔ ani dugumɔgɔw bɛɛ la.

⁹Mɔgɔ min be sɔrɔli kɛ tilenbaliya la a ka soo ye, bɔnɛ y'o tigi ta ye! A b'o kɛ waasa k'a ka ɲaga lalaga sanfɛ, a b'o kɛ janko k'a yɛrɛ kisi balawu ma.

¹⁰I ye siya caaman halaki minkɛ, e y'i ka soo ka maloya koo le latigɛ ten, ka kɛ i yɛrɛ ka saya sababu ye.

¹¹Aw ka kogo kabakuruw bena aw jalaki, soo kɔnɔ banabiri bena o kuma kelen fɔ.

¹²Mɔgɔ min be dugu sigi ni joli ye, mɔgɔ min be dugu sigi tilenbaliya la, bɔnɛ y'o tigi ta ye!

¹³Siyaw ka baara nafa bena jɛni, siyaw b'u yɛrɛ sɛgɛn gwansan. O te Masaba, Setigi ka baara ye wa?

¹⁴ Masaba ka sebagaya bena lɔn diɲɛ yɔrɔ bɛɛ la i ko jii be baa la cogo min na.

¹⁵Mɔgɔ min b'a mɔgɔɲɔgɔn bila minni na, bɔnɛ y'o tigi ta ye! A b'a ka baga kɛ k'a ɲanamini, waasa mɔgɔw k'a lɛɛbuyɔrɔ filɛ.

¹⁶I bena maloya le sɔrɔ, kunkɔrɔta tɛ! E fana k'a min sisan sa, k'i julakolon yira mɔgɔw la! Masaba diminin ben'a ɲaa sin i ma, i ka kunkɔrɔta bena yɛlɛma ka kɛ maloya ye.

¹⁷I ye halakili kɛ Liban jamana na, i fana bena halaki. E y'o yɔrɔ kongosogow faga, kongosogow fana bena siranya bila i la. Bari i ye joli bɔn ka fariyakow kɛ jamana kɔnɔ, ni duguw kɔnɔ ani dugumɔgɔw bɛɛ la.

¹⁸Jaa lɛsɛnin be mun ɲa, n'a lɛsɛbaga b'a dilan ka nigɛ yeelen k'a kɛ jaa ye n'a be galonw fɔ mɔgɔw ye? A lalagabaga k'a jigi la a kan k'o kɛ joo ye min te kuma, o be mun ɲa?

¹⁹Mɔgɔ min b'a fɔ lɔgɔkuru ye: ‹Wili!› walima k'a fɔ kabakuru ye: ‹Kunun!› bɔnɛ ye o tigi ta ye! Yala a bena fɛɛn dɔ ye k'a fɔ wa? Hali n'a mɔnin be ni sanu ye, ani warigwɛ, a te ninakili do.

²⁰Masaba kɔni b'a batoso kɔnɔ. Dugukolo kan fɛɛn bɛɛ k'u daje a ɲakɔrɔ!»