Read dyu Abakuki ka kitabu 3 Bible Online

Abakuki ka kitabu 3 - dyu bible

Abakuki ka kitabu 3

¹Kira Abakuki ka daalili, mɔgɔw kasicogo la.

²Masaba, ne y'i ka koo kibaru mɛn. O ye ne kabakoya dɛ! I k'o ɲɔgɔn kɛ an ka tile la! O ka ye an ka tile la! Nga i dimiwaati la, i ka sabali ka makari an na!

³Ala be bɔ Teman mara la, Ala be bɔ Paran kulu kan. A ka masaya be sankolo yɔrɔ bɛɛ la, dugukolo yɔrɔ bɛɛ b'a batoko nigɛ don mɔgɔw la.

⁴A be kɛnɛ bɔ i ko tile, yeelen be manamana ka bɔ a bolo la, o le y'a ka fanga dogoyɔrɔ ye.

⁵Fɔɲɔbana le b'a ɲa, banajugu be tugur'a kɔ.

⁶A be lɔ dugukolo be yɛrɛyɛrɛ, a be siyaw filɛ, u jaa be tigɛ. Fɔlɔfɔlɔ kuluw be wurubata! Tintinkɔrɔw be ci! O minw ye a ka tɛmɛsirakɔrɔw ye.

⁷Ne ye kusanw ka soow halakinin ye. Ne ye madiyanw ka jamana kɔnɔ boonw halakinin ye.

⁸Masaba, e dimina bajiw le kɔrɔ wa? I dusu bɔra kɔɔw le kama wa? I yɛlɛla i ka soow n'i ka sebagaya wotorow kan tuma min na, i tun dimina kɔgɔji le kama wa?

⁹E y'i ka toon labɛn, i ye kumagwɛlɛn minw fɔ, olu ye i ka biɲɛw ye. I be dugukolo walaka ka sira di baji ma.

¹⁰Kuluw yɛrɛyɛrɛla i ɲafɛ, sanjiba benna! Badingɛ fara jii la ka mankan bɔ fɔɔ a be wiliwili sanfɛ!

¹¹Tile ni kalo lɔra yɔrɔ kelen i ka biɲɛ manamanakojugu fɛ, n'i ka taman yeelen fɛ.

¹²Dimikojugu fɛ, i be dugukolo bɛɛ yaala. I ka dusugwan fɛ, i be siyaw nɔɔni i seen kɔrɔ.

¹³I bɔra e ka mɔgɔw kisili kama, e ka mɔgɔwolomanin kisili kama. I ye mɔgɔjugu ka soo ci, i y'a juu bɛɛ walaka!

¹⁴E y'u ka biɲɛw kɛ k'u kuntigiw kuun sɔgɔsɔgɔ. K'a sɔrɔ u tun be girinna an kan i ko sanfɔɲɔba ni nisɔndiya ye, k'u b'an yɛrɛkɛ k'an halaki dogo la i ko u sera an kɔrɔ ka ban yɛrɛ!

¹⁵I ye sira bɔ i ka soow ye kɔgɔji kɔnɔ, kɔgɔjiba fufunin kɔnɔ!

¹⁶Ne y'o mɛn, ne kamana gwanna. Mankan nin fɛ, ne daa tora ka yɛrɛyɛrɛ. Ne kolow bɛɛ magayara, n seen tora ka yɛrɛyɛrɛ. Ala bena an tɔɔrɔbagaw ɲaa gwan loon min na, ne ka kan ka n hakili sigi k'o loon nin kɔnɔ.

¹⁷Hali ni toro te deen kɛ, ni foyi te sɔrɔ *ɛrɛzɛnsunw kan, hali ni olivuyiriw te ɲa. Ni balofɛn te sɔrɔ forow kɔnɔ, hali ni sagaw be tunu ka bɔ wɛɛrɛw kɔnɔ, ni misiw be tunu ka bɔ wɛɛrɛw kɔnɔ,

¹⁸ne kɔni bena nisɔndiya Masaba kosɔn. Ne bena ɲanagwɛ ne kisibaga Ala kosɔn.

¹⁹ Matigi, Masaba ye ne tigi ni ne fanga ye, a be ne seenw kɛ i ko jaa taw, a be see di ne ma ka taama kuluw kan. Dɔnkililabagaw ɲamɔgɔ le y'o la ni kolonjo ye.