Read dyu Sofoni ka kitabu 1 Bible Online

Sofoni ka kitabu 1 - dyu bible

Sofoni ka kitabu 1

¹ Masaba ka kuma sera Kusi dencɛ Sofoni ma, o y'a sɔrɔ Amɔn dencɛ Zoziyasi le tun ye Zuda mara masa ye. Kusi facɛ tun ye Gedaliya ye, Gedaliya fana tun ye Amariya deen ye, Amariya faa tun ye Ezekiyasi ye.

²Masaba ko: «Ne bena fɛɛn bɛɛ sii tunu ka bɔ dugukolo kan.

³Ne bena mɔgɔw, ni begɛnw sii tunu, ne bena kɔnɔw ni jigɛw sii tunu. Ne bena mɔgɔjuguw halaki, ne bena mɔgɔw sii tunu ka bɔ dugukolo kan.» Masaba ko ten.

⁴«Ne bena wili Zuda mara kama, ani Zeruzalɛmukaw bɛɛ kama. N bena *Baali sɔnko ban ka bɔ yen, k'a ka murutigiw tɔgɔ tunu,

⁵ni minw be yɛlɛ sanbon kan ka sankololafɛnw sɔn, ani minw be ne Masaba bato ka tila ka dajuru ta *Milikɔmu ye,

⁶ni minw be ban ne la, minw te ne yɔrɔ ɲini, minw te ne ɲininga foyi la.»

⁷I daa tugu Matigi, Masaba ɲakɔrɔ, bari Masaba ka loon surunyana. Masaba ye saraka labɛn, a ye mɔgɔ minw wele, a y'u saniya.

⁸Ne Masaba ka saraka bɔlon na, ne bena wili ɲamɔgɔ ni masacɛ ka somɔgɔw kama, ani minw bɛɛ b'u ka koow kɛ lonanw ta cogo la.

⁹O loon na, minw bɛɛ be batoli kɛ i ko josɔnlaw, minw b'u kuntigi ka soo fa ni benkannifɛnw ni namarafɛnw ye, ne bena wili olu kama.

¹⁰Ne Masaba ko: O loon na, kasikanba bena bɔ Jigɛminɛyɔrɔ donda la, kulekan bena bɔ Cinkura kɔnɔ, mankanba bena bɔ kuluw kan. [1]

¹¹Aw minw ka ciin be dingɛ kɔnɔ, aw ka kule! Bari jagokɛlaw bɛɛ bena sa, feerelikɛlaw bɛɛ bena halaki!

¹²O tuma na, ne bena tasuma le mana, ka don ka Zeruzalɛmu bɛɛ mɔmɔ, minw fanin b'u yɛrɛ la, ka olu halaki ka bɔ yen! Minw b'a fɔ u yɛrɛ kɔnɔ ko: ‹Masaba te se ka ɲuman kɛ, a te se ka juguman kɛ.›

¹³Ayiwa, u ka nafolow bena bɔsi u la, u ka soow bena ci. U bena soow lɔ, nga u tena sigi u kɔnɔ, u bena *ɛrɛzɛnforow bɔ, nga u tena o duvɛn min.

¹⁴«A surunyana, Masaba ka lonba surunyana! A be nana ni karama ye! Kulekan bena mɛn Masaba ka loon na. Mɔgɔ jagwɛlɛnw yɛrɛ bena kule.

¹⁵O loon ye Masaba dimilon ye, o loon ye kojugulon ni dusukasilon ye. O loon ye halakilon ni cɛnnilon ye. O loon ye dibilon ye, dibiba loon!

¹⁶O loon ye burufiyɛlon ye. Kɛlɛ mankan bena bɔ, ka dugu barikamanw ni kɔlɔsilikɛlaw sigiyɔrɔw kɛlɛ.

¹⁷Ne bena mɔgɔw bila dusukasi la. U bena taama i ko fiɲɛntɔw bari u ye ne Masaba hakɛ ta. U joli bena yɛrɛkɛ i ko buguri, u suuw bena filifili i ko ɲamaɲama.

¹⁸U ka wari wo, u ka sanu wo, o si tena se k'u kisi Masaba dimilon na. Dugukolo bɛɛ bena jɛni a ka dusugwankojugu fɛ. A bena kɛ loon juguman ye dɛ! Bari a bena dugukolo kan mɔgɔw bɛɛ sii tunu.»